याकूब कै लाबान के झोने भेजो जानो
1 तौ इसहाक याकूब कै बुलाए कै आसीर्वाद दई, और आग्या दई, "तू कोई कनानी लौड़िया के संग बिहा मत करिये। 2 उठ, और पद्दन-अराम के इलाका मैं अपने नना बतूएल के घरै जा। हुँआँ अपने मुमा लाबान की लौड़ियन मैं से कोई एक के संग बिहा करिये। 3 सर्वसक्तिमान परमेस्वर तोए आसीस देबै, तोए इतनो फलवन्त और असंख्य बनाबै कि तैं तमान रास्ट्रन को एक समुदाय बन जाबै। 4 बौ तोकै और तेरे संग तेरे वंसज कै अब्राहम की आसीस देबै, जोसे तैं अपने रहन बारे बौ देस के ऊपर अधिकार करै, जोकै परमेस्वर अब्राहम कै दई रहै।"28:4 उत्प 17:4,8 5 तौ इसहाक याकूब कै बिदा करी, और बौ पद्दन-अराम के इलाका मैं लाबना के झोने चले गौ। लाबान अराम वंस को बतूएल को लौड़ा रहै। बौ याकूब और एसाव की अईय्या रिबका को भईय्या रहै।
एसाव को एक और बिहा
6 तौ एसाव कै पता चलो की इसहाक याकूब कै आसीर्वाद दैकै पद्दन-अराम भेज दई, कि बौ उतई की लौड़िया से बिहा करै, और बाकै आसीर्वाद देन के समय जौ आग्या भी दई, "कि तू कोई कनानी लौड़िया कै बिहाए कै मत लईये," 7 और याकूब अईय्या- दऊवा की मानकै पद्दन-अराम के इलाका कै चल दई। 8 तौ एसाव जौ सब देखकै समझी कि कनानी लौड़ियाँ मेरे दऊवा इसहाक कै बुरी लगथैं, 9 तौ एसाव अब्राहम के लौड़ा इस्माएल के झोने गौ, बौ अपनी दुसरी बईय्यर के होत भई भी इस्माएल की लौड़िया और नबायोत की बहेनिया महलत से बिहा कर लई।
बेतेल मैं याकूब को सपनो
10 याकूब बेर्सेबा से निकर कै हारान नगर के घाँईं चले गौ। 11 और बौ कोई जघा मैं पहोंच कै रात हूँनै बिताई, काहैकि सूरज मुंद गौ रहै; तौ बौ बौ जघा के पत्थरन मैं से एक पत्थर लैकै अपनी तकिया बनाए कै रखी, और बहे जघा मैं सोएगौ। 12 फिर बौ सपने मै का देखी, कि एक सीढ़ी धरती मैं खड़ी है, और बाको सिरा स्वर्ग तक पहुँचो है; और परमेस्वर के स्वर्गदूत बामैं चढ़त-उतरत हैं। 13 यहोवा बाके झोने ठाड़कै कहथै, "मैं यहोवा, तेरो दादो अब्राहम को परमेस्वर, और इसहाक को भी परमेस्वर हौं" जो धरती मैं तू लेटो है, बौ मैं तोकै और तेरे वंस कै दुंगो।28:13 उत्प 13:14,15 14 और तेरे वंस धरती के धूधर के तिनका के हानी अनगिनत होंगे, और पछार, अगार, सीरे, तरहाँए, चारौ घाँईं फैलत जागो; और तेरे और तेरे वंस के जैसी धरती के सब गाँओं आसीस पांगे। 15 और सुन, मैं तेरे संग रहांगो, और जहाँ कहूँ तू जागो उतै तेरी रक्छा करंगो, और तोकै जौ देस मैं लौटाए लामंगो; जो बात मैं तोसे कहो हौं, जबले उनकै पूरो ना कर लेंगो तौले तोकै ना छोड़ंगो।28:15 यसा 41:10 16 फिर याकूब जग उठो, और कहन लगो, "सच्ची जौ जघा मैं प्रभु है; और मैं जौ बात कै नाय जानत रहौं।" 17 और डराए कै बौ बोली, "जौ जघा का भयानक है! जौ तौ परमेस्वर के भवन कै छोड़ और कुछ नाय ही सकथै; फिर जौ स्वर्ग को फाटक होगो।"
18 याकूब सुबेरे उठो, और अपनी तकिया को पत्थर लैकै बाको खम्मा खड़ो करी, और बाके ऊपर के सिरा मै तेल डार दई। 19 और बौ बहै जघा को नाओं बेतेल रखी; पर बौ जघा को नाओं पहले लूज रहै। 20 याकूब जौ मन्नत माँगी, "अगर परमेस्वर मेरे संग रहकै जौ यात्रा मै मेरी रक्छा करै, और मोकै खान के ताहीं रोटी, और पहनन के ताहीं लत्ता देबै, 21 और मैं अपने दऊवा के घरै अच्छे से लौट आमौं; तौ प्रभु मेरो परमेस्वर ठहरैगो। 22 और जौ पत्थर, जोको मैं खम्मा खड़ो करो हौं, परमेस्वर को भवन ठहरैगो: और जो कछु तू मोकै देगो बाको दसमांस मै जरुरै तोकै दे करंगो।"