उत्पत्ति 29

याकूब लाबान के घर पहोंचो

1 याकूब अपने रास्ता मैं चलतै रहो और अगार देस के लोगन के घाँईं चले गौ। 2 अचानक बाकी निगाह मैदान मैं एक कुआँ मैं पड़ी, जोके चारौ घाँईं भेड़न को तीन झुंग लेटे पड़े रहैं। जौ कुआँ से भेड़-बकरियन कै पानी पिबाओ जात रहै, कुआँ के मोहों मैं एक बड़ो पथरा रखो रहत रहै। 3 जब सबै भेंड़-बकरियन को झुंग हूँना जुरत रहैं, तौ बरदिया मिलकै पथरा कै पच्छू के घाँईं घुमात रहैं, और उन्हैं पानी पिबात रहैं। फिर बे पथरा कै बापस बाकी जघा मैं रख देत रहैं।

4 याकूब बरदियन से पूँछी, "मेरे दोस्तौ, तुम कहाँ से हौ?"

बे जबाब दईं, "हारान नगर से।"

5 बौ फिर पूँछी, "का तुम नाहोर के पोता लाबान कै जानथौ?"

बे बाकै जबाब दईं, "हाँ, हम जानथैं।"

6 फिर बौ उनसे पूँछी, "का बौ ठीक है?" बे जबाब दईं, "बौ ठीक है,"

"देखौ, बाकी लौड़िया राहेल भेंड़-बकरियन के झुंग के संग आए रई है।"

7 याकूब कहथै, "अभै तौ दिन बीतन मैं बड़ा समय बचो है। जौ जानवरन कै एकट्ठो करो जान को समय ना है। भेड़-बकरियन कै पानी पबाबौ और जाबौ, उन्हैं फिर से चुगाबौ।"

8 बे जबाब दईं, "हम ऐसो तौले नाय कर सकथैं जबले कि सब भेड़-बकरिया हिंयाँ आए ना जामैं, जब सब झुंग जुराथै, तौ पथरा कुआँ के मोहों से लुढ़काओ जाथै, और तौ हम भेड़-बकरियन कै पानी पिबाथैं।"

9 जब याकूब उनसे बात करतै रहै, तभई राहेल अपने दऊवा की भेड़-बकरियन के संग आए पहोंची, बौ भेड़-बकरिया चुगाए करत रहै। 10 जब याकूब राहेल कै, अपने चाचा लाबान की भेड़-बकरियन के संग देखी, तौ बौ कुआँ के झोने गौ, बौ बाके मोहों मैं रखे पथरा कै ढुरकाए दई और अपने मामा लाबान की भेंड़न कै पानी पिबाई। 11 फिर याकूब राहेल कै चूम्मी लई और बौ फूट-फूट कै रोन लगो। 12 याकूब राहेल से कही, "मैं तेरे दऊवा को हितुआ, और रिबका को लौड़ा हौं।" और बौ अपने दऊवा कै बतान ताहीं के दौड़ी; 13 और जब बौ अपने भतीजे याकूब की खबर सुनी, तौ बासे भेंटा करन के ताहीं दौड़ पड़ो, और बाकै गले लगाएकै चूमी, और बाकै अपने घरै लै आई। और याकूब लाबान कै सब कुछ बताए दई, 14 लाबान कही, "हाँ, सचमुच, तू मेरो ही माँस और खून है।" और याकूब पूरे एक महेना ले हुँआँ ठहरो।

याकूब राहेल और लिआ के ताहीं लाबान की सेवा करथै

15 लाबान याकूब से कही, "का तैं मेरो हितुआ होन के बजह से बिना मजदूरी लै मेरी सेवा करत रहगो? मोकै बता कि तेरी मजदूरी का है?" 16 लाबान की दुई लौड़िया रहैं; बड़ी को नाओं लिआ और छोटी को राहेल रहै। 17 लिआ की आँखी कमजोर होथैं, लेकिन राहेल कटिली और सुगड़ भी होथै।

18 याकूब राहेल से प्यार करत रहै, बौ कही, "मैं तेरी छोटी लौड़िया राहेल के ताहीं सात साल ले तेरी सेवा करंगो।"

19 लाबान जबाब दई, "मैं राहेल कै पराए आदमी कै देन से अच्छो है कि मैं बाकै तहीं कै सौंप देमौं। तू मेरे संग रहा।" 20 याकूब राहेल कै पान के ताहीं सात साल ले काम करी, और जौ समय बाकै कुछ दिन के हानी लगो, काहैकि बौ बासे प्यार करत रहै।

21 फिर याकूब लाबान से कही, "समय पूरो ही गौ है; मोकै अपनी लौड़िया से बिहा करा।" 22 तौ लाबान बौ जघा के लोगन कै इखट्टो करकै एक बड़ो भोज तैयार करी। 23 लेकिन बौ रात, बौ राहेल के बदले लिआ कै याकूब के झोने लै गौ, और याकूब बाके संग सारीरिक संबंध रखी। 24 लाबान अपनी दासी जिल्पा कै अपनी लौड़िया लिआ की दासी होन के ताहीं दै दई। 25 अगले भोर कै याकूब कै पता चलो, कि जौ लिआ रहै। बौ लाबान के झोने गौ और कही, "तैं मेरे संग ऐसो काहे करो? मैं राहेल कै पान ताहीं इत्तो काम करो। तैं मोकै धोखा काहे दौ?"

26 लाबान जबाब दई, "हिंयाँ बड़ी लौड़िया से पहले छोटी लौड़िया को बिहा करन को रिवाज नाय है। 27 हप्ता के बिहा को समारोह खतम होन ले असियाएले, और अगर तैं मेरे हिंयाँ सात साल और काम करैगो तौ मैं तोकै राहेल कै दै दुंगो।"

28 याकूब राजी ही जाथै, और जब बिहा को समारोह को हप्ता खतम ही जाथै, तौ लाबान बाकै अपनी लौड़िया राहेल कै बाकी बईय्यर होन ताहीं दै दई। 29 लाबान अपनी नौकरानी बिल्हा कै अपनी लौड़िया राहेल के ताहीं नौकरानी जैसी देथै। 30 तौ याकूब राहेल के झोनें भी गौ, और बाको प्यार लिआ से जाधा बहे के ऊपर भौ, और बौ लाबान के संग रहकै सात साल और बाकी सेवा करी।

याकूब से जन्में भै बालका

31 जब प्रभु देखी कि लिआ कै राहेल से कम प्यार मिल रौ है, तौ बौ बाके बालका पैदा करनो आसान कर दई, लेकिन राहेल बाँझ रह गई। 32 लिआ पेट से ही गई, और बौ एक लौड़ा कै जनम दई। बौ कहथै, "प्रभु मेरी परेसानी कै देखी है, और अब मेरो आदमी मोसे प्यार करैगो" जौ बजह से बौ बाको नाओं रूबेन रखी। 33 बौ फिर से पेट से भई और बौ एक और लौड़ा कै जनम दई। बौ फिर कहथै, "प्रभु मोकै जौ लौड़ा और दई है, काहैकि बौ मेरे बारे मैं सुनी है कि मोसे कोई प्यार नाय करथै।" तौ बौ बाको नाओं सिमौन रखी। 34 एक बार फिर से बौ पेट से भई और बौ एक और बालका कै जनम दई। बौ फिर कहथै, "अब मेरो आदमी मोसे और जाधे मजबूती से जुड़ो रहगो, काहैकि मोसे बाके तीन लौड़ा पैदा भै हैं" जौ बजह से बौ बाको नाओं लेवी रखी। 35 फिर से बौ पेट से भई और बौ एक और लौड़ा कै जनम दई। बौ कही, "जौ बार मैं प्रभु की स्तुति करंगो।" जौ बजह से बौ बाको नाओं यहूदा रखी। और फिर बाकी कोख बालका पैदा करनो बंद कर दई।