Gênesis 38

यहूदा और तामार

1 बहे समय मै यहूदा अपने भईय्यन कै छोड़कै हीरा नाओं के एक आदमी के झोने रहन चले गौ, जो बौ अदुल्लाम सहर को होथै। 2 हुँआँ यहूदा एक कनानी आदमी की लौड़िया कै देखी। बौ आदमी को नाओं सूआ रहै। यहूदा सूआ की लौड़िया से बिहा कर लई। फिर बौ बाके संग सारीरिक संबंध बनाई। 3 और बासे एक लौड़ा पैदा भौ, और बौ बाको नाओं एर रखी। 4 बौ फिर गर्भवती भई और बौ एक और लौड़ा कै जनम दई और बौ बाको नाओं ओनन रखी। 5 बाको फिर एक और लौड़ा पैदा भौ बौ बाको नाओं सेला रखी। जब बाके लौड़ा को जनम भौ तौ बौ समय यहूदा कजीब सहर मैं रहत रहै।

6 तौ यहूदा अपनो पहलो लौड़ा एर को तामार नाओं की बईय्यर से बाको बिहा कर दई। 7 यहूदा के लौड़ा एर को चाल-चलन भौत बुरो रहै, तौ प्रभु बासे ना खुस भौ, जौ बजह से प्रभु बाकै मार डारथै। 8 तौ यहूदा एर के भईय्या ओनन से कही, "जा और अपने भईय्या की बिधवा के झोने सारीरिक संबंध बना। और दुईरा होन को कर्म पूरो कर, तू अपने भईय्या के ताहीं बंस पैदा कर।" 9 लेकिन ओनन जौ ताब जानत रहै, कि तामार से पैदा भै वंस बाको अपनो का कहो जागो। जौ बजह से बौ अपने भईय्या की बईय्यर के संग सारीरिक संबंध बनाई, और बाकै गर्भ धारड़ ना करी, जोसे बौ अपने मरे भै भईय्या को वंस नाय बढ़ाए सकै। 10 बाके ऐसो काम करन से प्रभु बासे खुस ना भौ, और प्रभु बाकै भी मार डारथै। 11 तौ यहूदा अपनी बहु तामार से कही, अपने दऊवा के घरै लौट जा, और जब ले मेरो लौड़ा सेला बड़ो न ही जाबै तौ ले तैं बिधवा बनी रहै। बौ ऐसो जहेमारे कही, काहैकि बाकै डर रहै कि सेला भी बाके भईय्यन के तराहनी मार दौ जागो। तौ तामार घरै बापस चले गौ।

12 कुछ समय बीतन के बाद, सूआ की लौड़िया मतलब यहूदा की बईय्यर मर गई। बौ अपनी बईय्यर को सोक मनाई। जब सोक के दिन खतम भै और बाकै आराम मिलो, तौ बौ अपने अदुल्लामी दोस्त हीरा के संग तिम्नाह नगर गौ, जहाँ बाकी भेंड़-बकरियन के ऊरन कतरन बारे रहत रहैं। 13 और कोई तामार कै बताई, कि तेरो सुसर अपनी भेंड़-बकरियन को ऊन कतरन के ताहीं तिम्नाह नगर जाए रौ है। 14 तामार बिधवा के लत्ता उतार दई। बौ दुसरे लत्ता पहनी और अपनो मोहों घुँघटा से तोप लई, और बौ तिम्नाह के रस्ता मैं एनैम नगर के अंदर घुसन बारे फाटक मैं बैठ गई। तामार देखी कि बाको दुईरा सेला ज्वान हुई गौ है; पर बाके संग बाको बिहा नाय करो गौ।

15 जब यहूदा बाकै देखी, तौ बौ सोची कि बौ एक छिनरईया है, काहैकि बौ अपनी सकल लुकाए होथै। 16 बौ रस्ता किनारे बाके झोने गौ, बौ तामार से कही, "मोकै अपने संग सारीरिक संबंध बनान दे।" यहूदा नाय जानत रहै कि बौ बाकी बहू है। तामार बोली, "अगर मैं तोकै अपने संग सारीरिक संबंध बनान दियौं, तौ तैं मोकै का देगो?"

17 यहूदा जबाब दई, "मैं तोकै अपने झुंग मैं से एक बकरिया को बच्चा पनार देंगो।" तामार कहथै, "ठीक है, जबले तैं बाकै भेजैगो, तौले तैं का मोकै गिरमी के तौर मैं कुछ दै सकथै?"

18 यहूदा पूँछी, "मैं तोए गिरवी के रूप मैं का देमौं?" तामार जबाब दई, तेरी मुहर, गले की डोरी और तेरे हाथ को डंडा। यहूदा जे सब चीज बाकै दै दई। और फिर बौ बाके संग सारीरिक संबंध बनाई। और तामार बारे पेट से भई। 19 तामार घरै जाएकै अपनो घुँघटा उतार दई, और फिर से बिधवा के लत्ता पहन लई।

20 यहूदा अपने अदुल्लामी दोस्त हीरा के हाथ बकरिया को बच्चा भेजी कि बौ वैस्या के हाथ से गिरवी बारी चीज छुड़ाए लाबै। पर बौ बाकै ना मिली। 21 तौ हीरा हुँआँ के लोगन से पूँछी, "एक वेस्या एनैम जो सड़क के टिकारे रहथै कितै है?" बे जबाब दई, "हिंयाँ तौ कोई वेस्या न रहथै।"

22 तौ बौ यहूदा के झोने लौटकै कही, "मोकै बौ ना मिली। और बौ जघा के लोग भी कहीं, हिंयाँ तौ कोई वेस्या ना रहथै।"

23 फिर यहूदा कही, जे सब गिरवी छुटान बारी चीज अपने पास रखले। ना तौ हिंयाँ के लोग हमरो मजाक उड़ंगे। मैं बाको हिसाब करनो चाहथौं। जौ बजह से मैं जौ बकरिया को बच्चा भेजो रहौं, पर बौ तोकै ना मिली।

24 लगभग तीन महेना के बाद यहूदा कै जौ खबर मिली, "तेरी बहु तामार व्यभिचार करी है और जहे के जरिया बौ गर्भवती हुई है।" यहूदा आग्या देथै, "बाकै बाहर निकारौ और जलाए कै मार डारौ।"

25 जब बाकै बाहर निकारो जात रहै, तौ बौ अपने सुसर कै खबर भेजी: "मैं बौ आदमी से गर्भवती भौ हौं, जोके झोने जे चीज हैं। उन्हैं देखौ और पहेचानौ कि बे कौन की हैं - डोरी समेत मुहर और जौ लठिया।"

26 यहूदा इन्हैं पहचान लई और कही, "बौ सई कह रही है, मैं अपनो कर्तव्य पूरो करन मैं असफल रहो हौं - मोकै बाको बिहा अपने लौड़ा सेला से कर देने रहै।" और यहूदा बाके संग फिर कहुए संबंध नाय बनाई।

27 जब बाके बालका को जनम देन को समय आओ तौ पता चलो कि बाके जुड़वा बालका होन बारे हैं। 28 जब बौ बालका कै जनम देत रहै, तौ तक बालका हाथ बाहर निकारी। दैबुढ़िया बाको हाथ पकड़ी और बामैं एक लाल डोरा बाँधकै कही, "जौ कोक से पहले बाहर निकरो।" 29 लेकिन जब बालका अपनो हाथ भीतर कर लई तौ बाको भईय्या बाहर निकरो। दैबुढ़िया कही, "अरे! तैं तौ खुदै निकरन की रहा बनाएलौ। जौ बजह से बाको नाओं ‘पेरेस’ रखो गौ।" 30 फिर बाके जनम के बाद बाके भईय्या जोकै हाथ मैं लाल डोरा बंधो रहै, कोक से बाहर निकरो। बाको नाओं जेरह रखो गौ।