उत्पत्ति 40

यूसुफ को सपनो

1 कुछ समय बाद मिस्र के राजा कै दाखरस को भंडारी और बाको खास खानु को भंडारी राजा के विरोध मैं पाप कर दई। 2 राजा जे दोनों अधिकारिन से गुस्सा होथै 3 और प्रधानअधिकारी इनकै कैदखाना मैं डरबाए दई, जहाँ यूसुफ होथै। 4 बे कुछ दिन कैदखाना मैं गुजारीं और कप्तान यूसुफ कै उनको नौकर के काम ताहीं अधिकारी चुनीं।

5 एक रात मिस्र देस के राजा के कैदखाना मैं दाखरस को भंडारी और खानु को भंडारी दोनों एक सपनो देखीं, और सपनो को अलग-अलग मतलब होथै। 6 भोर कै जब यूसुफ उनके झोने आओ, तौ का देखथै, कि बे दोनों उदास हैं। 7 राजा अधिकारी उनसे पूँछी, "आज तुम इत्ते उदास काहे हौ?"

8 बे जबाब दईं, "आज रात हम दोनों एक सपनो देखे, और हिंयाँ कोई जौ बतान बारो नाय है कि सपनो को मतलब का है।"

यूसुफ कही, का जौ सच नाय है कि सपने को मतलब समझनो केबल परमेस्वर को काम है? दयाकरकै "मोकै अपने सपनो के बारे मैं बताबौ।"

9 तौ दाखरस को भंडारी यूसुफ से कही, "मेरे सपनो मैं मेरे अग्गु एक अंगूर की लार रहै 10 जोमैं तीन लार हैं जैसिये बामै से कन्ति निकरीं, फूला आए और बाके गुच्छा मैं अंगूर लगकै पक गै। 11 मेरे हात मैं राजा को प्यालो रहै; तभई मैं अंगूर लौ, और प्यालो मैं निचोड़कै बाकै हात मैं दै दई।"

12 यूसुफ कही, "जाको मतलब जौ है: तीन लार तीन दिन हैं। 13 तीन दिन मैं राजा तुम्हैं रिहा कर देगो, तुमकै माफ कर देगो और तुमरे पद लौटाए देगो। तुम बाकै बाको प्यालो बैसिये बनाएकै देगे जैसे तुम पहले देत रहौ जब तुम बाके दाखरस के भंडारी रहौ। 14 लेकिन जब तुमरे संग सब कुछ अच्छो पहलिये तराहनी चलन लग जाबै तौ महरबानी करकै मोकै जरूर याद करियो, और महरबानी करकै राजा के अग्गु मेरो जिकर करियो और मोकै जौ कैदखाना से बाहर निकारन मैं मेरी मदत करियो। 15 काहैकि, मोकै इब्रानी देस से अगवा करकै लाईं हैं, और हिंयाँ मिस्र मैं ऐसो काम भी नाय करो जिस बजह से मोकै कैदखाना मैं डारो जातो।"

16 जब खानू पकान को मुखिया देखी, कि दाखरस के भंडारी के सपनो को फल अच्छो निकरो है, तौ बौ यूसुफ से कही, मैं भी एक सपनो देखो हौं; कि मेरी मुड़िया मैं तीन रोटी की छपरिया हैं। 17 ऊपर की छपरिया मैं राजा के ताहीं सब तराहनी की पकी भई चीज रहैं, और पक्छी उनकै खात होथैं।

18 यूसुफ जबाब दई, "जाको मतलब जौ है: तीन छपरिया तीन दिन हैं। 19 तीन दिन मैं राजा तुम्हैं रिहा कर देगो और तुमरी मुड़िया काट देगो! और बौ तेरे सरीर कै खम्मा मैं लटकाए देगो, और पक्छी तेरो माँस नोचकै खामंगे।"

20 तीन दिन बाद राजा अपने जनमदिन मैं अपने सब अधिकारियन कै पनार दई; और बौ अपने दाखरस के भंडारी और खास खानू पकान बारे कै रिहा कर दई, और उन्हैं अपने कर्मचारियन के सामने लाई। 21 राजा दाखरस के प्रधान कै बाको पहले को पद दै दिया, ताकि बौ देन लगै। 22 लेकिन बौ खास खानू पकान बारे कै मारकै टंगवाए दई। जौ सब बैसिये भौ जैसो यूसुफ कही रहै। 23 लेकिन दाखरस को प्रधान यूसुफ के बारे मैं कुछ याद नाय रखी - बौ बाके बारे मैं सब कुछ भूल गौ।