1 दुई साल बीतन के बाद मिस्र को राजा एक सपने मैं देखी, कि बौ नील नदिया के किनारे खड़ो है। 2 जब सात मोटी-ताजी गईंय्या नील नदिया से निकरकै घाँस चुगन लगथैं। 3 उनके पच्छू सात दुबली और देखन मैं हड्डीदार गईंय्या नील नदिया से बाहर निकरीं। बे नदिया के घाट मैं दुसरी गईंय्यन के किनारे ठाड़ गईं। 4 और कमजोर गईंय्या मोटी-ताजी गईंय्यन कै खाए लईं। तभई राजा की नींद खुल गई। 5 बौ फिर सोए गौ और एक और सपनो देखी। एक डंठर मैं अनाज की सात भरी भई और पकी भई बाली निकरीं। 6 फिर सात और पतरी अनाज की बाली निकरीं, जो पुर्वईया ब्यार से भुरसी भई रहैं, 7 और अनाज की पतरी बाली, मोटी और भरी बाली अनाज की बालिन कै निगल गईं। फिर राजा जग जाथै और बाकै एहसास भौ कि बौ सपनो देखरौ है। 8 सुबेरे कै बौ चिंता मैं पड़ जाथै, और तभई राजा मिस्र के सब जादूगर और पंडितन कै बुलबाई। फिर बौ उन्हैं अपने सपनो के बारे मैं बताई, लेकिन कोई भी बाकै नाय बताए सको।

9 फिर दाखरस को भंडारी राजा से कही, "मैं आज अंगीकार करथौं कि मैं पाप करो हौं। 10 बौ राजा से कही तू भंडारी के प्रधान और मेरे ऊपर गुस्सा करो, और हमैं जल्लाद के प्रधान के घरै कैदखाना मैं डरबाए दौ रहै। 11 एक रात हम दोनो एक-एक सपनो देखे, और सपनो को अलग-अलग मतलब रहै। 12 और हूँनै हमरे संग एक जुआन इब्रानी रहै, जो जल्लाद के प्रधान को सेवक रहै। हम बाकै अपनो सपनो बताए और बौ हमैं सपनो को मतलब बताई। 13 जैसो बौ कही रहै बैसिये ही भौ: तू मोकै मेरे पद मैं बहाल करदौ, लेकिन तैं मोकै मेरे पद मैं बहाल करदौ, लेकिन तैं भंडारी कै लटकाए दौ।"

14 तौ फिरौन राजा दूत कै पनारकै यूसुफ कै बुलबाई, और बाकै तुरन्तै कैदखाना से निकारो जाथै। और बौ दाढ़ी बनाई और अपने लत्ता बदली, फिर तभई बौ राजा के सामने आओ। 15 राजा बासे कही, "मैं एक सपनो देखो हौं और बाको मतलब मोकै कोईये नाय बता पाओ। मोकै बताओ गौ है कि यूसुफ तैं सपनो को मतलब बताए सकथै।"

16 यूसुफ जबाब दई, "मैं ना जानथौं, महाराज! लेकिन परमेस्वर के झोने तेरे मुताबिक बाको जबाब है।"

17 फिरौन* यूसुफ से कही, मैं एक सपनो मैं देखो, कि मैं नील नदिया के टिकारे ठाड़ो हौं। 18 जब सात मोटी और ताजी गईंय्या नील नदिया से निकरकै घाँस चुगन लगीं। 19 फिर सात और भी गईंय्या निकरीं जो हड्डीदार और पतरी रहैं। बे सबसे कुरूप गईंय्या रहैं जो मैं मिस्र मैं कहुए नाय देखो रहौं। 20 दुबली और हड्डीदार गईंय्या पहले की सात मोटी-ताजी गईंय्यन कै खाए लईं, 21 पर जब बे उनकै खाए चुकीं, तौ कोई कै ऐसो ना लगत रहै कि बे उनकै खाई हैं; काहैकि जैसी बे पहले दिखात रहैं; बे अभईयो बैसिये रहैं। तौ मैं जग्गौ। 22 मैं एक और सपनो देखो, कि मैं एकै ड़ुंठर मैं सात भरी और पकी भई अनाज की बाली निकरत भै देखो। 23 फिर अनाज की सातौ बाली पतरी और पुर्वईया ब्यार से भुरसी भई निकरीं, 24 और अनाज की पतरी बाली पूरे अनाज कै निगल गईं। मैं जादूगरन कै सपनो के बारे मैं बताओ, लेकिन उनमैं से कोई भी मोकै जाको मतलब नाय बताए पाई।

25 तौ यूसुफ राजा से कही, "दोनों सपनो को मतलब एकै है; परमेस्वर तोए बताए दई है कि बौ का करनो चाहथै। 26 सात अच्छी गईंय्या सात साल की हैं, और सात अच्छी बाली सात साल की हैं; जौ एकै सपनो को मतलब है। 27 जाके बाद जो सात दुबली-पतरी गईंय्या निकरीं, बे सात साल की रहैं, और बे बुरी गईंय्या जो रेगिस्तानी ब्यार से भुर्स गईं रहैं बे भी अकाल के सात साल हैं।

28 राजा कही जौ बैसिये है जैसो मैं तोसे कहो रहौं-परमेस्वर तुम्हैं दिखाई है कि बौ अग्गु का करन बारो है। 29 पूरे मिस्र देस मैं सात साल ले भौत अगरो अन्न पैदा होगो, 30 लेकिन उनके पच्छू सात साल को अकाल पड़ैगो। और मिस्र देस के अच्छे दिन की उपज को भुलाए दौ जागो। अकाल देस कै खाए जागो। 31 बहो तेरो समय पूरी तरह भुलाओ दौ जागो, काहैकि बाके बाद आन बारो अकाल भौत भयानक होगो। 32 फिरौन को सपनो दुई बार आन की बजह जौ है कि परमेस्वर अपनो इरादा पक्को कर लई है, और जाकै जल्दिये करैगो।

33 और अब फिरौन एक समझदार और बुद्धिमान इंसान ढूंढकै बाकै मिस्र देस मैं अधिकारी चुनै। 34 फिरौन राजा तुरन्त अधिकारिन कै चुनै। ताकि बे मिस्र देस के बहोतेरी के सात साल की उपज मैं से पाँचमों भाग लेमैं। 35 और आन बारे अच्छे साल के चलते सारो खानू इकट्ठो करन को राजा हुकम देबै, और सहर मैं अनाज जमा और बाकी रक्छा करन को अधिकार देबै। 36 मिस्र मैं आन बारे सात साल के अकाल के चलते खानू देस के ताहीं कम नाय पड़ैगो, ऐसे करकै लोग भूंक से न मरंगे।"

37 राजा और बाके अधिकारी जौ योजना कै मंजूरी दै दईं। 38 और राजा बासे कही, "हम कै यूसुफ से अच्छो इंसान, मतलब जोमैं परमेस्वर को आत्मा है, बाके अलावा हमैं कोई आदमी नाय मिलैगो।" 39 राजा यूसुफ से कही, "परमेस्वर तोए जौ सब दिखाई है, तभई जौ साफ होथै कि तेरे पास कोई और की तुलना मैं जाधे समझदार, बुद्धिमान और सर्व ग्यानी है। 40 मैं तोकै अपने देस को अधिकारी बनांगो, और मेरे सब लोग तेरी आग्या कै मानंगे। और खाली राजगद्दी के सिंहासन मैं तोसे बड़ो रहेंगो। 41 फिर फिरौन राजा यूसुफ से कही, देख, मैं तोकै पूरे मिस्र को राज्यपाल घोसित करथौं।" 42 तौ राजा अपनी उँगरिया से पुसतैनी मोहर लगी अंगूठी निकारी और यूसुफ की उँगरिया ऊपर रख दई। बौ बाकै बढ़िया मलमल को चोंगा पहनाईं, और बाके गले मैं सोने की माला डार दई।* 43 बौ बाकै सबारी करन के ताहीं दुसरो पुसतैनी रथ दई, और बाको सम्मान करन ताहीं सिपईय्या अग्गु जाएकै चिल्लात गौ, "रस्ता बनाबौ!" और ऐसे करकै पूरे मिस्र को राज्यपाल चुनो गौ। 44 फिरौन यूसुफ से कही, मैं मिस्र देस को राजा फिरौन न हौं, और पूरे मिस्र मैं तेरी आग्या के बगैर तेरे ऊपर कोई हात नाय छोड़ैगो। 45 फिरौन राजा यूसुफ कै मिस्री नाओं साफनत पानेह रखी, और बौ बाकै एक बईय्यर दई, जोको नाओं आसनत था, जो ओन नगर के पुजारी पोतीपर की लौड़िया होथै।

46 जब यूसुफ मिस्र के राजा फिरौन की सेवा करन लगो, तौ बौ तीस साल को रहै। फिर बौ राजा को दरबार छोड़कै पूरे देस मैं घूमन लगो। 47 और फिर अच्छे दिन के सात सालन मैं जमीन बहोतेरी मात्रा मैं अन्न पैदा होन लगो, 48 और सब अन्न यूसुफ इकट्ठो करकै मिस्र सहर मैं रखबाए दई। और हर एक सहर के चारौ घाँईं के खेतन से अनाज जमा करन लगो। 49 हूँना इत्तो अनाज ही गौ कि यूसुफ बाकै मापनो बंद कर दई - जौ समुद्र की रेता के जैसो रहै।

50 ओन नगर मैं अकाल को साल आन से पहले, पुजारी पोतीपर की लौड़िया आसनत से यूसुफ के दुई लौड़ा भै। 51 यूसुफ कही, "परमेस्वर मेरे सब कस्ट और मेरे दऊवा के पूरे परिवार कै भुलबाए दई है" तभई बौ अपने पहले लौड़ा को नाओं मनस्से रखी। 52 बौ जौ कही, "परमेस्वर मोकै बिपत्ति की जमीन मैं फलवंत करी है" जौ बजह से बौ अपने दुसरे लौड़ा को नाओं एप्रेम रखी।

53 मिस्र देस के सात साल के अच्छे दिन खतम ही जाथै। 54 और यूसुफ के कहने के मुताबिक सात साल को अकाल सुरु भौ। और भी देस मैं अकाल होथै, लेकिन पूरे मिस्र मैं खानू की कोई कमी न रहै। 55 *जब मिस्र देस मैं भी अकाल पड़ो, तौ प्रजा अन्न के ताहीं फिरौन राजा कै दोहाई दईं। फिरौन राजा मिस्र मैं रहन बारेन से कही, यूसुफ के झोने जाबौ। जो कछु बौ तुमसे कहबै, बहे करियो। 56 अकाल पूरे देस मैं फैल जाथै, तौ यूसुफ सब भंडार खोल दई और मिस्रियन कै अनाज बेंच दई। 57 यूसुफ से अनाज मोल लेन के ताहीं पूरी दुनिया से लोग मिस्र आत रहैं, काहैकि सब जघा मैं भयंकर अकाल पड़ो रहै।