Gênesis 45

यूसुफ अपने भईय्यन कै बताथै कि बौ कौन है

1 यूसुफ अब अपने नौकरन के सामने अपनी चेतना कै काबू करन मै असफल रहौ, तभई बौ बे सबन कै कमरा से दुआरे जान को आदेस दई। और यूसुफ अपने भईय्यन कै बताई कि बौ कौन है बौ समय उनके अलावा हूँना पर कोईये नाय होथै। 2 बौ ईत्ती जोर से किल्लारी मारकै रोई कि मिस्र के लोग जाकै सुन लईं, और जौ खबर राजा के दरबार मै पहोंचाए देथै। 3 यूसुफ अपने भईय्यन से कही, "मैं यूसुफ हौं। मेरो दऊवा का हबै भी जिन्दो है?" लेकिन जब बाके भईय्या जौ सुनी, तौ बे इत्तो घबड़ाए गै कि बाको जबाब भी नाय दे पाईं। 4 तौ यूसुफ उनसे कही, "महरबानी करकै मेरे झोने आबौ।" फिर बे बाके झोने आए, और फिर बौ उनसे कही, मैं तुमरो भईय्या यूसुफ हौं, जोकै तुम मिस्र मैं आनबारे ब्यापारियन कै बेंच दै रहौ। 5 अब तुम निरास मत होबौ, और ना खुद कै दोसी ठहराबौ, काहैकि तुम मोकै हिंयाँ बेंच डारे। जौ सच्ची बात है कि परमेस्वर मोकै तुमरे झोने तुमरी ज्यान बचान के ताहीं पनार दई। 6 जौ देस मै सूखा को सिरफ दुसरो साल है; पाँच साल और होन के बाद बामैं ना तौ हर से जुताई होगी और ना ही फसल काटी जागी। 7 परमेस्वर मोकै जौ अदभुत तरीका से तुम्हैं बचान और जौ तय करन के ताहीं तुमरे अग्गु भेजो कि तुम और तुमरे बंसज पृथ्वी मैं जिन्दे रहमैं और उनकी रक्छा करी जाबै। 8 तौ बाकई मै तुम जो नाय रहौ जो मोकै हिंयाँ पनारे, बल्कि परमेस्वर है। बौ मोकै राजा को सबसे ऊँचे पद मै को अधिकारी बनाए दई है। बौ मोकै पूरे देस को चाल-चलता सौंप दई है; मैं पूरे मिस्र को सासक हौं।

9 "तौ अब जल्दी से मेरे दऊवा के झोने लौट आबौ और बासे कहबौ कि बाको लौड़ा यूसुफ जौ कही है: परमेस्वर मोए पूरे मिस्र देस को स्वामी बनाए दई है; बिना कछु देरी करे मेरे झोने आए जाबौ। 10 और तैं गोसेन प्रदेस की सीमा मै रह सकथै, ताकी तू मेरे झोने रह सकै - और तू, तेरे बालका तेरे नतिया- नुतकर, तेरी भेंड़ और बकरिया, तेरे जानवर और तेरे सबै कुछ चीज समेत मेरे झोने रहगो। 11 अगर तैं गोसेन मै होगो, तौ मैं देखरेख कर सकथौं। काहैकि हुँआँ हबै भी पाँच साल ले सूखा पड़ैगो; और मैं नाय चाहथौं कि तू, तेरो परिवार, और तेरे जानवर भूंके मरैं।"

12 यूसुफ जासे अग्गु और कही, "अब तुम सब, और तैं, और बिन्यामीन भी, देख सकथौ कि मैं सच मै यूसुफ हौं। 13 मेरे दऊवा कै बताए दियौ कि मैं हिंयाँ मिस्र देस मै कित्तो सानसोकत बारो हौं और मेरो रुतबा कितनो है बाकै बौ सब कुछ बताबौ जो तुम देखे हौ। और अब तुरंतै बाकै हिंयाँ लै आबौ।"

14 और बौ अपने भईय्या बिन्यामीन के अग्गु पूरी बाँह फैलाई और रोन लगो; बिन्यामीन भी बासे गले लगकै रोन लगथै। 15 फिर, रोत भै, बौ अपने हर एक भईय्या कै गले लगाई और उन्हैं चूमी। बाके बाद बाके भईय्या बासे बात करन लगे।

16 जब महल मै खबर पहोंची कि यूसुफ के भईय्या आए हैं, तौ बाको राजा और अधिकारी भौत खुस भै। 17 तभई राजा यूसुफ से कही, "अपने भईय्यन से कह कि बे अपने जानवरन कै भरकै कनान देस कै लौट जामैं। 18 ताकी जे सब अपने दऊवा और अपने परिवार के लै सकै और हिंयाँ सबन कै लैकै बापस आन दियौ। मैं उन्हैं मिस्र मै बढ़िया से बढ़िया जमीन दुंगो, और उनके झोने रहन के ताहीं भौत कुछ होगो। 19 बौ उनकै आग्या दई कि बे अपनी बईयरैं और छोटे बालकन कै लान ताहीं मिस्र से लड़िया लै जामैं और संग मै अपने दऊवा कै भी लैकै आमै। 20 उनकै अपनी सब चीजन की चिंता नाय करने है और उनकै हिंयाँ लाने भी नाय है; काहैकि पूरे मिस्र देस मै जो बढ़िया जमीन होगी बौ उन्हईं की होगी।"

21 याकूब के लौड़ा बैसिये करीं जैसो उनसे कहो गौ रहै। राजा की आग्या के जरिया यूसुफ उन्हैं लड़िया और सफर के ताहीं रासन दई। 22 बौ उन्हैं सबन कै बदलन ताहीं एक-एक जोड़ी लत्ता भी दई, लेकिन बौ बिन्यामीन कै तीन सौ चाँदी के सिक्का और पाँच जोड़ा लत्ता भी दई। 23 बौ अपने दऊवा कै सफर के ताहीं सबसे अच्छे मिस्र के सामान से लदे भै दस गधा और अनाज, रोटी और भी चीजन से लदे भै दस गधी पनारी। 24 जब बे रास्ता मैं जात रहैं बौ फिर अपने भईय्यन कै पनारी, और जब बे चले गै, तौ उनसे कही, रस्ता मै लड़ियो मत।

25 बे फिर मिस्र छोड़कै और कनान मै अपने दऊवा याकूब के घरै बापस लौट आए। 26 "यूसुफ हबै भी जिन्दो रहै!" बौ अपने भईय्यन से कही। "बौ पूरे मिस्र को सासक है!" याकूब कै हैरान भौ और बौ बाके बात ऊपर कतई विस्वास नाय करी, और बौ सुन पड़ गौ।

27 लेकिन जब याकूब बाकै बौ सबै कुछ बताई जो यूसुफ उनसे कही होथै, और जब बौ बे लड़िया देखी जो यूसुफ बाकै मिस्र मै लान के ताहीं पनारी रहै, बाकै देखकै बाकी ज्यान मैं ज्यान आए गई। 28 याकूब कही, बस इतनोई काफी है कि "मेरो लौड़ा यूसुफ हबै भी जिन्दो है!" मैं तौ बस जहे माँग सकथौं! मरन से पहले मोकै जाएकै बाकै देखने है।