Gênesis 47

1 तौ यूसुफ अपने पाँच भईय्यन कै लैकै राजा के झोने गौ। बौ बासे कही, "मेरे दऊवा और मेरे भईया अपनी भेड़-बकरिया, गईंय्या-बरधा और अपनो सब कछु लैकै कनान से आए हैं। बे अब गोसेन प्रदेस मैं हैं।" 2 फिर बौ अपने भईय्यन मैं से पाँच आदमिन कै चुनकै फिरौन राजा के सामने खड़ो कर दई। 3 फिरौन राजा उनसे पूँछी, "तुमरो का काम है?" हम बरदिया हैं, जैसे हमरे पुरखा रहैं, बे जबाब दईं। 4 बे फिरौन राजा से जौ कहीं, हम मिस्र देस मैं रहन कै आए हैं, कनान देस मै भैंकर अकाल पड़ो है। इसलै तेरे सेवकन कै भेड़-बकरियन के ताहीं चुगा नाय रहो। अब कृपा करकै अपने सेवकन कै गोसेन प्रदेस मै रहन की इजाजत दे। 5 राजा यूसुफ से कही, "अब जब कि तेरो दऊवा और तेरो भईय्या आए गौ हैं, 6 मिस्र की जमीन तेरे सामने पड़ी है, गोसेन के सहर मै जो जमीन को सबसे अच्छो हिस्सा है, बामैं अपने दऊवा और भईय्यन कै बसाए दे। और अगर बामै से कोई अच्छी आदमी जानवरन की अच्छे से देख-रेख करन बारो होबै, तौ बाकै जानवरन को अधिकारी बनाएदे।"

7 तौ यूसुफ अपने दऊवा कै लैकै राजा के अग्गु गौ। याकूब राजा कै आसीस दई, 8 और राजा फिरौन याकूब से पूँछी, तेरी उमर कित्ती है?

9 याकूब फिरौन कै जबाब दई, "मैं तौ एक सौ तीस साल परदेसी हुईकै अपनी जिंदगी बिताए चुको हौं। मेरी जिंदगी के दिन थोड़ी और दुख से भरे पड़े रहैं, और मेरे बापदादो परदेसी हुईकै जितने दिन ले जिंदे रहे उतने दिन को मैं अभै ना भौ हौं।" 10 याकूब राजा कै आसीस दई और चले गौ। 11 तौ यूसुफ अपने दऊवा और भईय्या कै मिस्र मै बसाए दई, और बौ फिरौन राजा की आग्या के हिसाब से कनान देस के रामसेस प्रदेस मैं अच्छी जमीन दई। 12 यूसुफ अपने दऊवा, अपने भईय्या और अपने दऊवा के परिवार के बाकी सब लोगन कै, जोमैं सबसे छोटो बच्चा भी सामिल रहै, खानु खबाई।

13 अकाल इत्तो भयानक रहै कि कैसियो भी खानु नाय रहै, और मिस्र और कनान के लोग भूंक से कमजोर हुई गै। 14 जो पैसा मिस्र देस और कनान देस मैं लेन-देन मैं जुराने रहैं, और जोसे लोग अनाज खरीदत रहैं, बाकै यूसुफ जोड़कै फिरौन राजा के महल मैं जमा कर दई। 15 जब मिस्र और कनान देस को सब पैसा खतम ही गौ, तौ मिस्री यूसुफ के झोने जाएकै कहन लगो, "हम कै खानु दे! हम मरन मत देबै, कछु कर! हमरो सब पैसा खतम ही गौ है।"

16 यूसुफ जबाब दई, "अपने जानवर लै आबौ; अगर तुमरो सब पैसा खतम ही जाबै तौ मैं तुम्हैं जाके बदले मै रासन दुंगो।" 17 तौ बे अपने जानवरन कै यूसुफ के झोने लै आईं, और बौ उनके घोड़ा, भेड़-बकरिया, गईंय्या-बरधा, और गधन के बदले मै उनकै रासन दई। बहे साल बौ सबै जानवर के बदले उन्हैं रासन दई।

18 अगले साल बे बाके झोने आए और कहीं, "स्वामी, हम तोसे जौ माजरा नाय छिपांगे कि हमारो सारो धन खतम ही गौ है और हमरे पालतू जानवर तेरे हैं। हमरे सरीर और हमरी जमीन के अलावा तोए देने के ताहीं कुछ भी नाय बचो है। 19 हमकै मरन मत दे। कुछ भी करकै! हमरे खेत बंजर मत होन दे। रासन के बदले मै हमैं और हमरी जमीन खरीद ले। हम राजा के दास बन जांगे, और बौ हमरी जमीन को मालिक होगो। हमैं जिंदो रखन के ताहीं अनाज और बीज दै दे ताकी हम अपने खेतन कै बोए सकैं।"

20 यूसुफ राजा के ताहीं मिस्र की सब जमीन मोल लै लई। और हर एक मिस्रवासिन कै अपनी जमीन बेचन के ताहीं बेबस होन पड़ो, काहैकि अकाल उनकै भयानक तरीका से प्रभावित करी रहै; और फिर सब जमीन फिरौन राजा की संपत्ति बन गई। 21 यूसुफ मिस्र देस के एक छोर से दुसरे छोर ले लोगन कै दास बनाई। 22 सिरफ बहे जमीन कै नाय मोल लई, जो हूँनै के पुजारिन की होथै। उन्हैं अपनी जमीन कै नाय बेचन पड़ो, काहैकि राजा उन्हैं गुजर-बसर के ताहीं खरेक देत रहै। 23 यूसुफ लोगन से कही, "देखौ, मैं तुम्हैं और तुमरी जमीन कै राजा के ताहीं मोल लै लौ हौं। हिंयाँ तुमरे ताहीं अपने खेत मै बोन के ताहीं बीज है। 24 फसल के समय तुम्हैं राजा कै पाँचमों हिस्सा देने होगो। बचो भौ चार हिस्सा तुमरो होगो। मतलब हर एक हिस्सा खेत के बीज के ताहीं, तुमरे और परिवार के सदस्यन के ताहीं और छोटे बालकन के आहार के ताहीं होगो।"

25 बे जबाब दईं, "तैं हमरी ज्यान बचाओ है; तू हमरे ऊपर अनुग्रह करो, प्रभु, और हम राजा के दास बने रहमंगे।" 26 तौ यूसुफ मिस्र देस के ताहीं नियम बनाई, कि पैदावार को पाँचमों हिस्सा राजा को होगो। और जौ नियम आज कै भी लागू है। सिरफ पुजारिन की जमीन ही राजा की संपत्ति नाय बन सकथै।

याकूब की आखरी बिनती

27 इस्राएली मिस्र मै गोसेन प्रदेस की सीमा मै रहत रहैं, जहाँ बे सेठ ही गै और उनके तमान बालका भै। 28 याकूब मिस्र देस मैं सत्रह साल रहो, ऐसे करकै बाकी पूरी उमर एक सौ सैंतालिस साल की भई। 29 जब इस्राएल के मरन को समय झोने होथै, तभई बौ अपने लौड़ा यूसुफ कै बुलाएकै बासे कही, अपनो हात मेरी जाँघ ऊपर रखकै कसम खा, कि प्रेम के संग अनुग्रह से व्यवहार करैगो। तैं मोकै मिस्र मै मत दफनईये। 30 और जब मैं अपने मरे भै पुरखन के संग सोमौं तौ मोकै मिस्र देस से लै जईये और मेरे पुरखन के कब्रिस्तान मैं दफनईये। यूसुफ जबाब दई, "मैं तेरे कहे के हिसाब से करंगो।"

31 याकूब कही, "तैं कसम खा।" तौ यूसुफ कसम खाई, और याकूब हूँनै अपने बिछौना मै धन्यवाद करी।