Gênesis 50

1 यूसुफ अपने दऊवा के पाँव मै गिर गौ, तौ रोन लगो और बाको चैहरा कै चूमन लगो। 2 फिर यूसुफ वैधन कै अपने दऊवा की लास कै खुसबूदार करन के ताहीं आदेस दई, तौ इस्राएल के वैध लास मैं खुसबूदार द्रव्य भर दईं। 3 यूसुफ अपने बेदन कै आदेस दई कि खुसबूदार लेप लगामैं, और बेद लास मै लेप लगाईं, और लास कै लेप लगान मैं, चालीस दिन को समय लगो। मिस्री लोग बाके ताहीं सत्तर दिन ले विलाप करीं।

4 जब सोक को समय खतम ही गौ, तौ यूसुफ राजा के अधिकारी से कही, "महरबानी करकै जौ खबर फिरौन राजा ले पहुँचाओ: 5 जब मेरो दऊवा मरन बारो रहै, तौ बौ मोसे वादा करबाई कि मैं बौ कबर मै दफन करंगो जो बौ कनान देस मैं तैयार करी रहै। तौ महरबानी करकै मोकै जान दे और मोकै मेरे दऊवा कै दफनान दे, और फिर मैं बापस आमंगो।"

6 राजा फिरौन जबाब दई, "जा और अपने दऊवा कै दफनाए आ, जैसो तुम वादा करे रहौ।"

7 जौ बजह से यूसुफ अपने दऊवा कै दफनान गौ। राजा के सब अधिकारी, और दरबार के बड़े पदाधिकारी लोग और मिस्र के सब बड़े-बूढ़े और खास लोग यूसुफ के संग गै। 8 यूसुफ को पूरो परिवार, सब भईय्या और बाके दऊवा के पूरे परिवार के इनके संग गै। सिरफ इनके छोटे बालका और भेड़-बकरिया और जानवर गोसेन देस की सीमा मै रहगै। 9 बाके संग रथ मै सवार और घोड़ा मै सवार लोग भी गै; जौ एक भौत बड़ो झुंग रहै।

10 जब बे यरदन नदिया के अगार आताद के खलिहान मै पुगे, तौ बे भौत देर ले ऊँची आवाज मै विलाप करत रहे, और यूसुफ सात दिन ले सोक की बरसी मनाईं। 11 जब कनानी के रहन बारे आताद मै इनकै विलाप करत देखीं, तौ बे कहीं, "मिस्री लोग सोक की कैसे गंभीर बरसी मनाएरै हैं!" जहे बजह से बौ जघा को नाओं आबेलमिस्रैम पड़ो, और बौ यरदन नदिया के पार है।

12 तौ याकूब के लौड़ा बैसिये करीं जैसो बौ उनकै आग्या दई रहै; 13 बे बाकी लास कै कनान लै गै और ममरे के अगार मकपेला की गुफा मै दफनाए दईं, जो अब्राहम कबरिस्तान के ताहीं हित्ती एप्रोन से खरीदी रहै। 14 यूसुफ अपने दऊवा कै दफनान के बाद, और अपने सब भईय्या और बे सबन के संग मै मिस्र लौट आओ जो बाके संग मैजल मै गै रहैं।

यूसुफ अपने भईय्यन कै आस्वासन दई

15 अपने दऊवा की मौत के बाद, यूसुफ के भईय्या आपस मै कहमैं, "का होगो अगर यूसुफ हबै भी हमसे नफरत करत होगो और हम सब बाकै जो नुकसान पहोंचाय हैं बाको बदला हमसे लेन की योजना बनात होगो?" 16 जौ बजह से बे यूसुफ कै संदेस भेजीं: हमरो दऊवा मरने से पहले, हमैं जौ आग्या दई रहै, 17 "यूसुफ से कहिये कि बौ कृपा करकै अपने भईय्यन के अपराध और पाप कै छमा करै; काहैकि बे बाके संग बुराई करी रहैं।" अब कृपा करकै अपने दऊवा के परमेस्वर के सेवकन के अपराध माफ करदे। जब बे जौ बात यूसुफ से कहीं तौ बौ रोए पड़ो।

18 फिर बाके भईय्या खुदै आए कै बाके सामने दंड़वत करीं। बे कहीं, "हिंयाँ हम सब तेरे सामने तेरे सेवक हैं।"

19 लेकिन यूसुफ उनसे कही, मत डराबौ; मैं खुद कै परमेस्वर की जघा मै नाय रख सकथौं। 20 तुम मेरे खिलाप बुराई की साजिस बनाए, लेकिन परमेस्वर जाकै अच्छाई मै बदल दई, ताकी तमान लोग जिंदे बचैं, जैसे बे आज भी जिंदे हैं। 21 तुम मत डराबौ। मैं तुमरो और तुमरे बालकन को ख्याल रखंगो। तौ बौ दयालु सब्दन से उन्हैं समझाए-बुझाएकै सांती दई।

यूसुफ की मौत

22 यूसुफ अपने परिवार के संग मिस्र मै रहन लगो; और जब बौ मरो तौ बाकी उमर एक सौ दस साल की होथै। 23 यूसुफ एप्रेम के बालका और नतिया-नतनिया कै देखन तक जिंदो रहो। बौ मनस्से के लौड़ा माकीर के बालकन के परिवार तक जिंदो रहो। 24 यूसुफ अपने भईय्यन से कही, "मैं मरन बारो हौं, लेकिन परमेस्वर जरूर तुमरी परवाह करैगो, और तुम्हैं जौ देस से बौ देस मै लै जागो जो वादा बौ अब्राहम, इसहाक, और याकूब कै दई रहै।" 25 फिर यूसुफ इस्राएलियन से जौ कहकै कि परमेस्वर जरूर तुमरी सुधि लेगो, उनकै जौ बारे मैं कसम खबाई, "हम तेरी हड्डियन कै हिंयाँ से बौ देस ले लै जांगे।"*50:25 इब्रानियों 11:22 26 यूसुफ एक सौ दस साल की उमर मै मिस्र मै मर गौ। बे बाकी लास मै लेप लगाएकै और बाकै ताबूत मै धर दईं।