1 ଯିହୁଦା ଦିଶୁମ୍‌ରେନ୍‌ ରାଜା ଯିହୋୟାକିମ୍‌ଆଃ ରାଇଜ୍‌ତାନ୍‌ ଦିପିଲିରାଃ ଆପି ବାରାଷ୍‌ରେ ବାବିଲୋନ୍‌ରେନ୍‌ ରାଜା ନେବୁଖଦ୍‌ନେଜର୍‌ ଯୀରୁଶାଲେମ୍‌ତେ ହିଜୁଃକେଦ୍‌ତେ ଏନ୍‌ ନାଗାର୍‌କେ ଆକ୍‌ତେୟାର୍‌କେଦା। 2 ପ୍ରାଭୁ ଯିହୁଦା ଦିଶୁମ୍‌ରେନ୍‌ ରାଜା ଯିହୋୟାକିମ୍‌କେ ଓଡ଼ୋଃ ପାର୍‌ମେଶ୍ୱାର୍‌ଆଃ ମାନ୍ଦିର୍‌ ଅଡ଼ାଃରେୟାଃ ଚିମିନ୍‌ ଜିନିଷ୍‌କକେ ଇନିୟାଃ ତିଃଇରେ ଜିମାକେଦା। ଇନିଃ ଏନ୍‌ ସବେନାଃ ଇଦିକେଦ୍‌ତେ ସିନିୟର୍‌ ଦିଶୁମ୍‌ରେ ତାଇନ୍‌ତାନ୍‌ ଆୟାଃ ମାହାପୁରୁକଆଃ ମାନ୍ଦିର୍‌ ଅଡ଼ାଃରାଃ ଭାଣ୍ଡାର୍‌ରେ ଦହକେଦା।

3 ଏନ୍ତେ ରାଜା ଚାକୁରାକଆଃ ମାରାଙ୍ଗ୍‌ ସାହେବ୍‌ ଅସ୍ପନସ୍‌କେ ଆଚୁକିୟା, ଦାସିୟଃ ନାଙ୍ଗ୍‌ ତଲ୍‌ ଇଦିକାନ୍‌ ରାଜ୍‌ଘାରାନା ଅଡ଼ାଃରେନ୍‌ ଚିମିନ୍‌ ହଡ଼କ ଓଡ଼ୋଃ ଇସ୍ରାଏଲ୍‌ରେନ୍‌ ଚିମିନ୍‌ ମାପ୍‌ରାଙ୍ଗ୍‌ ଅଡ଼ାଃରେନ୍‌ ହଡ଼କଏତେ, 4 ନେପେଲ୍‌ରେ ସୁଗାଡ଼ାନ୍‌, ବେଗାର୍‌ ଦାଗିୟାକାନ୍‌, ସବେନ୍‌ ଲେକାନ୍‌ ସେଣାଁତେ ପେରେଜାକାନ୍‌, ଜାଲ୍‌ଦି ଇତୁଧାବଃକ ଓଡ଼ୋଃ ରାଜ୍‌ମାହାଲ୍‌ରେ କାମି ଦାଡ଼ି ଲେକାନ୍‌ ପେଡ଼େୟାନ୍‌ ସେପେଡ଼େଦ୍‌କକେ ଆଉକେଦ୍‌ତେ କଲ୍‌ଦିୟ ହଡ଼କଆଃ ଜାଗାର୍‌ ଓଡ଼ୋଃ ଅନଲ୍‌ ଦାଡ଼ିନାଙ୍ଗ୍‌ ଇତୁକମ୍‌ ମେନ୍ତେ ରାଜା ନେବୁଖଦ୍‌ନେଜର୍‌ ଆୟାଃ ଦାସି ଅସ୍ପନସ୍‌କେ କାଜିକିୟା। 5 ଇନ୍‌କୁ ଜେ’ଲେକା ଆପି ବାରାଷ୍‌ରେୟାଃ ଟୁଣ୍ଡୁରେ ରାଜାରାଃ ଆୟାର୍‌ରେ ତିଙ୍ଗୁ ଦାଡ଼ିନାଃକ, ଏନାମେନ୍ତେ ରାଜା ଆୟାଃ ଜଜମାଃଏତେ ଓଡ଼ୋଃ ନୁଁ’ତାନ୍‌ ଦାଖ୍‌ରାସିଏତେ ସବେନ୍‌ ହୁଲାଙ୍ଗ୍‌ ଇନ୍‌କୁକେ ଏମାକ ନାଗେନ୍ତେ ଓଡ଼ୋଃ ଆପି ବାରାଷ୍‌ ଜାକେଦ୍‌ ଇନ୍‌କୁକେ ଇତୁକ ନାଗେନ୍ତେ ହୁକୁମ୍‌ ଏମ୍‌କେଦା। 6 ଏନ୍‌ ସାଲାକାନ୍‌ ହଡ଼କଏତେ ଯିହୁଦା କିଲିରେନ୍‌ ଦାନିୟେଲ୍‌, ହନାନିୟ, ମିଶାୟେଲ୍‌ ଓଡ଼ୋଃ ଅସରିୟ ତାଇକେନାକ। 7 ଏନ୍‌ ଚାକୁରାକଆଃ ମାରାଙ୍ଗ୍‌ ସାହେବ୍‌ ଅସ୍ପନସ୍‌ ଇନ୍‌କୁକେ ନାୱା ନୁତୁମ୍‌ ଏମାଦ୍‌କଆଏ, ଦାନିୟେଲ୍‌କେ ବେଲ୍‌ଟ୍‌ଶତ୍ସର୍‌, ହନାନିୟକେ ଶଦ୍ରକ୍‍, ମିଶାୟେଲ୍‌କେ ମୈଶକ୍‍ ଓଡ଼ୋଃ ଅସରିୟକେ ଅବେଦ୍‍ନଗୋ ମେନ୍ତେ ନୁତୁମ୍‌କେଦ୍‌କଆ।

8 ମେନ୍‌ଦ ଦାନିୟେଲ୍‌, ରାଜା ଅଡ଼ାଃରାଃ ଜଜମାଃ ଓଡ଼ୋଃ ଦାଖ୍‌ରାସି ନୁଁ ଜମ୍‌କେଦ୍‌ତେ ଆପାନ୍‌କେ ସତ୍‌ରା କା ରିକା ନାଙ୍ଗ୍‌ ଆୟାଃ ମନ୍‌ରେ ଉହାଟ୍‌କେଦା। ଏନାତେ ଆପାନ୍‌କେ ଏନ୍‌ ଜଜମାଃକ ଆଲକାଏ ଏମାଇଙ୍ଗ୍‌କା ମେନ୍ତେ ଏନ୍‌ ଚାକୁରାକଆଃ ମାରାଙ୍ଗ୍‌ ସାହେବ୍‌ ଅସ୍ପନସ୍‌କେ ଦେଙ୍ଗା ଆସିକିୟାଏ। 9 ପାର୍‌ମେଶ୍ୱାର୍‌ ଏନ୍‌ ଚାକୁରାକଆଃ ମାରାଙ୍ଗ୍‌ ସାହେବ୍‌ ଅସ୍ପନସ୍‌ରାଃ ଆୟାର୍‌ରେ ଦାନିୟେଲ୍‌କେ ସାୟାଦ୍‌ ଓଡ଼ୋଃ ଦାୟା ଉଦୁବ୍‌କିୟା। 10 ମେନ୍‌ଦ ଏନ୍‌ ଚାକୁରାକଆଃ ମାରାଙ୍ଗ୍‌ ସାହେବ୍‌ ଅସ୍ପନସ୍‌ ଦାନିୟେଲ୍‌କେ କାଜିକିୟା, ଆଇଙ୍ଗ୍‌ ଆଇଁୟାଃ ଗମ୍‌କେ ରାଜାକେଇଙ୍ଗ୍‌ ବରତାନା, ଚିଆଃଚି ଇନିଃ ଆପେୟାଃ ଜମ୍‌ ନୁଁ’ରାଃ ଯୋଗାଡ଼୍‌ ଏମାକାଦାଏ। ଇନିଃ ଆପେଲଃ ତାଇନ୍‌ତାନ୍‌ ଏଟାଃ ସେପେଡ଼େଦ୍‌କତାଃଏତେ ଆପେକେ ନାରାଦୁରାଗି ନେଲ୍‌ପେ ରେଦ, ହବାସାକାଅଃଆ, ଆମାଃ ଖାତିର୍‌ ରାଜା ଆଇଁୟାଃ ଜୀଉ ଇଦିୟାଏ।

11 ଏନ୍ତେ ଏନ୍‌ ଚାକୁରାକଆଃ ମାରାଙ୍ଗ୍‌ ସାହେବ୍‌ ଅସ୍ପନସ୍‌ ଦାନିୟେଲ୍‌, ହନାନିୟ, ମିଶାୟେଲ୍‌ ଓଡ଼ୋଃ ଅସରିୟ ନେ ସବେନ୍‌କକେ ହର ନାଙ୍ଗ୍‌ ଆଚୁକାଇ ତାଇକେନାଏ, ଇନିଃକେ ଦାନିୟେଲ୍‌ କାଜିକିୟାଏ, 12 "ଦାୟାକେଦ୍‌ତେ ଆମ୍‌ ଆଲେକେ ଗେଲ୍‌ ମାହା ଜାକେଦ୍‌ ବିଡ଼ାଅଲେମେ ଓଡ଼ୋଃ ଆଲେକେ ଜମ୍‌ ନାଙ୍ଗ୍‌ ଆଡ଼ାଃସାକାମ୍‌ ଓଡ଼ୋଃ ନୁଁ ନାଗେନ୍ତେ ଦାଆଃ ଏସ୍‌କାର୍‌ ଏମାଲେମେ। 13 ଏନ୍ତେ ରାଜା ଏମାକାଦ୍‌ ଜଜମାଃ ଜମ୍‌ତାନ୍‌ ସେପେଡ଼େଦ୍‌କଆଃ ମେଦ୍‌ମୁହାଁଡ଼୍‌ ଓଡ଼ୋଃ ଆଲେୟାଃ ମେଦ୍‌ମୁହାଁଡ଼୍‌ ଜକାଲେମେ, ଏନାରେ ଆମ୍‌ ଜେ’ଲେକା ନେଲେୟାମେ, ଏନ୍‌ଲେକାଗି ରିକାଲେମେ।"

14 ଇନିଃ ନେ କାଜିରେ ରାଜିୟାନା ଓଡ଼ୋଃ ଗେଲ୍‌ ମାହା ଜାକେଦ୍‌ ଇନ୍‌କୁକେ ବିଡ଼ାଅ କେଦ୍‌କଆ। 15 ଗେଲ୍‌ ମାହାରାଃ ଟୁଣ୍ଡୁରେ ରାଜା ଏମାକାଦ୍‌ ଜଜମାଃ ଜମ୍‌ତାନ୍‌ ସେପେଡ଼େଦ୍‌କଆଃଏତେ ଆଡ଼ାଃସାକାମ୍‌ ଜମ୍‌ତାନ୍‌କ ପୁରାଃଗି ସୁଗାଡ଼ାନ୍‌ ଓଡ଼ୋଃ ପେଡ଼େୟାନ୍‌ଗି ନେଲ୍‌ୟାନାକ। 16 ଏନାତେ ଏନ୍‌ ହରନିଃ ଇନ୍‌କୁକେ ରାଜାରାଃ ଜଜମାଃ କା ଏମ୍‌କେଦ୍‌ତେ ଆଡ଼ାଃସାକାମ୍‌ ଜମ୍‌ନାଙ୍ଗ୍‌ ଏମାଦ୍‌କଆଏ।

17 ପାର୍‌ମେଶ୍ୱାର୍‌ ନେ ଉପୁନିୟା ସେପେଡ଼େଦ୍‌କକେ ସବେନ୍‌ ଅନଲ୍‌, ଓଡ଼ୋଃ ସବେନାଃ ଆଟ୍‌କାର୍‌ଉରୁମ୍‌ ଲେକାନ୍‌ ସେଣାଁ ଏମାଦ୍‌କଆଏ ଓଡ଼ୋଃ ପାର୍‌ମେଶ୍ୱାର୍‌ ଦାନିୟେଲ୍‌କେ ଦାର୍ଶାନ୍‌ ଓଡ଼ୋଃ କୁମୁରେୟାଃ ମୁଣ୍ଡି ଉଦୁବ୍‌ ଦାଡ଼ିରେୟାଃ ସେଣାଁ ଏମ୍‌କିୟାଏ।

18 ରାଜାରାଃ ହେପାଦ୍‌ତେ ସେନ୍‌ନାଙ୍ଗ୍‌ ନେଣ୍ଡା ସେଟେର୍‌ୟାନ୍‌ ଇମ୍‌ତା ଏନ୍‌ ଚାକୁରାକଆଃ ମାରାଙ୍ଗ୍‌ ସାହେବ୍‌ ଅସ୍ପନସ୍‌ ଇନ୍‌କୁକେ ରାଜା ନେବୁଖଦ୍‌ନେଜର୍‌ଆଃ ଆୟାର୍‌ତେ ଆଉକେଦ୍‌କଆ। 19 ରାଜା ଇନ୍‌କୁଲଃ ଜାଗାର୍‌କେଦାଏ ଓଡ଼ୋଃ ଏନ୍‌ ସବେନ୍‌କଆଃ ଥାଲାରେ ଦାନିୟେଲ୍‌, ହନାନିୟ, ମିଶାୟେଲ୍‌ ଓଡ଼ୋଃ ଅସରିୟ ଲେକା ଜେତାଏକେ କାଏ ନାମ୍‌କେଦ୍‌କଆ। ଏନ୍ତେ ଇନ୍‌କୁ ରାଜାରାଃ କାମିରେ ସାଲାୟାନାକ। 20 ରାଜା ସେଣାଁନ୍‌ ଓଡ଼ୋଃ ଆଟ୍‌କାର୍‌ଉରୁମ୍‌ ଦାଡ଼ି ଲେକାନ୍ ଅକ କାଜିକ ଇନ୍‌କୁକେ କୁଲିକେଦ୍‌କଆ, ଏନ୍‌ ସବେନ୍‌ ବିଷାଏରେ ଆୟାଃ ରାଇଜ୍‌ରେ ତାଇନ୍‌ତାନ୍‌ ସେଣାଁନ୍‌, ଯାଦୁଟଣା ଓଡ଼ୋଃ ପାଣ୍ଡିତ୍‌କତାଃଏତେ ଇନ୍‌କୁଆଃ ସେଣାଁ ଗେଲ୍‌ ହିସା ଆଦ୍‌କା ନେଲ୍‌କେଦାଏ। 21 ରାଜା କୋରସ୍‌ ରାଇଜ୍‌ତାନ୍‌ ପାହିଲା ବାରାଷ୍‌ ଜାକେଦ୍‌ ଦାନିୟେଲ୍‌ ଏନ୍ତାଃରେ ତାଇକେନା।