ଦାନିୟେଲ୍ରାଃ ମାରାଙ୍ଗ୍ ଦାର୍ଶାନ୍
1 ପାରସ୍ୟରେନ୍ ରାଜା କୋରସ୍ ରାଇଜ୍ତାନ୍ ଦିପିଲିରାଃ ଆପି ବାରାଷ୍ ହବାଅଃ ତାଇକେନ୍ ଇମ୍ତା ବେଲ୍ଟ୍ଶତ୍ସର୍ ନୁତୁମାକାନ୍ ଦାନିୟେଲ୍କେ ମିଆଦ୍ ଦାର୍ଶାନ୍ ଏମ୍ୟାନା। ନେଆଁରାଃ କାନାଜି ସାର୍ତି ତାନାଃ ଓଡ଼ୋଃ ନେଆଁ ମିଆଦ୍ ମାରାଙ୍ଗ୍ ଲାଡ଼ାଇ ବିଷାଏରେ ଉଦୁବ୍କାନ୍ ତାଇକେନା। ଇନିଃ ଏନାକେ ଆଟ୍କାର୍ଉରୁମ୍ କେଦା ଯେ, ଏନ୍ କାନାଜିରାଃ ମୁଣ୍ଡି ମିଆଁଦ୍ ଦାର୍ଶାନ୍ ହରାତେ ଇନିଃତାଃ ଉଦୁବ୍ୟାନା।
2 ଏନ୍ ଦିପିଲିରେ ଆଇଙ୍ଗ୍ ଦାନିୟେଲ୍ ପୁରା ଆପି ହାପ୍ତା ଜାକେଦ୍ ଏୟମ୍ ତାଇକେନାଇଙ୍ଗ୍। 3 ପୁରା ଆପି ହାପ୍ତା ଜାକେଦ୍ ଆଇଙ୍ଗ୍ ଜେତାନ୍ ସିବିଲାନ୍ ଜଜମାଃ, ମାସ୍ ଚାଏ ଦାଖ୍ରାସି କାଇଙ୍ଗ୍ ଜୁଟିଦ୍କେଦା। ଓଡ଼ୋଃ ଆଇଙ୍ଗ୍ ଜେତାନ୍ ସୁନୁମ୍ କାଇଙ୍ଗ୍ ଗସଃୟାନା।
4 ପାହିଲା ମାହିନାରାଃ ମିଦ୍ହିସି ଉପୁନିୟା ହୁଲାଙ୍ଗ୍ରେ ଆଇଙ୍ଗ୍ ହିଦ୍ଦେକଲ୍ ନୁତୁମ୍ ମାରାଙ୍ଗ୍ ଗାଡ଼ା ଗେନାରେ ତିଙ୍ଗୁଆକାନ୍ ତାଇକେନାଇଙ୍ଗ୍। 5 ଆଇଙ୍ଗ୍ ନେଲ୍କେଦାଇଙ୍ଗ୍, ଆଇଁୟାଃ ଆୟାର୍ରେ ମିଆଦ୍ ହଡ଼ ତିଙ୍ଗୁଆକାନାଏ। ଇନିଃ ଉନ୍ରାଃ ଲିଜାଃ ତୁସିୟାଁକାନ୍ ତାଇକେନାଏ। ଇନିୟାଃ ମାୟାଙ୍ଗ୍ରେ ଉଫାଜ୍ ଦିଶୁମ୍ରାଃ ଫାର୍ଚି ସୋନାତେ ବାଇୟାକାନ୍ ମିଆଦ୍ କାସ୍ନା ତଲାକାନ୍ ତାଇନ୍କେନା। 6 ଇନିୟାଃ ହଡ଼୍ମ ବୈଦୁର୍ଯ୍ୟ10:6 ଗନଙ୍ଗ୍ଆଁନ୍ ମଣି ମଣି ଲେକା, ଇନିୟାଃ ମେଦ୍ମୁହାଁଡ଼୍ ହିଚିର୍ତାନ୍ ମାସ୍କାଲ୍ ଲେକା, ଇନିୟାଃ ବାରାନ୍ ମେଦ୍ ଜୁଲଃତାନ୍ ସେଙ୍ଗେଲ୍ ଲେକା, ଇନିୟାଃ ବାରାନ୍ ତିଃଇରାଃ ସୁପୁ ଓଡ଼ୋଃ କାଟା ପିତ୍ତାଲ୍ ଲେକା ଝାଲ୍ସାଃଅ ତାଇନ୍କେନା। ଇନିୟାଃ ଲାବ୍ଜା ଗାଦେଲ୍ ହଡ଼କ କାଉରିକେଦ୍ତେ ଜାଗାର୍ତାନ୍ ଲେକା ଆୟୁମଃ ତାଇକେନା।
7 ନେ ଦାର୍ଶାନ୍ ଆଇଙ୍ଗ୍ ଦାନିୟେଲ୍ ଏସ୍କାର୍ଗି ନେଲ୍କେଦାଇଙ୍ଗ୍, ଆଇଁୟାଃଲଃ ତାଇକେନ୍ ହଡ଼କ କାକ ନେଲ୍ ଦାଡ଼ିକେଦା। ମେନ୍ଦ ଇନ୍କୁ ନେ’ଲେକା ବର ଭିନାଅକେଦ୍କଆ ଯେ, ଉକୁଃ ନାଗେନ୍ତେ ନିର୍ୟାନାକ। 8 ଏନାତେ ଆଇଙ୍ଗ୍ ଏନ୍ତାଃରେ ଏସ୍କାର୍ଗି ତାଇକେଦ୍ତେ ଏନ୍ ଆକ୍ଦାନ୍ଦାଅ ଦାର୍ଶାନ୍ ନେଲ୍କେଦାଇଙ୍ଗ୍। ଆଇଁୟାଃ ଓଡ଼ୋଃ ଜେତାନ୍ ପେଡ଼େଃ କା ତାଇନ୍ୟାନା, ଆଇଁୟାଃ ମେଦ୍ମୁହାଁଡ଼୍ ଗସୟାନା ଓଡ଼ୋଃ ଜେତାଏ ଆଇଙ୍ଗ୍କେ କାକ ନେଲ୍ ଉରୁମ୍କେଦିୟାଁ। 9 ଏନ୍ରେୟ ଆଇଙ୍ଗ୍ ଇନିଃକେ ଜାଗାର୍ତାନ୍ ଆୟୁମ୍କିୟାଇଙ୍ଗ୍। ଇନିୟାଃ ଜାଗାର୍ ଆୟୁମ୍ତାନ୍ଲଃ ଆଇଙ୍ଗ୍ ପୁରାଃଗି ଦୁଡ଼ୁମ୍ୟାନ୍ଲଃ ଅତେରେ ଉୟୁଃୟାନାଇଙ୍ଗ୍। 10 ଏନ୍ତେ ମିଆଁଦ୍ ତିଃଇ ଆଇଙ୍ଗ୍କେ ଜୁଟିଦ୍କେଦିୟାଁ ଓଡ଼ୋଃ ଆଇଁୟାଃ ତିଃଇ ଓଡ଼ୋଃ ମୁକ୍ଡ଼ି ଏକ୍ଲାଅଃତାନ୍ଲଃ ତିଙ୍ଗୁୟାନାଇଙ୍ଗ୍।
11 ଇନିଃ ଆଇଙ୍ଗ୍କେ କାଜିକେଦିୟାଁ, "ହେ ଦାନିୟେଲ୍, ପାର୍ମେଶ୍ୱାର୍ ଆମ୍କେ ଦୁଲାଡ଼୍ ତାନା। ଆଇଙ୍ଗ୍ ଆମ୍କେ ଅକ ସବେନ୍ କାଜିକ କାଜି ନାଗେନ୍ତେ ସାନାଙ୍ଗ୍ ତାନାଇଙ୍ଗ୍, ଏନ୍ ସବେନାଃକେ ବୁଗିଲେକାତେ ଆୟୁମେମେ ଓଡ଼ୋଃ ଆଟ୍କାର୍ଉରୁମ୍ ତାନ୍ଲଃ ବିରିଦ୍କେଦ୍ତେ ତିଙ୍ଗୁନ୍ମେ, ଚିୟାଃଚି ଆଇଙ୍ଗ୍କେ ଆମାଃତାଃ କୁଲାକାନା।" ଚିମ୍ତା ଇନିଃ ଆଇଙ୍ଗ୍କେ ନେ କାଜି କାଜିକେଦିୟାଁ ଆଇଙ୍ଗ୍ ଏକ୍ଲାଅଃତାନ୍ଲଃ ବିରିଦ୍କେଦ୍ତେ ତିଙ୍ଗୁୟାନାଇଙ୍ଗ୍।
12 ଏନ୍ତେ ଇନିଃ କାଜି ଏଟେଦ୍କେଦାଏ, "ଦାନିୟେଲ୍ ଆଲମ୍ ବରୟା। ଅକ ହୁଲାଙ୍ଗ୍ଏତେ ଆମ୍ ଆଟ୍କାର୍ଉରୁମ୍ ନାଙ୍ଗ୍ ଓଡ଼ୋଃ ଆମ୍ ପାର୍ମେଶ୍ୱାର୍ଆଃ ଆୟାର୍ରେ ଆପାନ୍କେ ଲେବେଃ ରିକାନାଙ୍ଗ୍ ମନ୍ରେ ଉଡ଼ୁଃକେଦାମ୍, ଏନ୍ ହୁଲାଙ୍ଗ୍ଏତେଗି ଆମାଃ ବିନ୍ତି ଆୟୁମାକାନା ଓଡ଼ୋଃ ଏନାରାଃ କାଜିରୁହାଡ଼୍ ନାଗେନ୍ତେ ଆଇଙ୍ଗ୍ ହିଜୁଃକାନାଇଙ୍ଗ୍। 13 ମେନ୍ଦ ପାରସ୍ୟରେନ୍ ଗମ୍କେ ମିଦ୍ହିସି ମୁସିଙ୍ଗ୍ ଜାକେଦ୍ ଆଇଁୟାଃ କାଜିକଟଙ୍ଗ୍ ରିକାକେଦାଏ। ମେନ୍ଦ ନେଲେପେ, ମୁଲ୍ ଗମ୍କେକଏତେ ମିଖାୟେଲ୍ ନୁତୁମ୍ ମିହୁଡ଼୍ ଆଇଙ୍ଗ୍କେ ଦେଙ୍ଗା ନାଙ୍ଗ୍ ଆଇଁୟାଃତାଃ ହିଜୁଃୟାନାଏ। ଚିୟାଃଚି ଆଇଙ୍ଗ୍ ପାରସ୍ୟରେନ୍ ରାଜାଲଃ ଏନ୍ତାଃରେଇଙ୍ଗ୍ ତାଇକେନା। 14 ହିଜୁଃ ଦିପିଲିରେ ଆମାଃ ହଡ଼କ ଚେତାନ୍ରେ ଚିନାଃ ହବାଅଃଆ, ଏନା ଉଦୁବ୍ ନାଗେନ୍ତେଇଙ୍ଗ୍ ହିଜୁଃକାନା। ଚିୟାଃଚି ନେଆଁଦ ହିଜୁଃ ଦିପିଲି ବିଷାଏରେୟାଃ ଦାର୍ଶାନ୍ ତାନାଃ।"
15 ଇନିଃ ଆଇଙ୍ଗ୍କେ ନେ କାଜି କାଜିତାନ୍ ଇମ୍ତା ଆଇଙ୍ଗ୍ ଆକ୍ଚାକାଅୟାନ୍ଲଃ ଅତେସାଃ ତିରୁବ୍କେଦ୍ତେ ଜେତ୍ନାଃ କାଇଙ୍ଗ୍ କାଜି ଦାଡ଼ିକେନା। 16 ଏନ୍ତେ ମାନୱା ଲେକା ମିହୁଡ଼୍ ହିଜୁଃକେଦ୍ତେ ଆଇଁୟାଃ ମଚାକେ ଜୁଟିଦ୍କେଦା ଓଡ଼ୋଃ ଆଇଙ୍ଗ୍ ଜାଗାର୍ ଏଟେଦ୍କେଦାଇଙ୍ଗ୍। ଆଇଁୟାଃ ସାମ୍ନାଙ୍ଗ୍ରେ ତିଙ୍ଗୁଆକାନ୍ ହଡ଼କେ କାଜିକିୟାଇଙ୍ଗ୍, "ହେ ଗମ୍କେ, ନେ ଦାର୍ଶାନ୍ ହରାତେ ଆଇଙ୍ଗ୍ ପୁରାଃଗିଇଙ୍ଗ୍ ନାରାଦୁରାକାନା ଓଡ଼ୋଃ କାଟିଃ ହଗି ପେଡ଼େଃ କାଇଙ୍ଗ୍ ନାମେତାନା। 17 ହେ ଆଇଁୟାଃ ଗମ୍କେ, ଆମାଃ ନେ ଦାସି ଚିଲ୍କାତେ ଆମାଃଲଃ ଜାଗାର୍ ଦାଡ଼ିୟାଏ ? ଚିୟାଃଚି ଆଇଁୟାଃ ପେଡ଼େଃ ବାନଃଆ ଚାଏ ସାହେଁଦ୍ ଇଦି ନାଙ୍ଗ୍ କାଇଙ୍ଗ୍ ଦାଡ଼ିତାନା।"
18 ଏନ୍ତେ ଅକଏଚି ହଡ଼ ଲେକା ନେଲଃ ତାଇକେନାଏ, ଇନିଃ ଆଡଃମିସା ଜୁଟିଦ୍କେଦ୍ତେ ପେଡ଼େଃ ଏମ୍କେଦିୟାଁଏ। 19 ଇନିଃ କାଜିକେଦାଏ, "ପାର୍ମେଶ୍ୱାର୍ ଆମ୍କେ ଦୁଲାଡ଼୍ମେ ତାନା, ଏନାତେ ଆଲମ୍ ବରୟା, ଆମାଃ ଜୀଉସୁକୁ ହବାଅଃକା, ଓଡ଼ୋଃ ପେଡ଼େଜଃମେ।"
ଇନିଃ ନେ କାଜି କାଜିକେଦ୍ଚି, ଆଇଙ୍ଗ୍ ପେଡ଼େଃ ନାମ୍କେଦ୍ତେ କାଜିକେଦାଇଙ୍ଗ୍, "ହେ ଆଇଁୟାଃ ଗମ୍କେ, ଆମ୍ ଆଇଙ୍ଗ୍କେ ପେଡ଼େଃ ଏମାଦିୟାଁମ୍, ନାହାଃଁଦ କାଜିମେ।"
20 ଏନ୍ତେ ଇନିଃ କାଜିକେଦାଏ, "ଆଇଙ୍ଗ୍ ଚିନାଃ ମେନ୍ତେ ଆମାଃତାଃ ହିଜୁଃକାନାଇଙ୍ଗ୍, ଏନା ସାରିକାଦାମ୍ ଚି ? ଆଇଙ୍ଗ୍ ପାରସ୍ୟରେନ୍ ଗମ୍କେଲଃ ଲାଡ଼ାଇ ନାଗେନ୍ତେ ଜାଲ୍ଦିଗି ରୁହାଡ଼ାଇଙ୍ଗ୍, ଆଇଙ୍ଗ୍ ସେନଃ ତାୟମ୍ତେ ଗ୍ରୀସ୍ରେନ୍ ଗମ୍କେ ହିଜୁଃଆଏ। 21 ମେନ୍ଦ ସାନାର୍ତିରେୟାଃ ପୁଥିରେ ଅକଆଃ ଅଲାକାନା, ଏନ୍ ବିଷାଏ ଆଇଙ୍ଗ୍ ଆମ୍କେଇଙ୍ଗ୍ ଉଦୁବାମେୟାଁ। ଇନ୍କୁଆଃ ବିରୁଧ୍ରେ ଆଇଙ୍ଗ୍କେ ଦେଙ୍ଗା ନାଙ୍ଗ୍ ଆପେୟାଃ ଗମ୍କେ ମିଖାୟେଲ୍କେ ବାଗିକେଦ୍ତେ ଜେତାଏ ବାଙ୍ଗ୍କଆ।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)