1 Würi to chuboun aau, aranseha tumuti sun le mégeibei múnada

anhoun to ibidiouguaboun aau, günringua tumutu lau túhabu guánarügü.

2 Ha surubaña óuserun, rútiña inebesei lun Bungiu;

ánhaña ha segebaña óuserun, meberesentiña lau.

3 Íñuguti hererun ibidiougua tau;

anhein hererun ha chúbaña aau, ídehati.

4 Dan le ua hamá bulu bágasu, mégeiti türigu;

gánwounti alubahani lau lere bulu bágasu.

5 Meyeehantiña gefentiña ha inarünitiña;

ánhañati gefentiña ha yéetiña, iyeeni hariñagubei.

6 Áluahatiña ibidiougua tau lichú aau ani madari hamuti;

ánhañati ha huálibaña ichügü, ménrengunti subudi houn.

7 Disebá hawéi ibidiougua tau,

ladüga meresibirunbadibu subudi hámagiñe.

8 Ha chúbaña aau, gunfuranda hamuti hóuserun lau lichú aau;

ánhañati ha ibidiouguabaña aau

eyeedagua lumutiña libidiounigan hau.

9 Éherahatiña ibidiougua tau lau hadurun;

anhein hadan gürigia harumatiña,

anihein aritaguni buiti lidan aban lubá le aban.

10 Subudi tumuti anigi sun tigarigu,

ani siñati tafanreinhani tugundan hama terencha.

11 Tagünrinchaguba haban gürigia salufuritiña;

anhoun haban ha buídubaña, tawanseruba.

12 Anihein burí üma suruti larihíniwa,

gama lumoun óunweni lébehabei.

13 Gáritu anigi íbini lárigi éherahani,

lárigiñe aba liabin ugundani lun ayahunibéi lan.

14 Heresibirubei ha salufuribaña le hadünabei;

ánhañati ha buídubaña hafayeirúaba luagu le hadügübei.

15 Afiñetiña ha mabuidunbaña ichügü

luagu sun le ariñawagúbei houn;

ánhaña ha buídubaña ichügü,

ariha hamuti buidu halía lan héibuga.

16 Hanufudetiña ha chúbaña aau luéi wuribani ani aba hadisedun luéi;

ánhañati ibidiougua tau, kamá meberesentiña lau ni kata.

17 Ha furesebaña lun hagañidun, adügatiña libidiounigan aau;

ánhañati ha saminabaña, diliñu haña súnwandan.

18 Libidiounigan aau halagantebei ha ibidiouguabaña aau,

ánhaña ha saminabaña, geyeguhaña lau subudi.

19 Habuluchaguba ha salufuribaña hagibugiñe ha buídubaña;

hayumuraguba habenari ha richaguabaña.

20 Iyereegutiña ha gudemebaña íbini houn hamadagu guánarügü;

ánhaña ha rísibaña, ígiraguatiña umadagu houn.

21 Ha íchugutiña mebereseni hau hamadagu, hadügüña figóu;

gama lumoun fuleseiwatiña ha gudemehabubaña houn gudemetiña!

22 Ha áluahabaña hadügün wuribani, féridi hamuti üma;

ha áluahabaña hadügün buiti, hínsiñegutiña,

úaragua hagía gürigia hama.

23 Sagawati katei buiti lídangiñe sun áfaaguni;

anhein lídangiñe saragu adimurehani, gudemei asagarúbei.

24 Lichú hau ha chúbaña aau haridinbei;

anhein haridin ibidiougua tau, libidiounigan aau.

25 Sefu hamuti gefentiña ha inarünitiña habagari amu;

ánhañati gefentiña ha yéetiña, lébuna óunweni hagía.

26 Ha íchugubaña inebesei lun Bungiu,

ibihatiña aban emenigini buiti,

ani habihuba hasaanigu achoururuni.

27 Linebenwa Bungiu, lísensenbei ibagari,

le esefurubei gürigia lídangiñe óunweni.

28 Luéirigun urúei lun larúeihaba lan hawagu saragu;

anhein lun larúeihan hawagu bianraü, günringuaü lun.

29 Arufuda lumuti gaguraasuni lichú aau;

anhein maguraasuni, arufudati óunwenbu libidiounigan aau.

30 Ichügü darangilati ibagaribei lun úgubu;

ánheinti gimugaü, ágürüha lumuti íbini abun.

31 Ha adügütiña wuribani houn gudemetiña,

hanabaguñein Habungiute;

ánhaña ha gudemehabubaña houn gudemetiña,

rútiña inebesei lun Habungiute.

32 Ha salufuribaña, günringua lumutiña hariban guánarügü;

gürigia ha harumabaña, góunigi lumutiña haruman guánarügü.

33 Lidan ichügü le saminati buidu laganawa lichú aau;

ánheinti hadan ibidiougua tau, ibidiñewati.

34 Richaguaü, ligía lapantaagülebei aban fulasu;

anhein figóu, ligía lubusigaridünabei.

35 Eseriwidutiña ha buídubaña,

gañei hamuti lufulesein urúei;

anhein ha móunibaña, gañei hamuti ligañi.