1 Lererun burí Aguru le liráü Haké le Masaana.

Ítara liña ladimurehan Aguru lun Itieli luma lun Ukali:

2 Au ibidiouguatimabei aau hadan wügüriña,

úati gunfurandaü le hani gürigia nidan.

3 Márügüdüngidina lichú aau,

ibidiñeti ni kata luáguti le Sándutimabei nun.

4 Kagia amudeirubei sielun ábaya lararirun?

Kagia gayaraabei lárügüdüni garabali lúhaburugu?

Kagia óuburagubalin barana lidan lagei?

Kagia amisurahabalin leben ubóu?

Kagia liri, kagia liri liráü? Ma ibidiñeti bun!

5 Góunigi lumutiña Bungiu ha hemenigibaña luagu,

gayaraati lafiñerúniwa luagu le füramase lubéi.

6 Míchigaba ni kata lanwoun le lariñagun,

ébecha liñalibu, ábame berederun kei yeeti.

7 Biánrügüñein katei namuriahan buma Nubungiute,

rubei nun lubaragiñe nounwen:

8 Dísegüdabei iyeeni nuéi,

marisidagüdabana magudemedagüdün báname,

rubei lérügü nemegeirun nun;

9 ladüga anhein gíbeya numa,

gayaraati nabulieidagun buéi,

nariñagame luagu ibidiñe ban nun;

o ánhana lan emegeira ábame níweruhan

anabagueime biri le wéirigubei.

10 Madimurehabá wuriba luagu idamuni ligibugiñe labureme,

íñaragualiñalibu ábame basufurirun luagu lira.

11 Añahein gürigia íñaragua hamuti háguchi,

ani mabinirun hamutu háguchu.

12 Añahein aritagutiña luagu haruma hamá

ani marumadungiña lídangiñe hawiye.

13 Añahein aritagutiña luagu wéirigu hamá,

ani harihaña híbiri gürigia kei ni kata.

14 Añahein ítarati hari kamá eféin tuma gusiñu

lun hagumuchun hau gürigia gudemetiña.

15 Biámañanu tirahüñü gátaatu hitaü,

ha ariñagubaña: «Ruba nun, ruba nun».

Anihein gádürü katei makimuledaditi.

16 Umuahaü,

würi maraüheitu,

múa mábeiti

luma watu gemeti.

17 Ha íchugutiña mebereseni lau háguchi,

adüga hagía bula tau háguchu,

gadünatiña lun hachigini sanadi hagu luma lun héiginiña ágila.

18 Anihein gádürü katei wéiritu nanigi lau

ani úati gunfuranda nani.

19 Témeri ágila sielu,

témeri hewe luagu dübü,

témeri waporu baranaha

luma lémeri wügüri tuagu würi.

20 Anihán katei le tadügübei würi to gagabarahadiboun:

Teigin, taragachuni tiyuma,

lárigiñe tariñaga luagu madügün tan ni kata wuribati.

21 Añahein gádürü hawuyeri gürigia mawandúntiña,

adadagaragüda hamuti fulasu:

22 Idamuni le achülürüti arúeiha,

ibidiougua tau le ígiraguati éigini luma,

23 würi meberesenwaali tau to adarirutu túmari

tuma idamuni to árügüdüti tubara tabureme.

24 Añahein gádürü harahüñü animaalugu ubouagu

chuti hau sügǘ hau chu tau:

25 Haü, saraguhaña ani méretiña,

gama lumoun óundaragua hamuti heigin irumurugu;

26 másaraga, míbetiña animaalugu hagía

labadinagua dübü haganawa.

27 Chagagaru, lau sun marúeite hamá

úarati héibugun;

28 gúnrenren, ñǘbüritiña,

gayaraati lámurudawagun úhabu hau,

ani lau sun lira ñǘdüntiña chülǘ tidoun lani urúei palasiu.

29 Añahein gádürü ganigitiña,

hanarimeguti héibugun:

30 liñún, animaalu le hanarimetimabei,

le manufudebei ni ka uei;

31 ariran le barüguabei ungua,

gábara wügüri luma urúei le amarücharubei

habá habá lisudaranigu.

32 Anhein barüguaadibu lubéi bungua weiri, le libidiounigan bau,

ani aranseha buguya lagübüri aritaguni, saminabá

33 luagu anhein lan babadira míligi lasaliraguba lan bérume,

anhein bahincha bígirugu here, laseñeinhaba,

ánhabu agañidagüda gürigia lageindaguba buma.