1 Agúarahati lichú aau here,

aganbagüda lumuti lualin ichügü lumalali.

2 Ráramati iñu luagu burí wübü,

ráramaguati luagu burí legeyedun üma;

3 aganbaguagüdati lungua

luagu burí lubenari uburugu, lariñaga:

4 «Hun huguya gürigia

nariñagei dimurei burí le.

5 Irahüñü nibureingiña, lougua tisubudin,

furendei humá lubuidun ichügü, ani chula giñe hau!

6 Aganba humá, nariñaga katei súdiniti, le richati.

7 Inarüni le lunbei nariñaguni hun;

mínsiñeti nun lun nadimurehan iyeeni.

8 Sun nererun, richati;

úati ni murusun iyeeni lidan.

9 Houn ha gunfurandabaña, hama ha chúbaña aau,

furanguti sun nererun ani richá ligía.

10 Ibiha humá arufudahani luma subudi

lubaragiñe golu luma pülata».

11 Buítimati lichú aau sügǘ lau dübü buíduburiti;

buiti, sügǘ lau furumiñeguarügü katei le uámaawabei!

12 «Au, le lichú aau,

lidan aban naganawa luma lualin ichügü,

ani gadariraditina lun lubuidun-agei eweridihani.

13 Lichugún inebesei lun Bungiu,

kéisigubeirügü iyereehabúni lun wuribani.

Iyereeguti pantaü luma liñun anaaguni unguaü nun,

luma luriban üma, luma iyeeni.

14 Au aransehabei ladügǘn aban katei, au adügei;

au lubuidunbei ichügü luma erei.

15 Seremei au harúeihanbei urúeigu,

seremei giñe au híchugunbei gumadimatiña lúrudu richati.

16 Seremei au hagumadihanbei lábutigu fulasu,

aguseragüda hagía lúrudugu.

17 Ha hínsiñehabubaña nun, hínsiñetiña giñe nun;

darí hamutina ha áluahabalina.

18 Rútina irisini luma inebesei,

óunwenbu uéiriguni luma awanseruni.

19 Gebegitimati le níchugubei sügǘ lau golu fínuti;

le níchugubei, buítimati sügǘ lau pülata le fínutimabei.

20 Lídanñadina üma le surubei,

luéigiñeñadina émeri le richabei.

21 Ha hínsiñehabubaña nun, ru numuti hafanran houn,

buíngüda numutu haban lau irisini.

22 «Adüga lumutina Bungiu lidan lagumeseruni luadigimari,

lubaragiñe lagumeserun adügei sun katei.

23 Adüga lumutina lidan lagumeserun dan,

lubaragiñe ladügüni ubóu.

24 Anaheinhadina meha lubaragiñe ñein lan barana,

lubaragiñe ñein lan duna éibaaguati luma burí lísensen duna.

25 Lubaragiñebei lederebugudun wübü,

adüga láadina meha Bungiu;

26 madügüngubei lágili meha ubóu ni áraabu,

ni múa le aubei ladügei.

27 Danbei lederebudagüdünbalin sielu,

lóugiñe lidunari óunwenbu barana, ñéinñadina meha.

28 Ñéinñadina deregüdagu lóubagiñe

dan le líchugunbalin dúeri sielu,

derebugugüdalei lísensen barana,

29 dan le lariñagunbei lun lidunari barana

lun máfuridun lan lídangiñe leben,

dan le líchugunbalin lebu ubóu.

30 Au íchugubei ugundani lun sun dan ligía,

sun meha oura nadibirihaña liñuarü;

31 adibirihatina lidan ubóu le ladügübei,

gúndaatina meha hau sun gürigia!

32 «Guentoti, nisaanigu, aganba humana;

falá huméi nani hénpulu, buidu láamuga lidin hun.

33 Teni humá lun arufudahani,

mamahara humá lun lichú aau.

34 Fuleseiwatiña ha aganbubalina,

redei hagía óunigira lubadu tubenari nuban sagü weyu.

35 Ladüga ha adarirutina, darí hamaali ibagari,

gañei haméi lugundan Bungiu;

36 ánhañati ha adisedutiña nuéi,

híchuguñein habagari lidoun denchaü;

ha iyereehabútiña nun, hínsiñeti óunweni houn!»