1 Óunabagülei le buiti, gáluma lumuti igañi;

anhein óunabagülei le hanarimeti, iñuraguatimarügü lumuti.

2 Furiti lichú aau hayumulugugiñe ha chúbaña aau;

anhein hayumulugugiñe ibidiougua tau,

libidiounigan aau áfuridubei.

3 Anihein Bungiu lidan sun fulasu;

aríagu liña houn sun gürigia, buítiña hama wuribatiña.

4 Ítara liña dimurei hínsiñehabuti,

kei aban tídibu wewe to lánina ibagari;

anhein dimurei burí wuribati, adügati damichi lun sífiri.

5 Ha ibidiouguabaña aau, meberesentiña lau lererehan háguchi;

ánhaña ha atenirutiña lun lererehan háguchi,

arufuda hamuti lualin hachügü.

6 Anihein saragu katei buiti hábiñe gürigia ha buídubaña;

ánhaña ha salufuribaña, úati hu lan le hagañeirubei houn.

7 Ha chúbaña aau, arufudahatiña lichú aau;

ánhaña ha ibidiouguabaña aau, libidiounigan aau harufudahabei.

8 Iyereeguti hadewese salufuritiña lun Bungiu,

ánheinti hafurieidun ha richaguabaña,

resibi lumuti lau ugundani.

9 Iyereeguti hóuserun ha salufuribaña lun Bungiu;

gama lumoun hínsiñetiña ha abagaridubaña ibagari suruti lun.

10 Ha ígiruti üma le buídubei, hérebei habeichún;

ha iyereehabútiña lun ererehóuni, hóunweguba.

11 Anhein anihein lubéi óunweni luma umúahaü lábugiñe larihin Bungiu,

gúbutimame hasaminan gürigia!

12 Ha ibidiouguabaña aau,

mínsiñetiña ha ererehabaña houn houn;

máluahan lumutiña giñe ha chúbaña aau lun hádanbei lan.

13 Dan le gunda tan lanigi gürigia gúndaati ligibu,

dan le sandi tan lanigi, híruti ligibu.

14 Ha huálibaña ichügü, áluahatiña subudi;

ánhaña ha ibidiouguabaña aau, libidiounigan aau háluahabei.

15 Gürigia ha nidiheribaña, sun weyu houn wuribati;

ánhaña ha gúndaabaña, sun weyu houn kei fedu le súnwandanti.

16 Buítimati gudeme lan gürigia

ani ruti inebesei lun Bungiu,

sügǘ lau risi lan ani nidiheriti libagari.

17 Buítimati lun teigin fagudiya lau ínsiñehabuni,

sügǘ lau leigín wiñaadu lau iyereehabúni.

18 Gürigia ha gañi gáñibaña agubuhatiña wuribu;

ánhaña ha gaguraasunbaña, darangilagüda hamuti wuribu.

19 Buin liña üma lau hiiyu houn ha magúalibaña,

anhein houn gürigia ha surubaña, buiti üma.

20 Isaanigu ha chúbaña aau, gúndaaguagüda hamutiña hagübürigu;

ánhaña ha ibidiouguabaña aau, meberesentiña hau.

21 Ha wuribabaña isaminan,

hínsiñeguatiña houngua lidan libidiounigan aau;

ánhaña ha gachügübaña, suruti hémeri.

22 Dan le ua lan álügüdahani,

wuribati aransehani;

según hibe eweridihatiña labuidura aransehani.

23 Ma lubuidun dan le ladarirúniwa óunabagülei le richabei;

dan létima liabin lidan dan!

24 Iñun lárügüda üma lidoun ibagari,

ani sefu lumutiña ha chúbaña aau luéi houdin lidoun umúahaü.

25 Günringua lumutu Bungiu haban ha barüguabaña houngua;

gama lumoun areida lumutu haban würiña ha hilaguaaña hámari.

26 Magundanti Bungiu lau aransehani wuribati;

gama lumoun gúndaati lau dimurei le buídubei.

27 Ha áfaagubaña habihin irisini lau mabuiduni,

günringua hamutiña haduheñu;

anhein ha máhabaña lun mabuiduni, habagariduba.

28 Gürigia ha richaguabaña, samina hamuti kaba lan hóunaba;

ánhaña ha wuribabaña, wuribani hachüühabei hayumulugugiñe.

29 Díreiti Wabureme Bungiu hawéi ha wuribabaña,

gama lumoun aganba lumuti hafurieidun ha richaguabaña.

30 Gúndaaguagüda lumutu áhayachuni lanigi gürigia;

ruti uganu buiti iseri erei.

31 Ha adügütiña gasu lau ererehani le íchugubei ibagari,

gabarabei hadan ha chúbaña aau.

32 Ha máhabaña lun ererehóuni, mínsiñeguatiña houngua;

ha adügütiña gasu lau ererehóuni, ibihatiña gunfurandaü.

33 Arufudahati lichugún inebesei lun Bungiu,

lichú aau houn gürigia;

lun heresibirun gürigia inebesei,

gasu ǘnabugu lan hanaagun houngua furumiñe.