1 Anurahatiña ha salufuribaña íbini méibaahouniwa hamá,

ánhaña ha richaguabaña hemenigitiña kei aban liñún.

2 Dan le wuriba lan lidin katei fulasurugu,

aba haganwoundun gumadimatiña,

gama lumoun alidihatiña ha buídubaña

barǘ hamuti katei kei lubudubu.

3 Gürigia salufuritiña ha agüreweidubaliña gudemetiña,

ítara haña kei huya héreti le agünrinchagubalin alubahani.

4 Ha adireirubaña luéi lúrudu, hámagiñeñanu ha salufuribaña;

ánhaña ha agunfulirubalin, háganiñanu ha salufuribaña.

5 Úati gunfuranda hamani gürigia ha wuribabaña richaguaü,

ánhaña ha áluahabalin Bungiu, gunfuranda hamuti buidu.

6 Buítimati lun gudeme ban ani harumatibu

sügǘ lau lun risi ban ani wuribati bisaminan.

7 Ha agunfulirutiña lilurudun Bungiu,

isaanigu huali tichügü hagía,

ánhañati ha éibugutiña hama wéinamu teigin,

busiganu hagía houn hagübürigu.

8 Ha añoundagutiña irisini lau haguburahan luagu lafuredeirúniwa seinsu,

hañoundaguñein habá ha gudemehabubaña.

9 Ánhaña maha gürigia hadügün gasu lau lilurudun Bungiu,

maganbun lubéi giñe Bungiu hafurieidun.

10 Ha anügütiña gürigia buítiña lidoun üma wuribati,

hábürühaba tidoun guánarügü hasadaran;

ánhañati gürigia buítiña hibihubei le buídutimabei.

11 Ha rísibaña haritaguatiña luagu chu lan hau,

gama lumoun gunfuranda hamutiña ha gudemebaña ani huali ligía hachügü.

12 Dan hagañeirun ha richaguabaña, adügǘwati óunwenbu fedu,

dan hagañeirun ha wuribabaña aramudaguatiña gürigia.

13 Ha adouragutiña lau hafigoun, mídinbei houn buidu,

ánhaña ha agufeserútiña hafigoun, aba hígiruni,

feruduna lubaña Bungiu.

14 Fuleseiwatiña gürigia ha íchugubaña inebesei lun Bungiu súnwandan,

ánhañati ha derebaña anigi hábürühaba lidoun lamiselu.

15 Ítara haña gürigia salufuritiña ha agumadihabaña lidan aban fulasu gudemeti,

kei aban liñún o aban osu gáñiti.

16 Agumadihatiña ha lóuguabei gunfuranda hamá,

gánwoungüda hamuti lidere dan,

ánhañati ha mawamaahabúbaña migifebei habagari.

17 Ha áfarahaañabaña, mararamunbaña darí hábürühan lidoun umúahaü,

ua hamatia áfaagutiña hararamuniña!

18 Gürigia ha harumabaña hesefuruba,

ánhaña ha salufuribaña hábürühaba lidoun lamiselu.

19 Ha ábunagutiña hachari, ígiraguati éigini houn,

ánhañati ha éibugutiña hama magúalitiña, gudemei ígiragubei houn.

20 Gürigia ha hemenigiwati hawagu, ladimurehóuba buiti hawagu;

ánhaña ha afuudubaña luagu irisini, meredebaña mabeichúnga.

21 Mabuidunti lanügǘn aban gürigia ǘnabu luéi le aban;

gayaraati hafigouhan gürigia íbini tuagu murusun fein.

22 Ha igaaduabaña, afuresehatiña lun harisidun,

gama lumoun ibidiñeti houn luagu lábürühaba lan gudemei hawagun.

23 Luagu lílüwagu dan, hínsiñegutimati le gachurahadibei

sügǘ hau ha adimurehabaña lau abimehani.

24 Ítara haña ha íweruhatiña hawéi hagübürigu

ani hariñaga luagu mama lan wuribati,

kei hamadagu gáfarahatiña.

25 Ha igaaduabaña, ageindaguagüdatiña,

ánhañati ha hemenigibaña luagu Bungiu, hawanseruba.

26 Hárügüñanu ibidiougua tau emenigida luagu haritagun guánarügü,

ha adügütiña katei lau lichú aau, hawanseruba.

27 Ha íderagutiña gudemetiña, memegeirúnbaña ni kata;

ánhaña ha máhatiña híderaguniña, híñarawaguba saragu.

28 Dan hagañeirun salufuritiña, aramudaguatiña gürigia;

dan le hagumuchagun, aba hagibedagun richaguatiña.