1 Gürigia ha aritagubaña hawouguounrügü,

luágurügüñein katei le buídubei houn haritagua,

máhatiña giñe haganbun eweridihani buiti.

2 Ha ibidiouguabaña aau, mayumahantiña furendei

hetenirun lúnrügü hapantahan lau le hasubudirubei.

3 Luma wuribani liabin busiganu;

luma anaaguni unguaü liabin minebesei.

4 Ítara liña lererun gürigia kei duna huliliti,

duna éibaaguati kei fusu lánina lichú aau.

5 Mabuidunti lun fulesei hamaniña aguseragüdütiña ha gadurunbaña,

gidá hameime haricha ha madurunbaña.

6 Dáguatiña ibidiougua tau houngua lidoun wuribu lau hererun;

lau hererun áluahatiña abeichúni houngua.

7 Hererun guánarügü ibidiougua tau agadeirubaliña;

lau hererun güratiña gúrudu hagiina guánarügü.

8 Ítara liña marasualugu kei libimen-agei éigini,

gama lumoun chülüti lidoun lilulin agei.

9 Ha magúalibaña hama ha gagünrinchaguadibaña

ñǘbuintiña lun gamulenugua hamá!

10 Aban wáyelesi héreti liri Bungiu,

ñǘdüntiña ha richaguabaña aramudagua lidan.

11 Ha rísibaña, haritaguatiña luagu ítara liña lan harisin

kei aban uburugu le íñuti lubarieirun.

12 Lárigi anaaguni unguaü liabin féridi;

lárigi ǘnabuguni liabin awanseruni.

13 Libidiounigan aau ani nibusigarídünati giñe

hóunabun gürigia lubaragiñe haganbun.

14 Ha sándibaña saragüda hamuti haguraasun;

ánhañati ha maguraasunbaña, kaba ásaaragüdaña?

15 Ha chúbaña aau hama ha huálibaña ichügü

darí hamuti subudi le háluahabei.

16 Lau aban edewehani darati sun bena,

ani chülüwati hamoun gürigia íñugubutiña.

17 Ha furumiñetiña abuyeihatiña haweigiñegua henege garichatiña

darí hachülürün háganiñu ariñaga luagu maricha hamá.

18 Gumuguagüda lumuti laguseragüdün Bungiu wuribu,

fánreingualaña ha ageindagubaña hámagua.

19 Íderaguabei bíbiri ábame lágüdahanibu

keisi aban uburugu le derebuguti lubarieirun,

gama lumoun ánhabu awuribuha luma,

ladourubei lubenari buéi.

20 Kada aban léigibei lin lererun

darí labuchadun luagu.

21 Gayaraati besefurun o bagünrinchagun aban ibagari lau le bariñagubei,

buidulá lubeiti bayusuruni bererun, ábame beresibiruni bafayeiruaha.

22 Hagamaridun gürigia,

kéigubeirügü hadariruni lubuidun-agei katei;

arufuda lumuti lira luagu buidu lan Bungiu hama gürigia.

23 Gürigia gudemetiña lau ayumuraguni hadimureha;

ánhañati rísitiña lau anarimeni hóunaba.

24 Anihein umadaguaü ménrengunti lagünrinchagun,

gama lumoun añahein giñe umadagu úaraguatiña sügǘ lau íbiri.