1 Nisaanigu, teni humá lun le harufudahabei hagübürigu hun,

ru humá arigei lun, ibiha humaamuga gunfurandaü.

2 Buiti sun le narufudahabei hun,

mabulieida huméi lubeiti nilurudun.

3 Isaani meha giñe au,

wéiriti meha nínsiñe tun núguchu,

4 arufudahati meha núguchi nun, lariñaga nun:

«Haritaguabá luagu le nariñagubei bun súnwandan,

adügabéi le nubeibei bun, ábame babagaridun.

5 Ibihabá lichú aau luma lubuidun ichügü,

mabulieidabei le nubeibei bun.

6 Hínsiñela lichú aau bun,

mabulieidabei, ábame lóunigirunibu.

7 Lubaragiñe furumiñeguarügü katei,

ibihabá lichú aau luma lubuidun ichügü.

8 Hínsiñela bun, ábame liñuragunibu;

Hóuburabei, ábame líchugun inebesei bun;

9 ábanbei uéndeni lichú aau lun bichügü,

ítara luba kei aban ridi bábulugu!»

10 Tenibá lun nererun, niráü;

gamabéi, ábame líchugun lanwoun birumudiri.

11 Nanügübadibu luéigiñe lémeri lichú aau;

néibugagüdübadibu lidan üma buiti,

12 le ñein lubéi úabei lan ni kata lun ladarasarunibu,

le ñein lubéi machugeragunbadibu lan ni ánhabu éibaagua.

13 Ragüba luagu arufudahani, mabulieidaguabá luéi;

areidabei, ladüga ligía lan bibagaribei.

14 Mafalarabaña ha salufuribaña,

mafalarabéi luriban hóuserun.

15 Másügüraba lídangiñe hémeri,

díreiba hawéi ani bubaruaguounbá,

16 ladüga hagía, mederaaguagüdüntiña ánhaña madügün wuribani;

marumuguntiña ánhaña mañawarihan lun aban gürigia.

17 Hóutiña fein lánina wuribani,

gurá hagía diwéin lánina anarimeni!

18 Ítara liña hémeri ha harumabaña

kei lagumeserun larugadun,

arugoungadeinatima murusun murusun

darí lun larugoungadun sunsuinagubei.

19 Ánheinti hémeri ha salufuribaña, búrigati;

ibidiñeti houn ni ka lan uagu hachugeragua.

20 Tenibá lun nererun, niráü,

ruba arigei lun.

21 Magidarabéi barihin luéi,

bürübei tidan banigi.

22 Ruti ibagari luma átuadi

houn sun ha adarirubalin.

23 Lídangiñe sun katei ubouagu,

góunigiboun banigi,

ladüga tídangiñe liabin ibagari.

24 Mariñagabá le mámagu ligía,

díreiba luéi iyeeni.

25 Bubaruaguounlá bariha súnwandan

mágurabei barihin múarugun lau busiganu.

26 Arihabá buidu halía lan bíchigei bugudi,

ítara luba bararamun buidu súnwandan.

27 Madireirabá luéi bémeri;

méibugaba lidan lagübüri üma.