1 Ibidiouguagüdatu diwéin hau gürigia;

chagaguagüda lumutiña uniñein héreti;

úatiña bacharuatiña adügüti katei lau lichú aau.

2 Ítara liña aban urúei dan le gañi lan kei aban liñún,

ha añawarihatiña lun, híchuguñein habagari lidoun denchaü.

3 Hanebese gürigia lámalihoun sigenei,

ánhañati ibidiougua tau, hagía agumeserubalin.

4 Lidan lidaani awouhani, mawouhantiña ha magúalibaña;

dánmeti lidaani alubahani,

háluahaba gama lumoun madaribaña.

5 Ítara liña saminaü aramudaguati kei duna huliliti;

gama lumoun ha huálibaña ichügü, gadariraditiña lun.

6 Añahein saragu ariñagutiña luagu úaragua hamá

gama lumoun madarirúnti ni aban le gayaraati lafiñerúniwa luagu.

7 Fuleseiwatiña isaanigu ha lígirubaña úguchili

le abagaridubei lidan arumani luma ísuruni.

8 Dan le lañuurun urúei tidan lúbaanina aguseruni,

buídurügüti larihin lun labuiduni wuribani.

9 Úati ni aban gayaraati lariñagun:

«Harumatu nanigi, mafigountina».

10 Magundanti Bungiu lau balansu

luma amisuraagülei le múaranti.

11 Luagu ligaburi hóuserun nibureintiña

lasubudirúa anhein lídanñanu lubéi ísuruni.

12 Arigeirugu lun aganbuni luma aguu lun arihini,

Bungiu adügübalin lira.

13 Mederegeraguabá bungua lun lidabu aguu,

ladüga bagudemeduba;

agaguduañubá, ítara luba geigin ban saragu.

14 «Luriban ebegidinaü mau!»

Liña hariñagun ha agañeihabaña,

gama lumoun lárigiñe hagañeihan ma hagundan.

15 Gebegitimatiña ha adimurehabaña lau lichú aau

sügǘ lau sun golu luma uéndeni le ubouagubei.

16 Ha íchaagutiña houngua lun hafayeiruni hadúeihan terencha,

gidawatá hadaüragun hawéi darí hafayeiruni dúeiti.

17 Hínsiñeti houn gürigia lun heigin iyeeni,

íbini lílüwagu lan aba hasandirun kamá héigiña múa.

18 Derebugugüdawati aransehani lau aban eweridihani buiti;

lau afansehani buiti ladügǘwa wuribu.

19 Ha marasualugubaña, mámanichuntiña lau katei aramudaguati,

móundaraguaba lubeiti hama marasualugutiña.

20 Ha íñaragutiña háguchi o háguchu,

hóunweguba lidan lanarime luburiga.

21 Irisini le ménrengubei libihíniwa,

manügünti buiti houn gürigia.

22 Maritaguabá lun báguyugüdün wuribani luagu wuribani,

lubaragiñe lira afiñebá luagu Bungiu, ábame lagañeiragüdünibu.

23 Magundanti Bungiu lau balansu

luma amisuraagülei le múaranti.

24 Bungiu adundehabalin wéibugun,

ida lubati wasubudiruni wasinun guánarügü?

25 Mabuidunti füramase lan gürigia lun Bungiu,

ani ñéingiñe aba lasakürihan luagu le füramase láalibei.

26 Urúei le chubei aau, dísegüda lumutiña wuribatiña luáriua,

aba laburechaguniña lábugiñe aban ubalabalaü.

27 Ítara liña Sífiri le líchugubei Bungiu houn gürigia,

kei igemeri lun larugoungadagüdüni habagari.

28 Chóuruguati urúei lungua luagu lálana larúeihan

dan le labagaridun lau ínsiñehabuni luma inarüni.

29 Here nibureingiña hapantagülebei;

hagaruban wéiyaaña mutu henebesebei.

30 Abeichúni luma igarigu láranibei wuribani;

areidaguagüda lumutu buleseiti wanigi.