1 Ítara tiña lanigi urúei lúhaburugu Bungiu kei lémeri duna,

ñǘdünti le ñéingiñe lubéi labusenrei Bungiu.

2 Lidan haritagun gürigia, buiti sun le hadügübei,

gama lumoun Bungiu aguseragüdübalin saminaü.

3 Abagaridabá lidan ísuruni luma lidan richaguaü,

ladüga hínsiñetimati lira lun Bungiu sügǘ lau adagaragüdüni.

4 Agu íñuguti lanaagun lungua, saminaü pántati;

figóu hagemeribei ha salufuribaña.

5 Aransehani le saminawati buidu, buiti lasalirun,

anhein le adügǘbei lau furesei, barüti günringuaü.

6 Irisini le ibihúbei lau iyeeni,

katei gásügürati lira ani hani ha áluahabalin óunweni.

7 Ha salufuribaña lagünrinchagubaña hariban guánarügü,

ladüga hamahan habagaridun lidan richaguaü.

8 Gürigia ha wuribabaña igaburi,

segeti ani machourunti giñe hémeri;

ánheinti hóuserun gürigia ha úaraguabaña harumati.

9 Buítimati laganóuniwa tarigeirugu muna,

sügǘ lau tidan muna wéiritu

tuma aban würi to ganigitu wuribu.

10 Gürigia ha salufuribaña hadügünrügüñein wuribani hasaminara;

marihin hamutiña hábegunu lau areini.

11 Furendeitiña ha mabuidunbaña ichügü

lídangiñe habeichún ha ibidiouguabaña aau;

ha chúbaña aau, furendeitiña láurügü lafuranguagüdüniwa katei.

12 Aríagua lumutu Bungiu haban gürigia ha salufuribaña,

ani derege lumutiña ha wuribabaña lun günringuaü.

13 Ha máhabaña haganbuni hayumuragun gudemetiña,

maganbúnbaña giñe danme le hamuriahan ídemuei.

14 Edewehani le adügǘti maniñu,

gáluma lumuti íbini igañi le héreti.

15 Dan le ladügǘn irichaü, gúndaatiña ha richaguabaña,

ábati liabin günringuaü hawagun ha salufuribaña.

16 Ha mafalatiña aban igaburi buiti,

hóudiba adagara hadoun hilaaña.

17 Ha ederegeragutiña houngua lun lagübüri ugundani,

kei burí diwéin luma ibiñein,

lídanba gudemei hagumucha.

18 Gürigia ha yéebaña, salufuri hagía,

hasufuriruba heweñegua ha harumabaña ani richagua.

19 Buítimati laganóuniwa lidan fulasu mageirawati

sügǘ lau tuma aban würi to ganigitu wuribu.

20 Hábiñe ha chúbaña aau, anihein irisini luma ibiñein

ánhañati ibidiougua tau, wesi hamuti sun le hámabei.

21 Ha óuchubaña lun úaragua hamá,

daritiña ibagari luma uéiriguni.

22 Ageindaguatiña ha chúbaña aau luma aban uburugu le góunigiwati buidu,

ani gumuguagüda hamuti ubafu le buga uágubei lemenigida uburugu ligía.

23 Anhein mabusenrun bubéi gadan lánibu wuribani,

góunigibei dimurei le lunbei bariñaguni.

24 Barügua tungua, pántatiña, íñugutiña

ítara liña laguarúniwa houn gürigia ha barüguabaña ungua.

25 Hilatiña magúalitiña lau ayumahani,

ladüga máhatiña hawadigimaridun;

26 sun weyu hau ayumaha.

Ánhañati ha richaguabaña, mángitiña.

27 Magundanti Bungiu lau hadewese salufuritiña,

ladüga lau luriban aritaguni híchigei.

28 Hagünrinchawaguba gefentiña ha yéebaña;

ánhañati ha gaganbadibaña súnwandan gayaraabei lan hóunabun.

29 Ha salufuribaña, aba hafamurun kei chóuruguatiña houngua;

ha harumabaña chóuruguatiña houngua luagu lubuidun hóuserun.

30 Úati lichú aau gebegiti ligibugiñe Bungiu,

ni lualin ichügü ni saminaü buiti.

31 Aranse lumuti gürigia gabayu lubá lebelurun wuriburugun,

gama lumoun Bungiu íchugubalin agañeiruni.