YOHANA 9

Yesu angumuponentsa munu chibofu.

1 Siku yimwe Yesu hoavaga anlutila akamuwonaje munu yumwe, chibofu kuhuma kuleleka kwake. 2 Ihyo Vadahitswa vake vakamuputsaje, "Mudahitsi! Nani yoadisile ndongwa ntsibi, munu yuno awu valeli vake, mbaka aleleche chibofu?" 3 Yesu akavajibulaje, "Munu yuno na valeli vake sivadisile ndongwa ntsibi, ila lulongwa ulu luhumye ili wuvetso wa Mulungu wuwoneche mugati mwake. 4 Tun’ganika tukole katsi tsake mwene yo anumile kung’acha hamunyi, kwakuva chilo chinkutsa kuduhu munu yoakuvetsa kukola katsi yoyive. 5 Luvala lontsili mu inyi, heni yo mwang’atsa gwa vanu va mu inyi." 6 Avaga kulonga itso, akafunyaje mati hanyi, akafinyangaje lilongo, akamubakaje yula chipofu mumiho, 7 Kaha amulonjelaje, "Bite ukakalave mulikwava lya Siloamu." Chinya kutijila, yo atumilwe. Duve yula chibofu akabitaje kukalava, nayo akawuyaje kuno an’lola. 8 Vanu va habehi na mwene wovavaga vamutsele iho hamutalo vakalongaje kuta avaga mugayu na mususi, vakiputsaje, "Mbe! Uyu siyula mugayu yoikalaga na kusuka?" 9 Vamwinga vakalongaje, "Yo mwene." Vamwinga vakalongaje, "Ndaya simwene ila ihwana nayo." Lechelelo yula yoali chipofu akalongaje, "Yo heni baha." 10 Ihyo vakavaje vangumuputsa, "Lelo miho gako gadisilwe ndawuli mbaka ulole?" 11 Nayo akavapitulaje, "Yula munu yo anchemwa Yesu adisile lidope, akambakaje mumiho nakundonjela, bite ukakalave ku litsimbwi lya Siloamu. Iho heni hongabitaje kukalava, ho iho ngantsaje kulola." 12 Vakamuputsaje kaha, "Mwene munu uyo alikwiya?" Nayo akavapitulaje, "Heni sinambe ntsele koali."