1 Mmeni pee abɔ mmɔden kyɛ bɛkɔhworɔ nahorɛ bɔ yalɛ́ yato nu ne, 2 kyɛbɔ ofi ahyɛaseɛ ne, bɛ bɔ bɛfale bɛ nye bɛnwuni bɔ ɔhɔle so, ɔne bɛ bɔ né bɛte edwirɛ nanwo asomvoɛ ne fa mane yɛ ne. 3 Yeti, Onuoyamfoɛ Teofilus, me koso, sɔ ala yeɛ mayɛ m’adwene ɔ. Na mato me bo ase maneɛnea nikye biala nu pɛpɛɛpɛ fi ahyɛaseɛ, kyɛbɔ ɔkɔyɛ a, ngɔhworɔ edwirɛ ne nnidisoɛ-nnidisoɛ ngɔberɛ wɔ, 4 ná wamaa anwu nahorɛ bɔ ɔwɔ edwirɛ bɔ baha bahyire wɔ namukoraati nu.

5 Yudea hene Herode ngyẽa nanu ne, né sɔfo bie wɔ berɛ bɔ bɛfrɛ ye Zakaria. Né ɔboka sɔfo kue bɔ bɛfrɛ ye Abia naso. Né ɔye te Aaron mmaa nanu kõ, na ne bɛfrɛ ye Elizabɛt. 6 Bɛ munyɔ namukoraati, né bɛtengyɛ wɔ Nyameɛ nyunu, na Awurade mmeraa ne ye ahyɛdeɛ koso, né bɛdi ye mukoraati so pɛpɛɛpɛ bɔ edwirɛ biala nne bɛ nwo. 7 Nakoso né bɛlle baa biala, ofikyɛ ne Elizabɛt ngora wo, na bɛ munyɔ namu, né banyi paa.

8 Mmerɛ bɔ odwuli ye sɔfo kue naso ne, né ɔyɛ ye sɔfo adwuma wɔ Nyameɛ nyunu. 9 Na kyɛbɔ asɔfodie nwo nhyehyɛɛ ne te ne, ye yeɛ ne wadwu ye so kyɛ ɔkɔ Awurade nekaa krongron berɛ kɔyera insɛns ɔ. 10 Na mmerɛ bɔ ɔyera insɛns ne, né mmeni lɔen namukoraati wɔ aluo dɔ bɛbɔ mbaeɛ. 11 Na Awurade abɔfo yele ye nwo ali hyirele ye, né abɔfo ne gyi afɔleɛ bokyea bɔ bɛyera insɛns wɔ so ne famaa so. 12 Mmerɛ bɔ Zakaria nwuni ye ne, ye kunu tele ye, na esuronyi hane ye.

13 Nakoso abɔfo ne ha hyirele ye kyɛ: "Zakaria, nnɛsuro! Nyameɛ ate wɔ mbaeɛ ne, na ɛye Elizabɛt kɔwo baa brienzua, na odikyɛ ɛto ye dumaa Yohane. 14 Wɔ nye kɔgye, na ɛkoli ahurusi, na ye aworɛ ne kɔmaa mmeni pee koli ahurusi, 15 ofikyɛ ɔkɔyɛ sona titire wɔ Awurade nye so. Nakoso nnɛmaa ɔno nzãa bɔ enu yɛ se anaa nzãa bɔ ɔbo biala. Na honhom krongron kɔwa ye so, mmerɛ po bɔ owura ye maame kunu ne. 16 Na ɔkɔmaa Israel mmaa nanu pee kosa kɔwa Awurade, bɛ Nyameɛ ne berɛ. 17 Na ɔkɔfa Elia honhom ne ye tumi koli Nyameɛ nyunu, na wakakyi baba mɔ ahone wawa bɛ mmaa mɔ nwo, ná asoserɛfoɛ awa teneneefoɛ nyanza nwo, kyɛbɔ ɔkɔyɛ a, okosiesie mmenia bie kɔma Awurade."

18 Yeɛ Zakaria bisale abɔfo ne kyɛ: "Ɔkɔyɛ sɛɛ né malɛ ɛhe mali? Ofikyɛ mayɛ aworowaa, na me ye koso anyi paa." 19 Na abɔfo ne ha hyirele ye kyɛ: "Me yeɛ nne Gabriel bɔ ogyi Nyameɛ nyunu ne, na basoma me kyɛ mene wɔ dwudwo, na nga edwirɛ pa he ngyire wɔ. 20 Na ɔnate kyɛ anne me dwirɛ bɔ ɔkɔwa nu wɔ ye mmerɛ nu ne anni nati, wɔ noa komua, na ɛngɔhora dwudwo tonn kodwu kyẽa bɔ ɛhemɔ mukoraati kɔwa nu ɔ."

21 Sɔ mmerɛ namukoraati, ne mmenia ne nwondɛ Zakaria, na ne ɔyɛ bɛ nwanwa kyɛ wahyɛ krongron nu krongron berɛ sɔ ne. 22 Mmerɛ bɔ ofitele ne, wangora dwudwo kyire bɛ, na bɛnwuni ye kyɛ, wanwu nikye bie wɔ nekaa krongron berɛ. Ɔfale ye sa yɛle nzɛngyerɛneɛ hyirele bɛ, nakoso wangora dwudwo. 23 Ngyẽa bɔ ɔfa yɛ ye adwuma krongron ne wale awieɛ ne, ɔhɔle ye awuro.

24 Ngyẽa biemɔ si ne, ɔye Elizabɛt nwonzɛle, ɔfale ye nwo siele bosome nzia, na ɔhane kyɛ: 25 "Bɔ Awurade ayɛ ama me wɔ sɔ ngyẽa he anu ɛne. Wafa ye adwene wawa me so, na waye m’animguaseɛ wafi berɛ."

26 Ye bosome nzia nanu ne, Nyameɛ somane abɔfo Gabriel hɔle Galilea kuro bie bɔ bɛfrɛ ye Nazerɛt nu, 27 ɔsomane ye wɔ ababunu bie berɛ. Né bahyɛ Yosef bɔ ofi David abusua nu ne bɔ kyɛ, bɛkɔmaa okogya sɔ ababunu ne, né ababunu ne dumaa li Mary. 28 Abɔfo ne wurale awuro berɛ ne, ɔha hyirele ye kyɛ: "Wɔ bɔ balo wɔ, mekyea wɔ, Awurade boka wɔ so." 29 Nakoso abɔfo ne dwirɛ ne maa ɔyɛle basaa, na ne ɔpena kyɛ onwu bɔ sɔ ngyeaa ne kyire ɔ. 30 Yeti abɔfo ne ha hyirele ye kyɛ: "Mary, nnɛsuro, ofikyɛ Nyameɛ alo wɔ. 31 Nea, ɛkɔnwonzɛ kɔwo baa brienzua, na odikyɛ ɛto ye dumaa Yesu. 32 Ɔkɔyɛ sona titire, na bɛkɔfrɛ ye Anwuro-Anwuroniɛ né awa. Na Awurade Nyameɛ kɔfa ye baba David bia* kɔma ye, 33 na okoli Yakob awuro so Hene afebɔɔ, na ye ahennie ne ngɔwa awieɛ."

34 Nakoso Mary bisale abɔfo ne kyɛ: "Mene brienzua lalle lle, ye de ɔkɔyɛ sɛɛ ne ɛhe ayɛ yé?" 35 Yeɛ abɔfo ne yele ye noa kyɛ: "Honhom krongron kɔwa wɔ so, na Anwuro-Anwuroniɛ ne tumi kɔbutu wɔ so. Ɛhene ati, bɔ ɛkɔwo ye ne, bɛkɔfrɛ ye krongron, Nyameɛ Awa. 36 Na tie, w’abusuaniɛ Elizabɛt bɔ wayɛ aworowaa ne, wanwonzɛ; ye bɔ ne bɛnwa ɔte bonini ne, ɔnwonzɛle ne, bosome nzia ɛhe; 37 ofikyɛ Nyameɛ de, nikye biala nne berɛ bɔ ɔngora ye yɛ ɔ." 38 Yeɛ Mary hane kyɛ: "Nea, nde Awurade abaawa! Ɔyɛ berɛ ma me, kyɛbɔ wɔ dwirɛ ne te ne." Na abɔfo ne fili berɛ hɔle.

39 Yeti sɔ ngyẽa nanu ne, Mary sili nu, na ɔyɛle ndɛ hɔle maen bɔ ɔwɔ mmokaa so nanu, ɔhɔle Yuda, 40 na ɔhɔle Zakaria awuro, yeɛ ɔhyeale Elizabɛt. 41 Mmerɛ bɔ Elizabɛt tele Mary ngyeaa ne, akwalaa bɔ owura ye kunu ne huruli, na honhom krongron wale Elizabɛt so, 42 na ɔteane nu kyɛ: "Bahyira wɔ batra mmrasua mukoraati, na bahyira akwalaa bɔ owura wɔ kunu ne! 43 Ɔwale ye sɛɛ yeɛ manya ye nwo atee kandinga sɔa, kyɛ me Wura maame baanea me boso ne? 44 Ofikyɛ ndele wɔ ngyeaa nala pɛ, akwalaa bɔ owura me kunu ne fale anigye huruli. 45 Na anigye yeɛ ole brasua bɔ ole gyidie kyɛ, edwirɛ bɔ Awurade amaa baha bahyire ye namukoraati kɔwa nu ne."

46 Yeɛ Mary hane kyɛ:

"Me kra, kamvo Awurade

47 na me honhom di ahurusi wɔ m’Agyenkwa Nyameɛ nwo,

48 ofikyɛ, wapɛ ye nye waanea ye afaneɛ bɔ ɔtte sona bie ne.

Nea, ofi ɛnɛ bɔ ɔkɔ ne, mmenia* mukoraati kɔha kyɛ nne anigye,

49 ofikyɛ, Otumvoɛ ne ayɛ nikye piri paa ama me,

na krongron yeɛ ole ye dumaa.

50 Na ofi aworɛ ndoɔtoasoɛ so bɔ ɔkɔ aworɛ ndoɔtoasoɛ so ne,

bɛ bɔ bɛsuro ye ne yeɛ onwu bɛ anwunvo ɔ.

51 Wafa ye sa wayɛ nningyein mbiri-mbiri;

bɛ bɔ bɛte dwɛɛ wɔ b’ahone nu ne,

wabɔ bɛ wapete.

52 Watu atumvoɛ wafi bɛ bia so,

na wama bɛ bɔ bɛyɛ anwunvo naso;

53 bɛ bɔ ɛhɔen ku bɛ ne, wama bɛ nningyein pa maa bɛ ko ayi,

na wamaa asikafoɛ afa bɛ sa nzaa-nzaa ahɔ.

54 Waaboka ye akoaa Israel,

na wakaye ye anwunvoin ne,

55 kyɛbɔ ɔhane ye nwo dwirɛ hyirele yɛ nana mɔ,

kyɛ okonwu Abraham ne ye bosofoɛ anwunvoin daa ne."

56 Mary lili kɔyɛ bosome nza wɔ Elizabɛt nwo berɛ, na yesi ne, ɔhɔle ye awuro.

57 Elizabɛt aworɛ dwuli, na ɔwole baa brienzua. 58 Na ye mandanu berɛfoɛ ne ye abusuafoɛ tele kyɛ Awurade anwu ye anwunvo paa, na bɛne ye lili ahurusi. 59 Kyẽa bɔ ɔtɔ so mmɔtwɛ ne, bɛwale kyɛ bɛbaapɛ akwalaa ne toa. Na ne bɛpena kyɛ bɛfa ye bɛto ye baba Zakaria, 60 nakoso ye maame ha hyirele bɛ kyɛ: "Daabi! Bɛkɔfrɛ ye Yohane."

61 Yeɛ bɛ koso bɛha bɛhyirele ye kyɛ: "W’abusuaniɛ biala nne berɛ bɔ oli sɔ ɔ." 62 Yeti, bɛyɛle nzɛngyerɛneɛ bɛbisale ye baba dumaa bɔ ɔpena kyɛ bɛfa bɛto akwalaa ne. 63 Na ɔhane kyɛ bɛma ye nikye bɔ bɛtworɔ so, na ɔhworɔle kyɛ: "Ye dumaa li Yohane." Na ɔyɛle bɛ mukoraati nwanwa. 64 Na ɛberɛ ala ye noa ne bukyele, na ye temverema ne sangyele maa odwudwole, na ɔyele Nyameɛ ayɛ.

65 Na esuronyi tɔle bɛ bɔ bɛwɔ mandanu berɛ namukoraati so, na bɛhane ɛhe anwo dwirɛ wɔ Yudea nguro bɔ ɔwɔ mmokaa naso namukoraati nu. 66 Na bɛ bɔ bɛtele namukoraati bisale bɛ nwo kyɛ: "Nzu po yeɛ akwalaa he kɔyɛ ye kyẽabie ɔ?" Ofikyɛ né nikye biala kyire kyɛ Awurade sa wɔ ye so.

67 Na honhom krongron wale ye baba Zakaria so, na ɔhyɛle ngɔm kyɛ:

68 "Ayɛyie ha Awurade, Israel Nyameɛ ne,

ofikyɛ wapɛ ye nye waanea ye mmenia, na walɛ bɛ.

69 Wama awɛen bɔ odɛ́ ngoa so

wɔ ye akoaa David awuro wama yɛ,

70 kyɛbɔ ɔnate ye adiifoɛ krongron

bɔ bɛtenane ase tete naso hane ye kyɛ,

71 okole yɛ kofi y’atamfo

ɔne bɛ bɔ bɛtane yɛ namukoraati sa nu,

72 na wanwu yɛ baba mɔ anwunvoin,

na wakaye ye apam krongron ne,

73 ndaen bɔ ɔtale yɛ baba Abraham

kyɛ 74 sɛ odɛ́ yɛ fi y’atamfo mɔ sa nu yie a,

yekonya atee yɛkɔsõ ye bɔ yɛngɔsuro,

75 na yɛkɔsõ ye wɔ nahorɛ ne tenenee nu wɔ ye nyunu daa.

76 Na wɔ akwalaa he, bɛkɔfrɛ wɔ Anwuro-Anwuroniɛ ne diifoɛ

ofikyɛ ɛkoli Awurade nyunu koosiesie ye atee,

77 na amaa ye mmenia anya nimdeɛ kyɛ,

ɔkɔfa bɛ bɔne kɔhyɛ bɛ, na walɛ bɛ ngoa,

78 ɔnate yɛ Nyameɛ anwunvoin ti.

Sɔ anwunvoin he ati, eyia fi anwuro afite yɛ so,

79 na wamaa bɛ bɔ bɛte awosii nu, ɔne nekaa bɔ ewue wawoɛ la né anya kanea,

na wali yɛ nyunu wahɔ asomdwie atee so."

80 Na akwalaa ne nyini, na ɔyɛle se wɔ honhom nu; na ɔtenane ɛserɛ so tonn oodwuli mmerɛ bɔ ɔyele ye nwo ali pefee hyirele Israel ne.