1 Ɛlɛho bie, né Yesu wɔ nekaa bie ɔbɔ mbaeɛ, oyiele ne, ye asuafoɛ nanu kõ ha hyirele ye kyɛ: "Awurade, kyire yɛ kyɛbɔ bɛbɔ mbaeɛ, kyɛbɔ Yohane hyirele ye asuafoɛ nemɔ ne." 2 Yeɛ Yesu ha hyirele bɛ kyɛ, "Ɛmɔbɔ mbaeɛ a, ɛmɔha kyɛ:

‘Baba, wɔ dumaa nwo te,

W’Ahennie bra.

3 Ma yɛ aleɛ bɔ yɛkoli ye daa biala.

4 Na fa yɛ bɔne kyɛ yɛ,

ofikyɛ yɛ koso yafa ebiala bɔ wayɛ yɛ bɔne ne deɛ yahyɛ ye.

Afei, nnɛfa yɛ kɔ nzɔhwɛ nu.’"

5 Yeɛ ɔha hyirele bɛ kyɛ: "Yɛfa ye kyɛ ɛmɔ nu bie hɔle ye damvo berɛ kɔngɔen tumm, yeɛ ɔha hyirele ye kyɛ, ‘Me damvo, mesrɛ wɔ ma me paanoo nza, 6 ofikyɛ me damvo bie fi akwanduo nu awa, ná nnne hwee bɔ ngɔfa ngɔma ye ɔ.’ 7 Yeɛ ebia ye damvo ne ha hyirele ye wɔ sua nanu dɔ kyɛ, ‘Nnɛha me! Yato anoa nanu dada, na me ne me mmaa mɔ ala. Mengɔhora dwɔso né maama wɔ hwee.’ 8 Meka mekyire ɛmɔ kyɛ, sɛ ɔhale kyɛ ɔte ye damvo mbaen a, ahaa ɔngɔtɛ ye so, nakoso ɔnate kyɛ ɔhɔle so hale ye adwene nati, ɔdwɔso fale bɔ ohia ne mane ye.

9 "Yeti meka mekyire ɛmɔ kyɛ, ɛmɔhɔ so bɛ bisa, na bɛkɔfa bɛkɔma ɛmɔ; ɛmɔhɔ so bɛpena, na ɛmɔ konwu ye; na ɛmɔhɔ so bɛbɔnu, na bɛkɔbukye ɛmɔ. 10 Ofikyɛ ebiala bɔ ɔkɔso bisa ne, ye sa ka ye, na ebiala bɔ ɔkɔso pena ne, onwu ye, na ebiala bɔ ɔkɔso bɔnu ne, bɛbukye ye. 11 Ɛmɔ nu nwa yeɛ ɔte baba, na sɛ ɔwa brienzua srɛ ye egyein a, ɔkɔfa ɛwoo kɔma ye, ná ɔngɔma ye egyein ɔ; 12 anaa ɔsrɛ ye kyiremvua a, ɔkɔma ye anyanyangyeleɛ ɔ? 13 Ɛmɔ bɔ ɛmɔte abɔnefoɛ ne po, sɛ ɛmɔse kyɛ odikyɛ ɛmɔfa nikye pa bɛma ɛmɔ mmaa mɔ a, ye de nea kyɛbɔ ɛmɔ Baba bɔ ɔwɔ anwuro ne kɔfa ye honhom krongron kɔma bɛ bɔ bɛbisa ye ne ɔ."

14 Ɛlɛho bie, né Yesu tu sunzummɔne bie bɔ ɔte ɛmumu. Sunzum ne fili ye nu nala pɛ, ɛmumu ne dwudwole maa ɔyɛle mmenia namukoraati nwanwa. 15 Nakoso bɛ nu biemɔ hane kyɛ: "Ɔnate sunzummɔne panyi bɔ bɛfrɛ ye Beelsebul naso yeɛ otu sunzummɔne ɔ." 16 Né ebiemɔ koso pena kyɛ bɛsɔ ye bɛnea, yeti bɛhane kyɛ ɔyɛ nzɛngyerɛneɛ bɔ ofi anwuro ma bɛnea. 17 Ne Yesu se adwene bɔ ɔwɔ bɛ ti anu, yeti ɔha hyirele bɛ kyɛ: "Ahennie biala bɔ ɔkõ tia ye nwo ne, okogu, na awuro biala bɔ ɔkõ tia ye nwo ne, ɔkɔbɔ. 18 Sɛ Satan kõ tia ye nwo a, ɔkɔyɛ sɛɛ ne ye ahennie ne agyina? Nnaa ɛmɔnwa nnate Beelsebul so yeɛ metu sunzummɔne ɔ. 19 Sɛ Beelsebul tumi yeɛ mefa metu sunzummɔne a, ye de tumi beni yeɛ ɛmɔ mmaa nemɔ fa tu bɛ ɔ? Ɛhe ati yeɛ bɛkobu ɛmɔ atɛn ne. 20 Nakoso sɛ nnate Nyameɛ sa so yeɛ metu sunzummɔne a, ye de, Nyameɛ Ahennie ne asã ɛmɔ nwo.

21 "Sɛ ebie bɔ ole anwoserɛ, na ole akodeɛ ɔbɔ ye awuro nwo waen a, ye agyapadeɛ ne kõ po ngomini. 22 Nakoso sɛ ebie bɔ ole anwoserɛ tra ye ba ye so, na odi ye so ngunim a, ɔkɔfa ye akodeɛ bɔ wafa ye nwo wato so ne, na ɔne ebiemɔ kɔhyɛ nningyein bɔ onya fili ye berɛ ne. 23 Ebiala bɔ ɔbboka me so ne, ɔdwɔso tia me, na ebiala bɔ ɔne me mmoaboa ye noa ne, ɔbɔ sande.

24 "Sɛ sunzummɔne fi ebie nu a, okyini ɛtii so pena nekaa bɔ ɔkɔtena ɔ; wannya bie a, ɔka kyɛ, ‘Ngosa ngɔhɔ me sua bɔ mvili nu nanu.’ 25 Na ɔkɔwa ne, né baprapra sua nanu basiesie nu kama. 26 Yeti, ɔkɔfa honhom nzoo bɔ bɛ ti anu yɛ se tra ye boka ye nwo so, ná baatena berɛ. Ɔba sɔ a, sona ne awieɛ ne sɛkye koraa tra daa ne."

27 Ogu so ɔka ɛhemɔ ne, maame bie mane ye konvi so wɔ mmenia nanu ha hyirele ye kyɛ: "Anigye yeɛ ole koɛ bɔ ɛlale nu, ɔne nyɔfone bɔ ɛnone ne." 28 Nakoso Yesu hane kyɛ: "Daabi, mmom anigye yeɛ ole bɛ bɔ betie Nyameɛ dwirɛ na bɛfa bɛyɛ adwuma ne."

29 Mmerɛ bɔ mmeni pee ba nekaa bɔ ɔwɔ ne, ɔhane kyɛ: "Mmenia bɔ bɛwɔ berɛ ɛnɛ* ne te nnipa-bɔnefoɛ! Bɛpena nzɛngyerɛneɛ, nakoso bɛngonya bie, sana Yona nzɛngyerɛneɛ ne ngome. 30 Kyɛbɔ ne Yona te nzɛngyerɛneɛ ma Ninewifoɛ nemɔ ne, sɔ ala yeɛ Sona Awa ne kɔyɛ nzɛngyerɛneɛ kɔma mmenia bɔ bɛwɔ berɛ ɛnɛ ne ɔ. 31 Atemmuda ne, ngwan dɔ hemaa ne né mmenia bɔ bɛwɔ berɛ ɛnɛ* ne kɔdwɔso, na okobu sɔ mmenia hemɔ fɔ, ofikyɛ ofili aseɛ ne noa dɔ wale, na ootiele Solomon nyanza, nakoso nea, bɔ ɔtra Solomon wɔ wa. 32 Atemmuda ne, Ninewifoɛ ne mmenia bɔ bɛwɔ ɛnɛ ne kɔdwɔso, na bɛkobu mmenia hemɔ fɔ, ofikyɛ Yona dwirɛ ne maa bɛsakrale, nakoso nea, bɔ ɔtra Yona wɔ wa.

33 "Ebiala nne berɛ bɔ ɔsɔ kanea yie a, ɔfa kɔfea nekaa bie anaa ɔfa wura kɛndɛn bo ɔ, mmom ɔfa sie kanea bakaa so, kyɛbɔ ɔkɔyɛ a, ebiala bɔ okowura berɛ ne konwu kanea ne ɔ. 34 Anyeɛ yeɛ ɔte nipadua ne kanea ɔ. Sɛ wɔ nye te pa a, wɔ nipadua namukoraati kɔta hyireinn, nakoso sɔ wɔ nye ttemaye a, wɔ nipadua namukoraati kɔyɛ awosii. 35 Yeti, ɛmɔnea yé paa na kanea bɔ ɔwɔ ɛmɔ nu ne anyɛ awosii. 36 Sɛ wɔ nipadua namukoraati te kanea, ná nekafee nne awosii nu a, ɛkɔta hyireinn te kyɛ ɛnwa basɔ kanea ne."

37 Yesu gu so odwudwo ne, Farisiniɛ bie srɛle ye kyɛ, ɔbra ma bɛdidi. Yeti ɔhɔle ye awuro kyɛ ɔkwaadidi. 38 Né ɔyɛ Farisifoɛ nemɔ nwanwa kyɛ wanni moa wannwunzi ye sa. 39 Yeɛ ɔha hyirele bɛ kyɛ: "Ɛmɔ Farisifoɛ hemɔ, ɛmɔnwunzi kwangoa ne kyɛnzee nwo, nakoso ɛmɔ nu de, asisie ne bɔne ngome. 40 Mmenia bɔ ɛmɔlle adwene! Bɔ ɔyɛle nikye ne si ne, nná ye ala yeɛ ɔyɛle ye kunu ne? 41 Sɛ ɛmɔfi ɛmɔ ahone nu bɛyɛ adɔyɛ a, nikye biala nwo kɔte kama.

42 "Farisifoɛ, ɛmɔ yaakɔ, ofikyɛ ɛmɔ tua ɛmanyire, akokɔ-bɛsa, ne nikye biala bɔ ɔte sɔ naso taet, nakoso ɛmɔbu ɛmɔ nye bɛgua Nyameɛ atɛn tenenee ne ye dɔ so. Ɔwɔ nu, odikyɛ ɛmɔyɛ sɔ nningyein ne, nakoso nningyein bɔ ohia paa ne, ɔnzɛ kyɛ ɛmɔbu ɛmɔ nye bɛgua so. 43 Farisifoɛ, ɛmɔ yaakɔ, ofikyɛ ɛmɔkuro bia pa wɔ sua bɔ beyia nu nanu, ɔne dwaaso ngyeaa. 44 Farisifoɛ, ɛmɔ yaakɔ, ofikyɛ ɛmɔ ayɛ kyɛ asieleɛ bɔ wafea, na mmenia fa so bɔ bɛnnwu ye ne."

45 Bɛ bɔ bɛse mmeraa paa nanu kõ hane kyɛ: "Kyerɛkyerɛniɛ, sɛ ɛka sɔ a, yɛ koso apɛ yɛ nzoaa." 46 Yeɛ Yesu hane kyɛ: "Ɛmɔ bɔ ɛmɔse mmeraa nanu ne, ɛmɔ yaakɔ, ofikyɛ ɛmɔfa nningyein bɔ enu yɛ nno bɛsoa mmenia, nakoso ɛmɔ bɔbɔ de, ɛmɔ mva ɛmɔ sa ba po bɛnga ye. 47 Ɛmɔ yaakɔ, ofikyɛ ɛmɔto adiifoɛ nemɔ asieleɛ, nakoso ɛmɔ baba mɔ yeɛ bɛhuni bɛ ɔ. 48 Nikye biala kyire kyɛ, ɛmɔse bɔ ɛmɔ baba mɔ yɛle ne, na ɛmɔ ne bɛ yɛ adwene, ofikyɛ bɛ yeɛ bɛhuni bɛ ɔ, na ɛmɔ yeɛ ɛmɔto bɛ asieleɛ ɔ. 49 Ɛhe ati yeɛ Nyameɛ nyanza hane kyɛ, ‘Ngɔsoma adiifoɛ ne asomafoɛ ngɔhɔ bɛ berɛ, bɛkɔhu ebiemɔ, na batane ebiemɔ nye. 50 Ɛhe ati, adiifoɛ bɔ bahwie bɛ mogya bagua fi mmerɛ bɔ bɛbɔle wiase ne, mmenia bɔ bɛwɔ berɛ ɛnɛ* ne kobu bɛ mogya nanwo atɛn, 51 ofi Habel mogya so, ɔbaadwu Zakaria bɔ bɛhuni ye wɔ afɔleɛ bokyea ne nekaa krongron né afia berɛ ne mogya so.’ Meka mekyire ɛmɔ kyɛ, mmenia bɔ bɛwɔ berɛ ɛnɛ* ne kobu ye nwo atɛn.

52 "Ɛmɔ bɔ ɛmɔse mmeraa nanu ne, ɛmɔ yaakɔ! ofikyɛ ɛmɔ afa nimdeɛ nzafoa ne. Ɛmɔ ahɔ a, ɛmɔ ngɔ nu, na bɛ bɔ bɛkɔ nu ne koso, ɛmɔsi bɛ atee."

53 Yeti ofili berɛ ne, atwerɛfoɛ ne Farisifoɛ nemɔ wale ye nwo berɛ pee, na bɛhyɛle yebo kyɛ bɛfa nzɛmmisa bɛtaataa ye, 54 né bɛnea atee kyɛ, ɔkɔha edwirɛ bie maa bekonya ye.