1 Tei waktu hiyo lun ngesah lukun Yesus bahwa pipire kulun lun Galilea sa pununu Pilatus, rahat ire ngokoi kurban tong Allah.

2 Kiringo kesah hiyo, Yesus kuhui, "Gana lun-lun Galilea hiyo pununu ngunau hiyo, tananguh kon hiyo buktine ire labih bodosa neke kongoreng lun Galilea sa lain? 3 Ingat: amun kon mo botobat neke dosa-dosa nu, kongoreng kon sagar matei lei, ngunau ire. 4 Ngunauawe lei lukun delapan blas lun sa matei tei Siloam rahat menara hiyo jujuh nipan ire? Tananguh kon ire labih bodosa neke kongoreng lun-lun lain sa muneng tei Yerusalem? 5 Ingat! hindra eso Ku Amun kon mo botobat neke dosa-dosa kon, kongoreng kon matei lei ngunau ire."

6 Libas hiyo Yesus ngesah perumpamaan ti, "Naan erai kulun sa ampun poneng ara tei kabun angurne. Tei isa andrau ne tulak kelo bua tei poneng ara hiyo, tapi awe halu. 7 Tahui ne kuhui lukun tukang kabunne, ‘Haot telu taun kengelane ku kandrei poneng ara ti mua. Tapi mo piji naan bua. Teweng bo! Awe gunai ne poneng ara ti tumu tei tane ti.’ 8 Tapi tukang kabun hiyo nyamut, ‘Dihe ne tumu erai taun eso, Tuan. Ku sagar nyangkul tane tei kililingne tahui mupukne. 9 Behe taun tanama nireh ne bubua. Tapi amun mo, ku sagar neweng poneng ara hiyo.’"*

10 Tei isa andrau Sabat, Yesus ngalajar tei isa blai simihiang. 11 Tei hiyo naan wawei sa haot delapan blas taun bereten, gana naan roh jahat tei huang tengane sa gawine bereten hampe jari sokut. Ne bujur-bujur mo tau mindri tegak.

12 Yesus neau wawei hiyo, tahui Ne neraune lukun kuhui lukunne: "Oo ibu, reten nu haot maeh." 13 Tahui Ne naap tangan-Ne munan wawei hiyo, hayak hiyo lei wawei hiyo mindri, tahui nango Allah.

14 Kapala blai simihiang hiyo sangit, gana Yesus pamaeh lun tei andrau Sabat, tahui ne kuhui lukun lun-lun, "Naan enem andrau de bagawi; hulet tei andrau-andrau hiyo de panamaeh, ada tei andrau Sabat."

15 Tapi Tuhan nyamut, "Munapik kon ti! tiap lun tei antara nu ngalapas sapine atawa keledaine tei andrau Sabat neke paketne tahui koitne de kinum. 16 Nah, tei ti naan wawei lului Abraham, sa haot delapan blas taun kengelane sunuruk awi Raja Setan. Hiye ne mo tau dalapas neke suruk hiyo tei andrau Sabat?"

17 Samut Yesus hiyo gawi musuh-musuh Yesus mangan bebene; tapi kongoreng lun-lun lainne sanang neau kongoreng sa ajaib sa dakawi Yesus.

18 Maka uhui Yesus: "Sumpama hiye hal Kerajaan Allah lukun pakai hiye Ku sagar ngumpamane lukun kon? 19 Kerajaan Allah sama ngunau insoi sasawi sa kunule tei kabun. Insoi hiyo tumu jari poneng, hampe pupulu-pupulu gawi salai tei paka poneng hiyo.* 20 Lukun Ne kuhui eso: "Pakai hiye Ku sagar ngumpama Kerajaan Allah?

21 Leonne ngunau ragi sa dikigo erai kulun wawei tahui kunule lukun telum pulu rueh kilo tepung, hampe kongorengne kamir.*

22 Huang pangalan tong Yerusalem, Yesus malan kililing neke kota tong kota lukun desa tong desa sansaluh ngalajar. 23 Tahui naan lun-lun sa tane lukun-Ne, "Pak, hiye kohoi doho bo lun sa sagar sanalamat? Yesus nyamut, 24 "Brusaha bo de huluk nahalau jawong sa helet. Ingat! Deo lun kakan huluk tapi mo inuh.

25 Amun sa ampun blai haot buat lukun haot nangkep jawong, nu sagar mindri tei ongon lukun ngatok-ngatok jawong sansaluh kuhui, ‘Tuan, tengau dela kamin jawong!’ Tahui Ne sagar nyamut lukun kuhui lukun nu, ‘Ku mo tanau neke awe nu hulet.’ 26 Maka nu sagar kuhui, ‘Kamin haot kuman lukun kinum tei tama-Nu lukun Hanyu haot ngalajar tei alan-alan kota kamin.’ 27 Tapi Tuan hiyo sagar kuhui eso, ‘Ku mo tanau kon neke awe. Tulak neke ti, kon sa gawi kajahat!’ 28 Tei anai sagar kahalu titir tirinak lukun ngikit dipen, amun nu sagar neau Abraham lukun Isak lukun Yakub lukun kongoreng nabi tei huang Kerajaan Allah, tapi nu gagalo kunusir tong ongon.

29 Lukun lun sagar hawi neke Timur lukun Barat, lukun neke Utara lukun Selatan lukun ire sagar maharung kuman tei huang Kerajaan Allah. 30 Subujurne, naan lun pongongkodi sa sagar jari lun pongohono, lukun naan lun penema sa sagar jari lun pongongkodi."

31 Tei pangkat hiyo, naan pipire lun Parisi hulet tong Yesus kuhui, "Ada muneng tei ti! Tulak tong uneng lain, gana Herodes kakan munu Hanyu."

32 Yesus nyamut, "Tulak bo lukun mara tong lun sa mo bugunai hiyo, ‘Andrau ti lukun kiat uni Ku ngusir roh jahat lukun pamaeh lun bereten, tapi tei andrau ketelu, Ku sagar nupon gawian-Ku.’ 33 Ble ngunau hiyo, Ku harus patarus lei pangalan-Ku andrau ti, kiat lukun libas kiat, gana mo asuh erai kulun nabi pununu tei ongon Yerusalem.* 34 Yerusalem, Yerusalem! Nabi-nabi pununu kon! Lun-lun sa siningku Allah pononting kon pakai watu hampe matei! Haot pipire kali Ku kakan ngilinung kongoreng penduduk nu ngunau takung piak sa ngilinung anak-anakne tei hane ekapne, tapi kon mo kakan! 35 Gana hiyo Allah mo eso ngilinung nu. Ringo, malai hayakti kon mo sagar neau Ku eso, hampe hanyu kuhui, ‘Keneberkat Ne sa hulet huang aran Tuhan.’"*