1 Tei Blai Allah, Yesus neau lun-lun sugih puhuluk duit tong huang uneng persembahan. 2 Ne gin neau naan walu sa susah puhuluk rueh kiping duit tembaga. 3 Tahui, Yesus kuhui, "Ringo ti! Subujurne walu sa susah ti ngokoi labih deo neke kongoreng lun sugih hiyo. 4 Gana kongoreng ire ngokoi neke kalabih harta ire. Tapi walu ti, ble susah bebene, ne ngokoi kongoreng sa naan teine sa penerlune de welum."

5 Naan lun-lun bapaner tentang ngunau awe asuh ne Blai Allah kinihias pakai watu sa asuh-asuh lukun banda-banda persembahan dela Allah. Maka Yesus kuhui lukun ire, 6 "Nireh naan waktu ne, kongoreng sa teneau kon ti sagar punujujuh; awe naan isa gin watu tei ti sa sagar pinidihe bususun tei unengne!"

7 Ire batane lukun Yesus, "Bapak Guru, pangkat awe hal hiyo sagar jari? Hiye siri ne bahwa haot hampe waktu ne hal hiyo sagar jari?"

8 Yesus nyamut, "Bagati! Ada hampe kon titipu. Deo lun sagar hulet pakai aran-Ku, lukun kuhui, ‘Ku nehiyo Ne!’ Lukun ‘Haot waktu ne.’ Ada kon nguma ire. 9 Ada takut amun kon kiringo kabar tentang prang lukun pemberontakan. Kongoreng ne hiyo harus jari labih hono. Tapi hiyo mo baarti bahwa haot waktu ne kiamat."

10 Ne kuhui lukun ire: "Bangsa sagar prang ngalawan bangsa lukun kerajaan ngalawan kerajaan. 11 Tei awe-awe sagar naan gempa bumi sa tamam, kalau sa tamam, wabah reten. Sagar jari hal-hal sa makaakut lukun parana tei langit.

12 Tapi, samale kongoreng ne hiyo jari, kon sagar sanaput tahui panatais. Kon sagar kanadil tei blai-blai simihiang lukun punuhuluk tong huang penjara. Lukun kon sagar dokoir tong tama raja-raja lukun punguasa-punguasa gana kon nguma-Ku. 13 Hiyo kesempatan dela nu de ngibirita Kabar Asuh neke Allah. 14 Ada takut, prasaya bo; ada gaer tentang hiye sa kakan kunuhui kon de ngebela arep kon. 15 Gana Ku sagar ngokoi tong kon uhui-uhui sa bijak, hampe musuh-musuh kon mo sagar inuh ngalawan atawa ngabantah kon. 16 Lukun kon sagar sanarah awi lun tuha nu, puloksanai-puloksanai nu, keluarga-keluarga nu, lukun kawal-kawal nu. Lukun pipire lun tei antara kon sagar pununu. 17 Kon sagar kenegli awi kongoreng lun gana kon jari murid-Ku. 18 Tapi erai ayut balo neke utek nu gin mo sagar jawoh. 19 Amun kon batahan lukun sabar, kon sagar salamat."

20 "Amun kon neau tantara musuh ngapung Yerusalem, kon sagar tanau mo ela eso kota hiyo sagar punujujuh. 21 Tei waktu hiyo, lun-lun tei kongoreng daerah Yudea harus pukoyo arep tong gunung-gunung. Lun-lun sa naan tei kota harus losek lukun lun-lun sa haot tei luar kota ada huluk tong huang kota. 22 Gana andrau-andrau hiyo nehiyo ‘Andrau-andrau Hukuman Panaratu,’ de ngunau hiyo jari hiye sa haot tunulis huang Kitab Suci. 23 Makaahi bebene wawei-wawei sa rahat mampung atawa eso potomo doak tei waktu hiyo. Gana Allah sagar nguhukum lun-lun tei tane Israel ti, maka ire sagar bujur mantais. 24 Naan sa sagar pununu pakai pedang, naan lei sa sagar sanaput tahui dokoit tong negara-negara lain, jari tawanan; Lukun lun-lun sa mo kinut Allah sagar ngajajah lukun nguasa Yerusalem hampe oreng waktu sa haot tanatu Tuhan dela ire."

25 "Nireh sagar naan siri-siri tei mateandrau, ulan, lukun bintang-bintang. Tei bumi lun-lun jari takut lukun pungon gana umak tahik lukun riwut barat sa sikar. 26 Kuasa-kuasa langit sagar guguong, gana hiyo lun-lun sagar jari takut bebene nama hiye sa sagar jari tei kongoreng dinia ti. 27 Tei waktu hiyo, lun sagar neau Anak Mirisia hulet waleng tong dinia ti lukun kinilikup jaun. Lun-lun sagar neau kuasa lukun kemuliaan-Ne. 28 Amun hal-hal hiyo malai jari, buat lukun teau tong tama, gana tewelek eso kon sagar sanalamat." 29 Tahui Yesus ngesah lukun ire perumpamaan ti, uhui-Ne, "Teau poneng ara atawa poneng hiye bo. 30 Amun pusok-pusokne malai ite, kon tanau bahwa haot mojen musim kai. 31 Ngunau hiyo lei amun kon neau hal-hal hiyo jari, kon sagar tanau Kerajaan Allah haot dini. 32 Ingat punguhui Ku ti: subujurne hal-hal sa haot dukuhui Ku hiyo sagar jari, samale lun-lun sa welum tei jaman ti matei. 33 Langit lukun bumi sagar jawoh, tapi punguhui-Ku tatap selamane."

34 "Jaga arep nu, ada hampe kon pahalau aur pesta-pesta lukun kinum sa tau pahamui, atawa pahalau mimikir welum nu, hampe kon mo siap rahat andrau Tuhan hulet slenga.

35 Gana andrau hiyo sagar hulet ngunau pengeha tei kongoreng lun tei bumi ti. 36 Bajaga-jaga lukun bodoa talalahui de kon kuat ngalawan kongoreng hal sa sagar jari lukun kon inuh nama Anak Mirisia."

37 Yesus ngalajar tei Blai Allah tei kandrau, lukun tei kiwane, Ne tulak tong Bontot Jaitun tahui muneng tei anai. 38 Tiap kiat lun deo hulet tong Blai Allah de kiringo Yesus ngalajar.