1 Tei isa andrau Sabat Yesus tulak kuman tong blai tokoh lun Parisi. Tei hiyo lun-lun neau Yesus lukun tiliti. 2 Selenga hulet lun sa bereten sa gawi pee lukun tanganne bungkak. 3 Tahui Yesus tane lukun guru-guru agama Yahudi lukun lun-lun Parisi sa naan tei hiyo, "Munurut hukum agama taka, tau mo taka pamaeh lun bereten tei andrau Sabat?" 4 Guru-guru agama lukun lun-lun Parisi hiyo merene bo. Tahui Yesus nerau lun hiyo lukun pamaeh ne, tahui nyingku ne mudi.

5 Libas hiyo Ne kuhui lukun ire: "Hiye tei antara kon sa mo tuli awat anakne atawa sapine amun tolonyong tong huang sumur, ble tei andrau Sabat?"

6 Tapi awe naan erai kulun sa inuh nyamut panane Yesus mengenai hal hiyo.

7 Yesus neau naan tamu-tamu sa medi uneng-uneng sa terhormat. Gana hiyo, Ne ngokoi ajaran ti tong kongoreng ire. 8 Uhui-Ne, "Amun lun ngunang nu tong pesta kawin, ada maharung tei uneng sa terhormat. Gana tau naan lun sa labih penting neke nu sa dukunang. 9 Amun lun penting hiyo hulet, sa ampun blai sagar onok nu kesok, de tamu sa penting hiyo tau maharung tei hiyo. Nu sagar mangan gana takarasi maharung tei uneng sa paling likut. 10 Tapi amun lun ngunang nu tong acara kawin, asuh ne nu medi maharung tei uneng sa paling likut. Tau bo sa ampun blai sagar onok nu kesok de maharung tei uneng sa labih terhormat. Tahui hanyu kinam terhormat tei tama lun deo. 11 Gana tiap lun sa pekemoh arep sagar punukuwa, tapi sa pukuwa arep sagar penekemoh."

12 Tahui Yesus kuhui lukun lun sa ampun blai, "Amun nu ngunang lun de pesta kuman, ada ngunang kawal atawa puloksanai, atawa tetangga nu sa sugih. Amun nu gawi ngunau hiyo, nireh ire sagar ngabaleh lukun ngunang nu lei, lukun hiyo sagar jari balehan dela nu. 13 Jari, amun nu gawi pesta, ngunang lun susah, lun sa pehe, lun lumpuh, lukun lun cacat. 14 Nu sagar keneberkat, gana lun-lun hiyo mo sagar inuh ngabaleh kangasuh nu. Kangasuh nu sagar kanabaleh awi Allah tei rahat Allah pewelum waleng lun-lun sa tumun lukun-Ne."

15 Tei waktu hiyo, naan lun sa kuman dadayo tei hiyo kiringo punguhui Yesus, ne kuhui, "Untung bebene lun sa sagar kuman dayo lukun Allah huang Kerajaan-Ne.

16 Tapi Yesus kuhui lukun lun hiyo, "Tei isa andrau naan lun gawi pesta sa gaya lukun ngunang deo lun. 17 Rahat haot waktu ne de malai pesta, lun hiyo nyingku hamba ne tulak tong kongoreng undangan lukun kuhui, ‘Ayu hulet, kongorengne haot siap!’ 18 Tapi ire dadayo onok maap. Sa tema kuhui, ‘Ku onok maap. Ku japo bo midi erai kalamar tane lukun ku harus tulak de sari ne.’ 19 Naan sa lain kuhui, ‘Ku onok maap. Ku japo midi dime pasang sapi lukun kakan kinam sapi-sapi hiyo dokoit bagawi.’

20 Naan sa lain kuhui, ‘Ku japo kawin, jari ku mo inuh hulet.’

21 Tahui, hamba hiyo mudi lukun mara hal hiyo tong tuan ne. Tuan hiyo sangit bebene, tahui kuhui lukun hamba ne, ‘Golek tulak tong kongoreng alan-alan tei kota. Oit tong ti lun susah, lun cacat, lun pehe, lun lumpuh.’

22 Libas hiyo hamba hiyo kuhui, ‘Tuan, singku tuan haot dakawi, tapi eso deo uneng sa lehoi.’

23 Tahui tuan hiyo kuhui, ‘Tulak tong kongoreng alan-alan raya lukun gang-gang kidik tei luar kota, tahui ngarasi lun-lun de hulet, de blai ku penu. 24 Ingat! Awe naan erai kulun neke tamu-tamu sa haot kununang sagar nginam pongokan pesta ku ti."

25 Deo lun uma malan dadayo Yesus. Yesus ngulih tahui kuhui lukun ire, 26 "Amun lun hulet tong-Ku, tapi labih sinta inai ne, amai ne, anak-anak ne, puloksanai-puloksanai ne, bat arep ne gagalo, ne mo tau jari murid-Ku 27 Lun sa mo kakan ngahan salib ne lukun uma-Ku, mo tau jari murid-Ku.

28 Amun misal ne neke kon naan sa kakan mangun menara, ne harus tanau hiye duit ne sukup de nupon menara hiyo atawa mo. 29 Gana amun ne mo inuh tupon ne, padahal pondasi ne haot dakawi, maka kongoreng lun sa neau gawian hiyo sagar kimihi. 30 Ire sagar kuhui ngunau ti, ‘Teau lun hiyo! Ne malai mangun tapi mo inuh nupon ne.’

31 Atawa, amun erai kulun raja sa ampun supuluh ribu tantara kakan prang lukun raja sa lain sa ampun ruem pulu ribu tantara, sareh raja hiyo sagar maharung bipikir hono hiye ne inuh mo, de ngalawan musuh ne hiyo.

32 Amun ne tanau bahwa ne mo inuh, sareh waktu musuh ne hiyo eso oro, ne sagar ngirim wakil-wakil ne onok de damai." 33 Ahir ne Yesus kuhui, "Ngunau hiyo lei lukun kon. Awe isa gin neke kon sa inuh jari murid-Ku, amun mo melah kongoreng susuatu sa naan tei ne."

34 "Hau hiyo asuh, tapi amun ne haot tawai, tau mo penerea waleng?

35 Awe naan gunai ne eso, asuh de pusubur tane atawa de pupuk pumule. Gana hiyo lun sagar nampi ne bo. Amun kon naan kilinge, ringo ti!"