1 Yesus pakai perumpamaan ti de ngalajar murid-murid Ne de talalahui bodoa lukun mo putus asa. 2 Uhui-Ne, "Naan hakim sa muneng tei kota. Ne mo takut lukun Allah, mo pruduli lukun lun lain. 3 Tei kota sa sama naan walu, sa talalahui hulet tong hakim hiyo de onok prakara ne kenebela. ‘Uhui ne onok awat de ngalawan musuh ku. Gawi keputusan sa adil huang prakara ti." 4 Pipire waktu kengela ne hakim hiyo mo kakan awat walu hiyo. Tapi akhirne hakim hiyo bipikir, ‘Mla ku mo takut lukun Allah lukun mo pruduli lukun hiye bo, 5 tapi gana walu ti talalahui bo ngaharek ku, labih asuh ku ngebela prakara ne. Amun mo, ne talalahui hulet lukun peheka ku.’"

6 Tahui Tuhan kuhui, "Teau hiye sa dukuhui hakim sa mo adil hiyo! 7 Nah, hiye Allah mo sagar ngampang prakara umat-Ne sa mohon tong-Ne kandrau lukun kiwa? Hiye ne ngulur-ngulur waktu de awat ire? 8 Subujurne ne, Allah sagar gawi sa adil dela ire, tapi waktu Anak Mirisia hulet waleng tong dinia ti, hiye sagar naan lun-lun sa prasaya lukun-Ne?

9 Tei hiyo naan pipire lun sa somong. Ire prasaya arep ire haot bujur. Lukun ire pukuwa lun-lun lain. Yesus pahampe perumpamaan lukun ire, 10 "Naan rueh kulun sa tulak tong Blai Allah de bodoa; sa isa lun Parisi, sa lainne lun panagih pajak. 11 Lun Parisi hiyo mindri tahui bodoa huang ahengne, ‘Oo Allah, ku busukur lukunnu, gana ku mo bodosa ngunau lun lain sa mangagou, surang atawa dusa ngunau panagih pajak hiyo. 12 Ku lun asuh, ku puasa rueh kali erai menggo, lukun ngokoi sepersupuluh neke kongoreng pangahalu ku.’ 13 Tapi panagih pajak hiyo mindri oro-oro bat mo maleh denga tong langit. Sansaluh musut dada ne kuhui, ‘Oo Allah, ngahi ku, lun sa bodosa ti!’"

14 Yesus kuhui, "Prasaya bo, rahat mudi tong blai, panagih pajak hiyo sa tinirime Allah lukun lain lun Parisi hiyo. Gana Allah sagar pukuwa kongoreng lun sa pekemoh arep ne, lukun pekemoh kongoreng lun sa pukuwa arepne."

15 Naan lun-lun koit nikia-nikia kidik hawi tong Yesus de Ne naap ire, lukun ngeberkat ire. Hayak murid-murid-Ne neau hal hiyo, ire nyangit lun-lun sa koit nikia-nikia kidik hiyo. 16 Tapi Yesus nerau nikia-nikia kidik hiyo tahui kuhui lukun murid-murid-Ne, "Dihene nikia-nikia kidik hiyo hulet tong-Ku! Ada ngai ire, gana lun sa ngunau ti sa jari anggota Kerajaan Allah.* 17 Ingat ti! Lun mo sagar jari anggota Kerajaan Allah amun mo nirime Kerajaan Allah ngunau nikia kidik."

18 Pimimpin Yahudi batane lukun Yesus, "Bapak Guru sa asuh, hiye sa harus dakawi ku de halu welum selamane?"

19 Samut Yesus: "Kunohiye nu kuhui-Ku asuh? Awe isa sa asuh salain neke Allah bo.* 20 Nu haot tanau kongoreng perentah Allah: Ada dusa, ada munu, ada dako, ada pereta, hormati inai nu lukun amai nu."*

21 Pimimpin hiyo kuhui, "Ku haot tumun kongoreng perentah Allah neke ku eso nikia."

22 Kiringo hiyo, Yesus kuhui lukun ne, "Kohoi naan isa eso sa kurang sa harus dakawi nu. Mudi, iai kongoreng ampun nu. Tahui sanabagi duitne tong lun-lun susah. Ngunau hiyo, nu sagar halu kusugih tei surga. Libas nu gawi kongoreng hiyo, hulet tong Ku, tahui uma Ku."

23 Kiringo perentah Yesus hiyo, pemimpin hiyo jari kesewa bebene, gana ne bujur sugih. 24 Yesus neau pimimpin sa sugih hiyo tahui kuhui, "Heka bebene de lun sugih jari anggota Kerajaan Allah. 25 Labih murah amun isa unta huluk luang ilos neke lun sugih huluk huang Kerajaan Allah."

26 Lukun ire sa kiringo hiyo kuhui: "Amun ngunau hiyo, hiye sa tau sanalamat?*

27 Yesus nyamut, "Sa mo mungkin dela mirisia, mungkin dela Allah!"

28 Petrus kuhui: "Kamin ti haot melah kongorengne tahui uma Hanyu."

29 Uhui Yesus, "Ringo! Lun-lun sa haot noyak blaine, ohene, puloksanaine, lun tuhane, atawa anak-anakne de ire tau malayani Allah lukun Kerajaan Allah, 30 ire sagar halu waleng neke Allah, nirime belepet lepet neke Allah tei jaman sa sagar hulet, ire sagar halu welum sekekela."

31 Yesus nerau kuduablas rasul de simpun tei uneng sa husus lukun-Ne. Tahui Ne kuhui, "Ringo ti! Hayak ti taka tulak tong Yerusalem. Tei anai, kongoreng sa tunulis awi nabi-nabi tentang Anak Mirisia sagar jari nyata. 32 Ne sagar sanarah lukun lun-lun sa lain lun Yahudi. Lun-lun hiyo sagar nguhulut, ngawada, lukun nyura-Ne. 33 Ire sagar ngompos tahui munu Ne. Tapi tei andrau ketelu, Ne sagar welum waleng."

34 Tapi kuduablas rasul-Ne bujur-bujur mo paham hiye sa dukuhui Yesus. Ire mo tanau hiye sa kanakan-Ne. Arti subujurne ne neke uhui sa kunuhui-Ne, siniok neke ire.

35 Yesus mojen hampe tei kota Yerikho. Tei hiyo, naan lun pehe tei iring alan rahat maharung mengemis. 36 Hayak lun pehe hiyo kiringo lun deo nahalau, ne tane, "Naan hiye ti?"

37 Samut ire, "Yesus lun neke Nasaret, rahat nahalau tei ti."

38 Tahui ne mingkiak, "Yesus, anak Daud,* ngahi ku!"

39 Lun-lun sa rahat malan tei tama Yesus nyempo lun pehe hiyo, nyingku de ne merene. Tapi ne mingkiak labih pehes, "Anak Daud, ngahi ku!"

40 Yesus teno malan tahui nyingku de lun pehe hiyo dokoit tong-Ne. Hayak ne haot dini, Yesus tane lukunne. 41 "Hiye sa kanakan nu, Ku gawi dela nu?"

Samut ne, "Tuhan, ku kakan de ku tau neau!"

42 Tahui Yesus kuhui, "Amun ngunau hiyo, neau! Gana nu prasaya lukun-Ku, nu maeh." 43 Hayak hiyo lei ne tau neau, tahui ne uma Yesus sansaluh kuhui terima kasih lukun Allah. Rahat lun deo neau hiyo, kongoreng ire nango Allah.