1 Mo ela libas hiyo, Yesus tulak neke kota tong kota, neke leu tong leu, ngibirita Kabar Asuh tentang Kerajaan Allah.* Kuduablas rasul-Ne uma dadayo. 2 Naan deo wawei sa uma. Ire haot panamaeh neke baramasam reten lukun roh-roh jahat. Ire nehiyo Maria sa dukuhui Magdalena (pitu roh jahat haot kunusir nekene); 3 lukun Yohana ohe Khusa. Khusa hiyo nehiyo pagawai istana Herodes; Susana, lukun deo wawei sa lain. Kongoreng wawei sa uma Yesus ngokoi neke harta la ire de ngawat Yesus lukun murid-murid-Ne.

4 Lun-lun neke kota-kota tarus hulet tong Yesus. Rahat deo lun haot simpun, Yesus ngalajar ire pakai perumpamaan ti, 5 "Naan petani tulak de nabur umang. Rahat ne nabur, naan umang sa ratu tei alan, tanajek lun, tahui dokokan pupulu-pupulu hampe oreng. 6 Naan lei umang sa ratu tei tane sa bawatu-watu. Libas tumu tahui layo gana mo baranu. 7 Naan umang lain sa ratu tei pulau haket buruhi. Haket buruhi tumu dadayo lukun umang hiyo, ngapeh umang hiyo hampe matei. 8 Tapi naan umang sa ratu tei tane sa subur, tumu asuh, ngahasil saratus kali lepet." Libas bekesah, Yesus bapaner lukun pehes, "Amun naan kilinge, ringo!"

9 Murid-murid-Ne tane arti perumpamaan hiyo. 10 Samut Yesus, "Kon haot dokokoi anugrah de tanau tentang Kerajaan Allah sa lun lain mo tanau. Tapi lukun lun-lun lain, Ku ngalajar pakai perumpamaan de ire neau, tapi mo tanau hiye sa jari. Ire kiringo tapi mo paham.* 11 Ti arti perumpamaan hiyo iroh: Umang hiyo nehiyo Punguhui Allah. 12 Umang sa ratu tei tane alan hiyo ngagamar lun-lun sa nirime Punguhui Allah kohoi sekedar kiringo bo. Tapi libas hiyo hulet Raja Setan, gawi ire kelot Punguhui Allah, hampe aheng ire mo prasaya. Gana hiyo ire mo sanalamat. 13 Tane sa bawatu-watu iroh nehiyo lun-lun sa kiringo Punguhui Allah, nirimene lukun begoh. Tapi ire kohoi prasaya tewelek bo gana awe naan wakat. Amun ire kunuji, ire mo prasaya Punguhui Allah eso. 14 Pulau haket buruhi nehiyo lun-lun sa kiringo Punguhui Allah, tapi gana kengela, ire gaer tentang pengewelum tei dinia ti, kelo kusugih, hiye bo sa pasanang aheng ire gagalo. Kongoreng hiyo ngapeh ire hampe mo ngahasil bua sa mihak. 15 Tapi naan lun-lun sa nirime Punguhui Allah sama ngunau tane sa subur. Ire kiringone, tahui ngintu huang aheng sa bujur-bujur asuh. Ire tarus batahan hampe ngahasil bua sa asuh."

16 "Amun naan lun sa melum pilita, ne mo nangkepne pakai pahat atawa melahne tei hane uneng mandre. Tapi ne melahne tei hamau meja de kongoreng lun sa huluk tong huang blai tau neau cahayane 17 Sama ngunau cahaya hiyo, kongoreng sa siniok sagar ite; kongoreng rahasia sagar tanau lukun leha. 18 Jari, teau asuh-asuh sara kon nirime kongoreng Punguhui Ku. Lun sa haot naan, sagar dokoi labih deo eso; tapi lun sa awe naan, ble dodoho naan tei ne sagar dikigo lei."*

19 Inai lukun puloksanai-puloksanai Yesus hulet kakan bakahalu Ne. Tapi mo tau gana pahalau deo lun ngililing-Ne de kiringo Ne ngalajar. 20 Jari naan lun kawara lukun-Ne, "Bapak Guru, inai lukun puloksanai-puloksanai-Nu naan tei ongon, kakan bakahalu Nu." 21 Tapi uhui Yesus, "Kongoreng lun sa kiringo lukun tumun Punguhui Allah, ire nehiyo inai lukun puloksanai-puloksanai-Ku."

22 Tei erai andrau, Yesus lukun murid-murid-Ne mamai tong huang jukung. Yesus kuhui lukun ire, "Ayu taka tulak tong hila danau." Jari, ire tulak.

23 Tandring ire balayar, Yesus tapakandre. Selenga naan riwut barat nampuh danau hiyo. Ranu malai huluk tong huang jukung, hampe pajangan ire. 24 Gana hiyo murid-murid nyele Yesus. Uhui ire, "Bapak Guru, Bapak Guru! Sareh taka sagar matei!" Yesus sele, nyempengar riwut barat lukun umak gaya. Tahui riwut barat taduh lukun danau hiyo mo buumak eso.

25 Yesus nyempo ire. Uhui-Ne, "Ukohiye kon mo prasaya lukun-Ku?"

Ire jari takut lukun sanganga, tahui ire kuhui isa lukun sa lain, "Hiye sabujurne lun ti, hampe ngokoi perentah tong riwut lukun ranu gin tumun-Ne."

26 Yesus lukun murid-murid Ne hampe tei daerah Gerasa tei hila Danau Galilea. 27-29 Tei hiyo naan laki sa kanarasuk roh jahat. Haot ela mo bapakaian. Roh jahat buleh manyarangne. Jari, lun hiyo ngajaga, tangan lukun peene sunuruk pakai rantai. Tapi ne tatap tau pikitus rantai hiyo. Roh jahat ngarasi ne tulak tong uneng sa ngebenyem. Haot ela ne mo muneng tei blai, ne kohoi kakan muneng tei goha-goha uneng ogang.

Ne neau Yesus neke jukung, mamai tong bawo. Ne hawi tong Yesus, mingkiak, tahui maharung tunou tei pee-Ne. Tahui, Yesus merentah roh jahat losek neke lun hiyo. Jari roh jahat mingkiak, "Eei, Anak Allah Sa Paling Bukuasa! Hanyu kakan gawi hiye lukun ku? Ku onok ada pataisku."

30 Yesus tane lukun lun hiyo, "Hiye aran-nu?"

Samutne, "Aran ku, Legion,"Gana kanarasuk deo roh jahat. 31 Roh-roh jahat hiyo onok lukun Yesus de ada ngusir ire tong huang Jurang Maut. 32 Dini tei hiyo, naan deo iwek kelo okan tei para bontot. Jari, roh-roh jahat onok ijin huluk iwek hiyo tahui leteng. Yesus ngokoi ijin tong ire. 33 Jari, roh-roh jahat losek neke lun hiyo, huluk iwek-iwek hiyo. iwek-iwek hiyo melempat tong uwa bontot tahui tong huang danau,tahui matei leteng.

34 Panjaga-panjaga iwek hiyo neau piristiwa hiyo. Jari, ire melempat, ngesah piristiwa hiyo tong kota Gerasa lukun daerah kililingne. 35 Lun-lun hulet de neaune. Rahat ire hampe tei hiyo, ire bakahalu lun sa haot kenebebas neke roh-roh jahat. Ne maharung dini pee Yesus, haot bapakaian, haot waras. Ire jari sadar Yesus bujur-bujur bukuasa. Gana hiyo takut ire.

36 Lun-lun sa neau piristiwa hiyo mara lukun lun-lun sa hulet neke kota Gerasa sara lun hiyo panamaeh. 37 Tahui kongoreng lun-lun sa muneng tei daerah Gerasa onok Yesus noyak ire, gana ire bujur-bujur takut. Maka, Yesus mamai tong huang jukung dadayo murid-murid-Ne de tulak waleng tong hila danau.

38 Lun sa haot panamaeh neke roh-roh jahat hiyo onok de ne tau uma. Tapi, Yesus merentah ne tulak. Uhui-Ne, 39 "Mudi tong blai nu. Ngesah kongoreng sa dakawi Allah lukunnu." Jari, lun hiyo tulak tong kongoreng kota, mara kongoreng sa dakawi Yesus tongne.

40 Tei hila danau, naan deo lun ngandrei Yesus waleng. Jari, rahat Yesus hampe, kongoreng ire nyambut Ne. 41,42 Hulet erai kulun kapala blai uneng simihiang sa baaran Yairus. Ne kohoi ampun isa anak, anak wawei, umurne kikira dua blas taun. Anakne rahat bereten migisit matei. Jari, Yairus tunou tei pee Yesus, onok de Yesus hulet tong blaine de nawas anakne hiyo.

Huang pangalan tong blai hiyo, lun deo ngerok Yesus neke kongoreng arah. 43 Tei antarane naan wawei sa bereten loloilite. Haot dua blas taun kengelane bereten. Ne haot buleh tulak batawas hampe kongoreng hartane oreng. Tapi ne mo tau panamaeh oha hiye bo. 44 Ne ngidini Yesus neke likut, tangku mpak jubah-Ne, slenga teno loloilitene.

45 Yesus tane, "Hiye sa nangku Ku?" Awe naan isa lun sa mangaku.

Tahui, Petrus kuhui, "Bapa Guru, naan deo bebene lun sa ngurumung-Nu."

46 Uhui Yesus, "Tapi naan lun sa tangku Ku, Ku nginam naan kuasa sa losek neke Ku."

47 Wawei hiyo sadar gawianne haot tanau. Maka, ne hulet, tunou tei tama Yesus, ne hulet lukun preketek.* Tei tama kongoreng lun, ne ngesah hiye gana ne tangku Yesus. Ne kuhui bahwa libas ne tangku Yesus tei hayak hiyo lei ne jari maeh.

48 Uhui Yesus lukunne, "Anak-Ku, nu maeh gana haot prasaya lukun Ku tulak lukun salamat."

49 Rahat Yesus paner, hulet erai kulun sa siningku neke blai Yairus, kapala blai uneng simihiang hiyo iroh. Uhuine lukun Yarius, "Anak nu haot matei. Mo usah pisibuk Bapa Guru eso."

50 Tapi Yesus kiringone. Maka uhui-Ne lukun Yairus, "Ada takut! Prasaya bo, anak nu sagar welum waleng."

51 Libas hampe tei blai Yairus,Yesus mo ngijin lukun hiye bo uma-Ne huluk tong huang kamar, kecuali Petrus, Yohanes, Yakobus, lukun inai-amai nikia hiyo. 52 Kongoreng ire nangis, nitir nirinak kapatei nikia hiyo. Tapi Yesus kuhui, "Ada nangis nikia hiyo mo matei, tapi ne mandre!" 53 Ire kimihi-Ne gana ire haot tanau nikia hiyo matei.

54 Tahui,Yesus nyaput tangan nikia hiyo. Uhui-Ne, "Eei nikia, sele!" 55 Tahui nikia hiyo welum waleng, tahui mindri. Yesus merentah ire ngokoi okan dela nikia hiyo. 56 Inai-amai nikia hiyo sanganga. Tapi Yesus ngai ire mara piristiwa hiyo lukun hiye bo.