1 Naan Kaisar Roma* sa baaran Tiberius. Tei waktu ne merentah kengelane lima blas taun, Pontius Pilatus jari gubernur tei Yudea. Herodes merentah tei Galilea. Puloksanai Herodes nehiyo Pilipus, merentah daerah Iturea lukun Trakonitis. Lisanias merentah tei daerah Abilene. 2 Tei waktu hiyo Imam Kapala nehiyo Hanas tahui kananti lukun Kayapas.

Tei waktu hiyo lei, Allah bapaner lukun Yohanes, anak Jakaria, tei padang gurun. 3 Maka Yohanes tulak tong awe-awe tei kongoreng daerah hungei Yordan, pahampe birita neke Allah. Yohanes bapaner pehes, "Botobat neke dosa-dosa nu, lukun nu harus kanabaptis de Allah ngampun nu."

4 Punguhulet Yohanes haot ela tunulis huang kitab Nabi Yesaya. Ngunau ti uhuine huang kitab hiyo:

"Naan lun sa bapaner pehes tei padang gurun,

‘Sidia alan dela Tuhan. Ngulurus alan dela Ne.

5 Tiap lembah harus tinimun tane. Tiap gunung lukun bontot harus kanarata.

Lurus alan sa bitiku-tiku.

Rata alan-alan sa bogolomang.

6 Maka kongoreng lun sagar neau kasalamatan sa hulet neke Allah.’"*

7 Deo lun hulet tong Yohanes de dabaptis. Tahui Yohanes kuhui lukun ire,* "Eei kon sa jahat lukun licik ngunau nipe biwisa! Ada bipikir kon tau pukuyo arep neke hukuman Allah nirehne. 8 Kon harus gawi gawian sa bujur de putundru bahwa kon bujur-bujur noyak dosa. Ada bipikir huang aheng: ‘Kamin lului neke Abraham. Sareh Allah mo sagar nguhukum kamin.’ Ingat: Neke watu-watu ti gin Allah tau gawi lului Abraham! 9 Allah sama ngunau lun sa haot nyaput kapak de neweng poneng kayu hampe tong wakatne. Sitiap poneng sa mo ngahasil bua sa asuh, sagar teneweng tahui dalampi tong huang apui."

10 Naan lun-lun sa tane lukun Yohanes, "Amun ngunau hiyo, hiye sa harus dakawi kamin?" 11 Yohanes nyamut, "Lun sa ampun rueh hapi, harus ngokoi isa tong sa awe naan hapi. Lun sa naan pongokan, harus nyabagi tong lun sa awe naan pongokan."

12 Pipire panagih pajak hulet tong Yohanes ire onok de dabaptis. Ire tane, "Bapa Guru, hiye sa harus dakawi kamin?" 13 Lukun Yohanes nyamut, "Ada nagih pajak labih deo neke hiye sa haot tanantu."

14 Naan lei prajurit-prajurit sa tane, "Ngunau awe lukun kamin? Hiye sa harus dakawi kamin?" Yohanes nyamut, "Ada onok duit lukun ngarasi. Ada gawi tandrah-tandrah sa palsu. Jari sukup bo kon lukun gajih kon."

15 Kongoreng lun tei waktu hiyo, lun-lun sa kandrei punguhulet Raja Panyalamat sa dukuhui Kristus. Gana hiyo, lun-lun sa kakan kanabaptis awi Yohanes malai batane-tane huang aheng, hiye ne Raja hiyo. 16 Tapi Yohanes nyamut, "Ku lain Kristus. Tapi mo ela eso Ne sagar hulet. Ne labih bukuasa neke ku. Malah ku mo patut jari walah-Ne sa paling uwa. Ku kohoi ngabaptis lun pakai ranu. Tapi Ne sagar ngabaptis lun pakai Roh Allah lukun apui.* 17 Ne haot nyaput alat pinyiau de misah gandum neke ape. Gandum sagar sinimpun-Ne tei huang luit. Tapi kongoreng ape sagar panapui-Ne tei huang apui sa mo tau pijom." 18 Ngunau hiyo Yohanes nyempo lun-lun pakai deo nasehat tei waktu ne mara Kabar Asuh.

19 Yohanes nyempo Herodes, gubernur Romawi tei Galilea hiyo, gana Herodes kawin lukun Herodias, ohe puloksanaine rahat eso welum. Yohanes lei nyempo ne gana kongoreng kadaat sa lain. 20 Tapi Herodes bat namoh kadaatne lukun puhuluk Yohanes tong huang penjara.

21 Tapi samale Yohanes punuhuluk tong huang penjara, lukun libas lun deo dabaptis, Yesus dabaptis lei. Waktu Yesus rahat bodoa, langit betengau. 22 Tahui Roh Allah minau tong munan-Ne ngunau pupulu merpati. Kiringo suara neke surga nguhui, "Hanyu Anak-Ku sa kanahi-Ku. Hanyu pasanang aheng-Ku."

23 Rahat Yesus, malai gawian-Ne, Ne buumur kira-kira telum pulu taun. Lun-lun nganggap Ne anak Yusup; Yusup anak Eli; 24 Eli anak Matat; Matat anak Lewi; Lewi anak Malki; Malki anak Yanai; Yanai anak Yusup; 25 Yusup anak Matika; Matika anak Amos; Amos anak Nahum; Nahum anak Helsi; Helsi anak Nagai; 26 Nagai anak Maat; Maat anak Matika; Matika anak Simei; Simei anak Yosekh; Yosekh anak Yoda; 27 Yoda anak Yohanan; Yohanan anak Resa; Resa anak Jerubabel; Jerubabel anak Sealtiel; Sealtiel anak Neri; 28 Neri anak Malkhi; Malkhi anak Adi; Adi anak Kosam; Kosam anak Elmadam; Elmadam anak Er; 29 Er anak Yesua; Yesua anak Elieser; Elieser anak Yorim;Yorim anak Matat; Matat anak Lewi; 30 Lewi anak Simeon; Simeon anak Yehuda; Yehuda anak Yusup; Yusup anak Yonam; Yonam anak Elyakim; 31 Elyakim anak Melea; Melea anak Mina; Mina anak Matata; Matata anak Natan; Natan anak Daud; 32 Daud anak Isai; Isai anak Obed; Obed anak Boas; Boas anak Salmon; Salmon anak Nahason; 33 Nahason anak Aminadab; Aminadab anak Admin; Admin anak Arni; Arni anak Hesron; Hesron anak Peres; Peres anak Yehuda; 34 Yehuda anak Yakub; Yakub anak Ishak; Ishak anak Abraham; Abraham anak Terah; Terah anak Nahor; 35 Nahor anak Seruk; Seruk anak Rehu; Rehu anak Pelek; Pelek anak Eber; Eber anak Salmon; 36 Salmon anak Kenan; Kenan anak Arpakhsad; Arpakhsad anak Sem; Sem anak Nuh; Nuh anak Lamekh; 37 Lamekh anak Metusalah; Metusalah anak Henok; Henok anak Yared; Yared anak Mahalaleel; Mahalaleel anak Kenan; 38 Kenan anak Enos; Enos anak Set; Set anak Adam; Adam tenempa Allah.