1 Tei isa andrau, Yesus nyimpun kuduablas rasul-Ne. Ne ngokoi kuasa lukun ire de ngusir roh-roh jahat lukun pamaeh reten. 2 Tahui, Ne nyingku ire de ngabar tentang Kerajaan Allah, lukun pamaeh lun-lun sa bereten. 3 Uhui Yesus lukun ire, "Ada koit hiye-hiye tei pangalan, tungkot, tas wahasi, pongokan, duit, pakaian saliu.

4 Hiye bo sa nirime kon huang blaine, muneng tei hiyo bo hampe kon tulak neke leu hiyo. 5 Tapi amun kon mo tinirime awi lun-lun tei isa leu, losek neke leu hiyo. Tempur dabu neke pee kon de pikingat ire. 6 Jari rasul-rasul Yesus tulak, buyo tong leu-leu. Ire mara Kabar Asuh lukun pamaeh lun sa bereten tei awe-awe.

7 Herodes, gubernur propinsi Galilea, kiringo tentang kongoreng sa jari hiyo. Ne pungon gana naan sa kuhui hiyo Yohanes Pembaptis sa haot welum waleng. 8 Naan lei sa kuhui nabi Elia hulet waleng. Naan lun lain kuhui Ne nehiyo nabi lain neke jaman hurap haot welum waleng. 9 Tapi Herodes kuhui, "Mo mungkin hiyo Yohanes gana ku haot nyingku lun mlong utekne. Jari, hiye lun ti subujurne? Ku haot kiringo deo kesah tentang Ne." Tahui Herodes brusaha bakahalu lukun Yesus.

10 Rasul-rasul Yesus waleng. Ire ngesah lukun-Ne kongoreng sa haot dakawi ire rahat malan tong leu-leu hiyo iroh. Tahui, Yesus koit rasul-rasul-Ne, tong kota Betsaida. Dini kota hiyo, ire kelo uneng sa benyem de kohoi kolompok ire bo sa naan tei hiyo. 11 Tapi lun deo tanau tong awe Ne tulak, tahui nasu Ne. Yesus nirime ire, ngalajar ire tentang Kerajaan Allah lukun pamaeh lun-lun sa bereten tei antara lun deo hiyo.

12 Rahat nejekiwa andrau, kuduablas rasul hawi tong Yesus lukun kuhui, "Uneng ti ngebenyem. Jari, singku lun deo hiyo tulak tong leu-leu sa dini ti. Ire tau kelo okan lukun uneng inep asing-asing."

13 Tahui Yesus kuhui, "Kon bo sa ngokoi ire okan!"

"Uhui rasul-rasul-Ne, "Mo mungkin, kamin kohoi naan dime roti lukun rueh kenah. Sareh mo sukup amun kamin mo tulak midi okan eso dela kongoreng lun ti!" 14 Eso dela lun kedeo ti kikira dime ribu lun tuha laki tei hiyo.

Tahui Yesus kuhui lukun rasul-rasul-Ne, "Singku lun-lun ti maharung bokolompok, kikira dimem pulu lun isa kolompok." 15 Jari, rasul-rasul-Ne gawi sa dukuhui Yesus. Kongoreng lun deo hiyo maharung bokolompok.

16 Tahui, Yesus nigo dime roti lukun rueh kenah hiyo, denga neau tong langit, nguhui terima kasih tong Allah. Tahui ne minsit-minsit roti lukun kenah hiyo, ngokoine tong rasul-rasul-Ne de sanabagi tong lun deo hiyo. 17 Ire kongorengne kuman hampe wising. Libas hiyo, rasul-rasul Yesus nyimpun kalabihanne dua blas karanyang.

18 Tei isa andrau, Yesus bodoa gagalo. Tahui hulet rasul-rasul-Ne tong hiyo. Tahui, Yesus tane lukun ire, "Uhui lun deo, hiye Ku ti?"

19 Samut ire, "Naan sa kuhui Hanyu hiyo nehiyo Yohanes Pembaptis. Naan lei sa kuhui Hanyu Nabi Elia. Naan lun lain sa kuhui Hanyu hiyo nabi lain neke jaman hurap sa haot welum waleng."

20 Yesus kuhui, "Tapi munurut kon gagalo, hiye Ku ti?"

Petrus nyamut, "Hanyu hiyo Mesias, nehiyo Raja Panyalamat."

21 Tahui Yesus ngai bebene ire mara hal hiyo lukun hiye bo.*

22 Yesus kuhui, "Anak Mirisia harus deo mantais. Ne harus tunulak awi pimimpin-pimimpin bangsa taka, imam-imam kapala lukun guru-guru agama Yahudi. Ne kakan pununu. Tapi rahat andrau ketelu, Ne harus welum waleng."

23 Libas hiyo Yesus bapaner lukun kongoreng lun sa naan tei hiyo, "Amun naan tei antara kon sa bujur-bujur kakan jari murid-murid Ku, ne harus noyak kanakan arepne gagalo. Tiap andrau, ne harus ngahan kayu salibne.* Murid-murid-Ku harus ngunau hiyo lukun talalahui uma Ku. 24 Lun sa kakan burusaha nahan welumne, sagar jawoh welumne. Tapi lun sa ngokoi welumne gana ne uma Ku, pasti ne sagar nyalamatne. 25 Seandaine, naan lun sa tau halu kongoreng sa kanakan tei dinia ti, tapi welumne gagalo jawoh, hiye untung ne, 26 sitiap lun sa mangan uma Ku lukun punguhui-Ku, Anak Mirisia sagar nulak ne rahat Ne waleng neke sorga lukun penu kuasa-Ne kuasa Allah Bapak lukun kuasa malaikat-malaikat-Ne. 27 Ringo! Neke kongoreng kon naan lun sa mo sagar matei samale neau Kerajaan Allah.*

28 Kikira walu andrau libas Yesus nguhui hiyo lukun ire, Ne mamai tong hamau gunung de bodoa. Ne koit Petrus, Yohanes lukun Yakobus lei. 29-32 Tapi tei anai Petrus lukun tuyang-tuyangne tapakandre.

Rahat Yesus bodoa, tadah rai-Ne alih, malai huang kemuliaan lukun jubah-Ne jari bura berkilau-kilau. Selenga naan rueh lun, nehiyo nabi Musa lukun nabi Elia sa peleha arepne huang kemuliaan lukun bapaner lukun Yesus tentang kapatei-Ne tei kota Yerusalem, sa mo ela eso sagar jari tei-Ne susuai lukun ransana Allah.

Tei hayak hiyo lei, Petrus, Yohanes lukun Yakobus sele. Ire neau Yesus huang kemuliaan, lukun kurueh nabi hiyo mindri tei iring-Ne. 33 Rahat kurueh nabi hiyo kakan melah Yesus, Petrus kuhui lukun-Ne, "Bapak Guru, asuh bebene taka tei ti. Dihe kamin gawi telu kemah tei ti, isa dela Nu, isa dela nabi Musa lukun isa dela nabi Elia." Tapi Petrus mo tanau punguhui ne hiyo.

34 Tandring ne nguhui hiyo, naan jaun hulet ngilikup ire. Takut bebene rasul-rasul Yesus hiyo. 35 Allah bapaner neke huang jaun hiyo, "Ti Anak-Ku sa Penedi-Ku. Ringo Ne!"

36 Libas Allah kuhui hiyo, ketelu rasul Yesus neau kohoi Yesus gagalo eso naan tei hiyo. Ire mo mara lukun hiye bo tentang hiye sa teneau ire hiyo.

37 Kiat andraune, Yesus lukun ketelu rasul-Ne hiyo minau neke gunung hiyo. Tei rahat hiyo, lun deo hulet bakahalu Yesus. 38 Neke lun deo hiyo, naan laki bapaner lukun suara sa pehes lukun Yesus. Uhuine, "Bapa Guru, ti isa-isane anak ku. Ku onok ahi kamin." 39 Buleh anak ku ti sanarang roh jahat. Nikia hiyo selenga mingkiak, tengane komororoi hampe wawane bubure. Roh jahat hiyo tarus pataisne, mo kakan losek nekene! 40 Haot ku onok lukun rasul-rasul-Nu de ngusir roh jahat hiyo, tapi ire mo sanggup."

41 Maka Yesus kuhui lukun kongoreng ire, "Lun tei jaman ti layau lukun mo prasaya! Pire kengela eso harus ku muneng dayo kon? Pire kengela eso harus ku sabar lukun kon? Oit anak nu hiyo tong ti!"

42 Rahat nikia hiyo ngidini Yesus, roh jahat manyarang nikia hiyo, ngabantingne tong tane, komororoi tengane. Tapi Yesus merentah roh jahat hiyo losek. Maeh nikia hiyo. Tahui nikia hiyo sanarahan waleng tong amaine. 43 Maka sanganga kongoreng lun tei hiyo gana neau kuasa Allah sa bujur gaya.

Tandring kongoreng lun hiyo eso sanganga neau kongoreng sa dakawi-Ne, Yesus kuhui lukun rasul-rasul-Ne. 44 "Ringo asuh-asuh. Ada sama sekali kon kelot punguhui-Ku ti: Anak Mirisia sagar sanaput tahui sanarah lukun lun sa ngalawan-Ne."

45 Tapi rasul-rasul ne mo paham punguhui-Ne hiyo. Ire mo tanau hiye sa kanakan-Ne. Arti sa kunuhui-Ne mo panaham ire. Tapi, ire gin takut batane lukun Yesus tentang kanakan-Ne.

46 Tahui rasul-rasul Yesus malai bakasamut tentang hiye sa paling gaya tei antara ire. 47 Tapi Yesus tanau pikiran ire hiyo. Maka, Ne nigo nikia kidik, nyingku nikia hiyo mindri tei lepeh-Ne. 48 Tahui Yesus kuhui lukun ire, "Amun naan lun sa prasaya lukun-Ku, tahui gana hiyo ne nirime nikia ngunau ti, hiyo sama ngunau ne nirime Ku gagalo. Ngunau hiyo lei ne nirime Allah sa nyingku Ku. Gana lun sa paling kidik tei antara kon, nehiyo sa paling kidik munurut mirisia, subujurne lun hiyo sa paling kidik munurut Allah.

49 Tahui Yohanes kuhui, "Bapa Guru, kamin neau naan lun lain ngusir roh jahat pakai aran-Nu. Tapi kamin ngai ne, gana ne mo neke kolompok taka."

50 Yesus nyamut, "Ada kon ngai lun sa ngunau hiyo, gana lun-lun sa mo ngalawan kon, baarti ire bipihak lukun kon."

51 Waktu de Yesus kenengkat tong sorga makin dini. Jari, Ne nigo kuputusan de tulak tong Yerusalem. 52 Ne nyingku pipire lun tulak ngohono Ne. Lun-lun sa singku-Ne hiyo tulak tong isa desa tei propinsi Samaria de nyiap punguhulet-Ne. 53 Tapi lun-lun Samaria tei desa hiyo mo kakan nirime Yesus, gana Ne sagar tong Yerusalem.

54 Rahat rasul Yakobus lukun Yohanes kiringo hiyo, ire kuhui, "Tuhan, hiye Hanyu kakan kamin onok Allah ngirim apui neke sorga de pajangan ire?" 55 Tapi Yesus tahui bapaling nyempo ire. 56 Tahui ire tulak tong desa lain.

57 Yesus lukun murid-murid-Ne narus pangalan tong kota Yerusalem. Huang pangalan, naan lun neke antara ire hiyo sa kuhui lukun Yesus, "Ku sagar talalahui uma Hanyu, tong awe bo Nu tulak."

58 Yesus kuhui lukunne, "Munin lukun Pupulu naan salaine. Tapi Anak Mirisia awe uneng kading."

59 Tahui Yesus kuhui lukun lun sa lain, "Uma Ku."

Lun hiyo kuhui, "Ku kakan onok ijin de ngogang amai ku dele."

60 Tapi Yesus kuhui lukunne, "Dihene lun-lun sa matei ngogang lun-lun sa matei.* Tapi nu harus tulak, tong awe-awe ngabar tentang Kerajaan Allah."

61 Naan lun sa lain eso kuhui, "Ku sagar jari murid-Nu, Tuhan, tapi ku onok ijin gana harus mudi tahui sawarat lukun keluargaku dele."

62 Tapi Yesus kuhui, "Amun lun rahat membajak ume ngulis tong likut, Ngunau hiyo lei, amun murid-ku ngulis tong likut, ne mo bugunai dela Kerajaan Allah."