1 Kongoreng anggota sidang hiyo mindri, tahui Yesus dokoit tong tama Pilatus. 2 Tei hiyo ire malai nandrah Ne. Uhui ire, "Lun ti dahalu kamin rahat ngahasut bangsa kamin, de ada bayar pajak tong Raja Roma. Ne gin kuhui, bahwa ne Kristus, nehiyo Raja."

3 Tahui Pilatus tane lukun Yesus, "Hiye bujur Hanyu raja lun Yahudi?"

Yesus nyamut, "Nu sa kuhui ne."

4 Maka Pilatus kuhui lukun imam-imam kapala lukun lun deo hiyo, "Ku bujur-bujur awe kahalu kasala tei lun ti, de nguhukum ne."

5 Tapi pimimpin-pimimpin lun Yahudi makin ngadasak, uhui ire, "Ne ngahasut rakyat lukun ajaran ne tei kongoreng Yudea. Ne malai neke Galilea lukun haot hampe tong ti."

6 Kiringo hiyo, Pilatus batane, "Hiye Lun ti Lun Galilea?"

7 Libas dawara bahwa Yesus baasal neke anai, Pilatus nyingku ire koit Yesus tong Herodes, sa katangaran waktu hiyo gin naan tei Yerusalem.

8 Herodes sanang bebene rahat neau Yesus, gana haot ela ne kiringo tentang Yesus lukun kakan neau-Ne. Ne ngaharap inuh neau Yesus gawi isa hal sa ajaib. 9 Gana hiyo deo sa tanane Herodes lukun Yesus, tapi Yesus mo nyamut.

10 Imam-imam kapala lukun guru-guru agama naan lei uma tei hiyo lukun nandrah Yesus. 11 Tahui Herodes lukun prajurit-prajuritne ngawada lukun pamangan Yesus, pusulep jubah Raja tei-Ne, tahui nyingku ire koit Ne waleng tong Pilatus. 12 Tei andrau hiyo lei Herodes lukun Pilatus, sa hurap bukumusuh, jari bakawal waleng.

13 Pilatus nyimpun imam-imam kapala, pimimpin-pimimpin, lukun rakyat, 14 tahui kuhui lukun ire, "Kon koit Lun ti tong ku lukun nandrah bahwa Ne ngahasut lun-lun. Tapi teau! Ku haot mariksa Ne tei tama kon, tapi ku bujur-bujur awe kahalu kasala Lun ti sa tanandrah kon tong-Ne. 15 Ngunau hiyo lei lukun Herodes, gana ne haot nyingku ire koit Ne waleng tong kamin. Lun ti mo gawi hiye bo sa patut duhukum lukun hukuman matei. 16 Gana hiyo, ku sagar ngompos Ne tahui libas hiyo ngalapas-Ne."

17 Pilatus kuhui ngunau hiyo gana tei tiap andrau raya Paskah, ne harus ngalapas erai kulun tahanan dela rakyat. 18 Tapi kongoreng lun sa simpun tei hiyo mingkiak, "Punu Ne! Lapas Barabas dela kamin!" 19 (Barabas punuhuluk tong huang penjara gana pemberontakan sa jari tei kota lukun gana munu.)

20 Pilatus kakan ngalapas Yesus, jari ne kuhui eso lukun lun deo hiyo. 21 Tapi ire tarus mingkiak, "Salib bo Ne!" Salib bo Ne!

22 Tahui de sa ketelu kali ne Pilatus mingkiak tong ire, "Tapi hiye kasala-Ne? Ne mo gawi kajahat hiye-hiye sa patut de kahalu hukuman matei! Ku sagar ngompos Ne, tahui ngalapas-Ne."

23 Tapi ire tatap mingkiak pehes, onok Yesus harus sanalib. Akhirne pangakan ire ngahasil. 24 Maka Pilatus ngokoi hukuman matei lukun Yesus susuai lukun pangakan lun-lun hiyo, 25 lukun ngalapas lun sa dokonok ire, nehiyo lun sa punuhuluk tong penjara gana pemberontakan lukun munu. Libas hiyo Yesus sanarah tong ire de dakawi uma kanakan ire.

26 Tahui Yesus dokoit awi ire. Tei bengkang alan, ire bakahalu lukun lun sa baaran Simon, neke Kirene, sa rahat huluk tong kota. Ire nyaput ne, tahui ngarasi ne ngahan kayu salib hiyo sansaluh malan tei ongon likut Yesus.

27 Deo lun malan tei ongon likut Yesus, tei antara ne naan lei pipire wawei sa nangis lukun nitir nirinak-Ne. 28 Tapi Yesus bapaling tong ire lukun kuhui, "Wawei-wawei Yerusalem! Ada nangis gana hal-hal sa jari lukun-Ku. Tapi nangis gana hal-hal sa sagar jari lukun kon lukun anak-anak kon. 29 Gana teau, sagar hampe waktu ne lun kuhui: Begoh wawei sa mo tau mampung, sa mo piji nganak, lukun sa mo piji potomo! 30 Maka lun sagar malai kuhui, lukun gunung-gunung, ‘Jujuh tipan bo,’ lukun tong bontot-bontot: ‘Timun bo kamin!’ 31 Gana amun lun gawi ngunau hiyo lukun kayu welum, hiye sa sagar jari lukun kayu meang?"

32 Naan lei rueh lun lain kurueh-ruehne lun jahat sa dokoit ire de duhukum matei dadayo lukun Yesus.

33 Rahat ire hampe tei uneng sa baaran Tengkorak, ire nyalib Yesus tei hiyo lukun kurueh lun jahat hiyo, sa isa tei tuhi sanan-Ne lukun sa lain tei tuhi sai-Ne. 34 Yesus bodoa, "Oo Bapa, ngampun ire, gana ire mo tanau hiye sa dakawi ire." Lukun ire nampi pangantah de nyabagi pakaian-Ne.

35 Lun deo mindri tei hiyo lukun neau kongoreng ne. Pimimpin-pimimpin nguhulut Ne, uhui ne, "Lun lain sanalamat Ne, dihene hayak ti Ne nyalamat arep-Ne, amun Ne nehiyo bujur-bujur Raja Panyalamat sa penedi Allah."

36 Prajurit-prajurit gin nguhulut Ne. Ire hulet lukun ngokoi angur masem tong-Ne. 37 Ire kuhui, "Amun Nu nehiyo raja lun Yahudi, salamat arep-Nu lukun kamin!" 38 Naan tulisan tei moh utek-Ne: "Ti Raja Lun Yahudi."

39 Isa penjahat sa sanalib tei hiyo ngawada Yesus. Ne kuhui, "Nu Raja Sa Panyalamat, behene? Nah, sanalamat lei arep-Nu lukun kamin!"

40 Tapi penjahat sa isa eso nyempo tuyangne hiyo, uhuine, "Hiye nu mo takut lukun Allah? Nu sama-sama kunuhukum matei ngunau Ne. 41 Kohoi hukuman kareh mla sitimpal lukun gawi taka. Tapi lun ti mo gawi kasala hiye-hiye!"

42 Tahui ne kuhui, "Yesus, ngingat bo ku, amun Hanyu hulet jari Raja!"

43 Yesus kuhui lukunne, "Prasaya bo, andrau ti nu sagar dayo Ku tei Pirdaus."

44 Hayak hiyo kikira jam dua blas, mateandrau mo bisinar, lukun kongoreng negri hiyo mieng bebene hampe nejekiwa kikira jam telu. 45 Tenda sa bokonteng tei huang Blai Allah, jabak jari rueh. 46 Yesus mingkiak, "Bapa! Tong huang tangan-Nu Ku nyarah arep-Ku!" Libas kuhui ngunau hiyo, Ne melah.

47 Rahat kapala pasukan neau hiye sa jari, ne nango Allah, uhui ne, "Bujur, Lun ti mo basala!"

48 Lun deo sa simpun tei hiyo haot neau hiye sa haot jari. Kongoreng ire mudi lukun aheng sa bujur meneser bebene. 49 Naan deo kawal Yesus, nyampin wawei-wawei sa uma Ne neke Galilea, ire mindri neau neke oro.

50,51 Naan lun sa baaran Yusup sa baasal neke kota Arimatea tei negeri Yudea. Ne lun sa asuh lukun konohormat lun, sa rahat kandrei waktu ne Allah malai merentah jari Raja. Ble ne anggota Mahkamah Agama, ne mo susuk lukun kuputusan lukun tindakan Mahkamah hiyo. 52 Yusup ti tulak nama Pilatus lukun onok de bangkai Yesus dokokoi tong ne. 53 Tahui ne pikinau bangkai Yesus neke kayu salib, tahui nyampu ne pakai kain sa bura barasih. Libas hiyo ne pakading bangkai Yesus tei huang ogang sa dakawi tei huang bontot watu, ogang hiyo male piji panakai. 54 Andrau hiyo andrau Jumat; lukun migisit andrau Sabat.

55 Wawei-wawei sa hulet lukun Yesus neke propinsi Galilea nguma Yusup lukun neau ogang hiyo. Ire neau ngunau awe bangkai Yesus sa panakading tei huang ogang. 56 Tahui ire mudi, de nyiap rarampah lukun ngolau bangkai Yesus. Tei andrau Sabat ire tihut bagawi uma hukum Taurat.