1 Libas Yesus haot kuhui kongorengne hiyo lukun lun deo, Ne tulak tong kota Kapernaum. 2 Tei hiyo naan perwira Roma sa hambane rahat bereten pehes, migisit matei. Perwira hiyo bujur sayang lukun hambane hiyo. 3 Jari, rahat kiringo tentang Yesus, ne nyimpun pipire tokoh lun Yahudi de nyingku ire turumpak Yesus. Ne kakan ire onok de Yesus hulet pamaeh hambane.

4 Ire tulak tong Yesus tahui onok lukun Yesus de uma ire waleng, de kawat perwira hiyo. Uhui ire, "Perwira ti patut kanawat Hanyu 5 gana ne sinta bangsa taka lukun ne haot mangun blai uneng simihiang dela kamin."

6 Maka Yesus tulak uma ire, malan tong blai perwira hiyo. Tapi, rahat ire mojen hampe tei blai hiyo, perwira hiyo nyingku tuyang-tuyang ne tong Yesus, pahampe pesen, "Mo usah repot Bapak hulet. Ku mo patut nirime Nu huang blai ku. 7 Ti alasan ku mo tulak tong-Nu iroh, nehiyo gana ku nganggap arep ku mo patut. Tapi perentah bo neke anai bo, sareh hambaku sagar jari maeh, gana Nu bukuasa. 8 ku paham tentang kuasa gana ku harus nguma singku pimimpinku. Ku gin naan prajurit tei uwa ku. Amunku nyingku isa prajurit buyo, maka sareh ne buyo. Amun ku nyingku lun hulet, maka sareh ne hulet. Amun ku nyingku hamba ku de ngagawi susuatu, pasti ne ngagawine."

9 Yesus lengon kiringo punguhui hiyo. Jari, Yesus bapaling tahui kuhui lukun lun deo sa uma-Ne. Uhui-Ne, "Ringo! Neke bangsa-Ku gagalo, lun Israel, Ku male piji turumpak lun sa prasaya lukun-Ku sa sama kuat prasaya ne ngunau perwira ti!"

10 Libas hiyo, mudi tuyang perwira sa siningku hiyo iroh. Hampe tei blai, ire neau hamba sa bereten hiyo iroh haot maeh.

11 Mo ela libas hiyo, Yesus tulak tong kota Nain. Murid-murid-Ne lukun deo bebene lun lain tulak dadayo Ne. 12 Waktu Yesus hampe tei dini jawong gerbang kota hiyo, naan lun-lun ngotet bangkai nikia lolang tong luar kota de konogang. Nikia lolang sa melah hiyo nehiyo anak tunggal laki neke wawei sa haot walu. Deo lun neke kota hiyo uma walu hiyo tulak ngogang anakne.

13 Rahat Tuhan Yesus neau walu hiyo, Ne nginam ahi. Uhui-Ne, "Ada nangis eso, ibu!"

14 Yesus ngidini bangkai hiyo, tahui naapne. Maka tukang pangahan bangkai hiyo tunuk. Yesus kuhui, "Eei nikia lolang, sele!" 15 Pemuda sa haot matei hiyo, buat maharung lukun malai bapaner. Maka Yesus nyarah 16 Kongoreng lun hiyo takut lukun hormat tahui nango Allah. Uhui ire, "Naan nabi gaya haot hulet tei botuk taka. Allah haot hulet ngawat umat-Ne."

17 Kabar tentang gawi Yesus diringo tei kongoreng Yudea lukun kongoreng daerah tei dinine.

18 Murid-murid Yohanes Pembaptis pahampe kabar tentang gawian Yesus lukun Yohanes.* 19 Maka Yohanes nerau rueh lun neke murid-muridne, nyingku ire tong Tuhan Yesus de tane lukun-Ne, "Hiye Hanyu Raja Panyalamat? Atawa hiye kamin harus ngandrei lun lainne? "

20 Tulak kurueh murid Yohanes hiyo tulak tong Yesus. Tahui Yesus nyamut, "Yohanes Pembaptis nyingku kamin tane lukun Nu: Hiye Hanyu Raja Panyalamat? Atawa hiye kamin harus ngandrei lun lainne?"

21 Rahat hiyo, Yesus pamaeh lun deo neke kongoreng masam reten, pukuyo roh jahat losek neke lun deo, lukun tau gawi lun sa pehe tau neau eso. 22 Tahui Yesus nyamut kurueh murid Yohanes hiyo, "Waleng bo tong Yohanes. Wara lukun ne tentang kongoreng sa teneau lukun diringo kon: lun pehe tau neau, lun lumpuh tau malan, lun bereten upak sa makaakut tau maeh, lun merengen tau kiringo, lun matei tau penewelum waleng, lukun Kabar Asuh panahampe lukun lun susah. 23 Keneberkat lun sa mo nulak Ku."*

24 Libas kurueh murid Yohanes hiyo tulak, Yesus malai mara lukun deo lun tentang hiye Yohanes subujurne. Uhui Yesus, "Kon tulak tong padang gurun de neau hiye? Erai kiting rikut sa siniup riwut? 25 Jari, kon tulak tong anai de neau hiye? Sareh mo de neau lun bapakaian larang. Lun sugih sa welum mewah muneng tei huang istana. 26 Amun ngunau hiyo, kon tulak tong anai de neau hiye? Sareh de neau isa nabi, behene? Tapi, ringo ti. Ne labih penting neke nabi biasa. 27 Naan tunulis huang Kitab Suci tentang Yohanes: ‘Ringo! Ku sagar merentah erai kulun labih hono neke Hanyu. Ne hiyo sagar nyiap lun-lun de punguhulet-Nu.* 28 Gana Yohanes waktu hiyo, labih penting neke kongoreng lun lain tei dinia ti hampe hayak ti. Tapi kongoreng umat Allah, bat sa paling mo penting, kongoreng ire lebih penting neke Yohanes hiyo."*

29 Kongoreng lun deo termasuk panagih-panagih pajak, kiringo punguhui Yesus. Ire kuhui alan Allah bujur. Ire hiyo lun-lun sa haot dabaptis. 30 Tapi pimimpin-pimimpin agama Yahudi neke kolompok Parisi lukun guru-guru agama Yahudi mo nirime ransana Allah de nyalamat ire. Ire hiyo lei lun-lun sa haot mo kakan dabaptis.

31,32 Uhui Yesus, "Lun-lun jaman ti sama ngunau nikia-nikia sa gawiayam tei pasar. Nikia-nikia hiyo maharung bapaner lukun suara sa pehes lukun tuyang-tuyang, ‘Kamin nyiup suling, tapi kon mo nandrik! Kamin manyanyi lagu dat sehu, tapi kon mo nangis!’* 33 Yohanes Pembaptis hulet, mo kuman roti, mo kinum anggur, tapi kon kuhui ne kanarasuk setan. 34 Libas hiyo Anak Mirisia hulet, Ne kuman, kinum, tapi ire kuhui Ne paragos, pamabuk, butuyang lukun kawal panagih pajak lukun lun lain sa bodosa. 35 Tapi akal pikir neke Allah sagar ngubukti bujur awi kongoreng lun sa nirimene."

36 Naan pimimpin agama Yahudi neke kolompok Parisi sa baaran Simon. Ne ngunang Yesus tong blaine de kuman dadayo. Jari, Yesus hulet tong blai lun Parisi hiyo, tahui maharung kuman. 37 Naan wawei sa mantarung tei kota hiyo gana welum huang dosa. Rahat ne kiringo Yesus rahat kuman tei blai lun Parisi hiyo, hulet ne koit kasa sa biisi minyak harum sa paling larang. 38 Sansaluh nangis, ne mindri tei likut Yesus, tunou dini pee-Ne. Ne pikiso pee Yesus pakai elu matene, tahui ngisune pakai balone. Ne nunuh pee Yesus, tahui norou minyak harum hiyo tong pee-Ne.

39 Simon neau gawian wawei hiyo, tahui kuhui huang ahengne, "Amun Ne bujur-bujur nabi, saharusne Ne tanau tentang pengewelum wawei hiyo; wawei sa welum huang dosa. Nabi mo sagar nonop wawei hiyo tangku-Ne."

40 Tahui Yesus kuhui lukunne, "Simon, naan sa kakan kunuhui-Ku lukunnu."

"Oi, Bapa Guru," samut Simon, "Uhui bo, Bapak Guru."

41 Tahui Yesus ngalajarne pakai perumpamaan ti, "Naan rueh lun sa buutang lukun lun sa pitihau duit. Isa lun buutang dime jatuh dinar, lukun sa lain buutang kohoi dimem pulu dinar.* 42 Gana rereh mo inuh ngulunas utang hiyo, maka lukun murah aheng, ne ngerela utang ire. Nah, hiye tei antara kurueh lun hiyo iroh sagar labih sinta lun sa pitihau duit hiyo?"

43 Samut Simon, "Ku nanguh ne sa paling deo utangne."

"Bujur pandapatnu hiyo,"Uhui Yesus.

44 Tahui, Yesus neau tong wawei hiyo iroh. Uhui Yesus lukun Simon eso, "Teau sa dakawi wawei ti. Ku hulet tong blainu. Nu mo nyidia ranu de mui pee-Ku; tapi wawei ti haot mui pee-Ku pakai elu matene, ngisune pakai balone. 45 Nu mo nyambut-Ku lukun nunuh, tapi hayak Ku hulet, wawei ti mo teno nunuh pee-Ku. 46 Nu mo norou minyak tei utek-Ku de ngohormat-Ku tapi wawei ti haot norou minyak harum sa larang tei pee Ku. 47 Wawei ti sama ngunau lun huang kesah iroh naan utang gaya tahui derela. Subujurne: dosane sa deo haot kanampun gana ne bujur sinta Ku! Tapi lun sa bipikir dosane kohoi dodoho, tahui kanampun, maka ne kohoi dodoho bo petente sintane."

48 Tahui Yesus kuhui lukun wawei hiyo, "Dosa-dosanu haot kanampun."

49 Kiringo hiyo, ire sa maharung kuman dadayo lukun Yesus tane huang aheng, "Hiye lun ti, sa hampe inuh ngampun dosa?"

50 Tapi Yesus tatap kuhui lukun wawei hiyo, "Nu sanalamat neke dosa nu gana nu prasaya lukun Ku. Tulak bo lukun damai sejahtra!"