1 Rahat Yesus hampe tei Yerikho, Ne malan tarus nahalau kota hiyo. 2 Tei hiyo naan lun sa baaran Sakheus, kapala panagih pajak sa sugih. 3 Ne kakan neau hiye Yesus hiyo, tapi gana lun pahalau deo lukun ne udok, maka ne mo tau neau Yesus. 4 Jari, ne melempat nyompono lun deo hiyo, tahui mamai poneng ara de tau neau Yesus sa sagar nahalau tei hiyo.

5 Hayak Yesus hampe tei dini poneng ara hiyo, Ne neau tong moh. Uhui-Ne, "Sakheus, golek minau neke hiyo! Gana Ku harus nyampat tei blai nu kiwa ti." 6 Sakheus kisak-kasik minau tahui nirime Yesus lukun begoh.

7 Kongoreng lun sa neau hal hiyo malai burumuham. Ire kuhui, "Ne nyampat tei uneng lun sa mo asuh!"

8 Hampe tei blaine, Sakheus mindri tahui kuhui lukun Yesus, "Tuhan, saparu neke harta ku sagar dokokoi ku lukun lun susah; lukun hiye bo sa piji tinipu ku, ku sagar bayar waleng lukunne epat kali lepet!"

9 Tahui Yesus kuhui, "Tei andrau ti nu lukun kongoreng keluarga nu haot sanalamat awi Allah lukun dokokoi welum sa bio, gana nu gin lului Abraham. 10 Gana, Anak Mirisia hulet de kelo lukun nyalamat sa jawoh."

11 Tandring lun eso kiringo Yesus bapaner, Ne ngesah isa perumpamaan. Gana waktu hiyo Ne haot dini Yerusalem, lukun lun nandrah bahwa Allah sagar tuli merentah jari Raja tei dinia. 12 Yesus kuhui, "Naan bangsawan sa tulak tong negri oro de dalantik jari raja, tahui waleng tong negri ne. 13 Samale tulak, ne nerau supuluh hamba ne, tahui ngokoi tong ire asing-asing erai kiping amas, uhui ne lukun ire, ‘Badagang bo kon pakai duit ti tandring ku tulak.’

14 Tapi lun-lun deo gli lukun ne, tahui ngirim wakil ire de kuhui, ‘Kamin mo kakan lun ti jari raja kamin.’ 15 Tapi ne tatap dalantik jari raja, tahui ne waleng tong negri ne. Tuli nerau hamba ne de tanau pire kuntungan sa haot dahalu ire.

16 Hamba sa tema hulet. Uhui ne, ‘Tuan, isa duit amas sa dokokoi Tuan tong ku, haot ngahasil jari supuluh.’ 17 Raja hiyo kuhui, ‘Asuh bebene! Nu hamba sa asuh. Gana nu inuh panarasaya huang urusan sa kidik, maka ku ngokoi hak tong nu, de nu nguasa supuluh kota.’

18 Hamba sa kurueh hulet. Uhui ne, ‘Tuan, isa duit amas sa dokokoi Tuan tong ku, haot ngahasil jari dime.’ 19 Tahui, Raja hiyo kuhui, ‘Ku ngokoi hak tong nu de nu nguasa dime kota.’

20 Hamba sa ketelu hulet. Uhui ne, ‘Tuan, ti duit Tuan; Ku ngintu ne huang saputangan. 21 Ku takut lukun Tuan, gana Tuan lun sa putes. Tuan nigo hiye sa lain neke la tuan, lukun Tuan nigo hasil tei uneng sa mo dukule awi Tuan.’ 22 Tahui, raja hiyo kuhui, "Nu hamba sa jahat! Ku sagar nguhukum nu susuai lukun punguhui nu hiyo. Nu tanau ku lun sa putes, sa nigo sa lain neke la ku lukun hasil sa mo piji kunule ku. 23 Amun ngunau hiyo kuno hiye nu mo ngintu duit hiyo tei bank de amun ku waleng ku inuh nirime duit hiyo lukun bungane?

24 Libas hiyo raja kuhui lukun lun-lun sa mindri tei hiyo, ‘Nigo duit hiyo neke ne lukun ngokoi duit hiyo tong hamba sa ampun supuluh duit amas.’

25 Tapi ire kuhui, ‘Tuan, ne haot ampun supuluh.’

26 Raja hiyo nyamut, ‘Ringo! Lun sa haot ampun, sagar dokokoi labih deo eso. Tapi lun sa mo ampun, hiye sa naan tei ne sagar dikigo neke ne. 27 Nah, hayakti musuh-musuh ku sa mo kakan ku jari raja, oit ire tong ti. Punu kongoreng ire tei tamaku."*

28 Libas Yesus nguhui kongorengne hiyo, Ne malan tei tama ire tong Yerusalem. 29 Hayak hampe dini Betpage lukun Betania tei Bontot Jaitun, Yesus nyingku rueh kulun murid-Ne tulak labih hono. 30 Uhui-Ne, "Tulak tong desa tei tama hiyo. Tei waktu hampe, kondreh sagar neau isa anak keledai sunuruk tei anai. Keledai hiyo male piji sunungkat lun. Lapas keledai hiyo tahui oit tong ti. 31 Amun naan sa tane, ‘Ukohiye kon ngalapas keledai hiyo?’ Uhui bo, ‘Tuhan merlune.’"

32 Kurueh murid Yesus hiyo tulak, lukun kongoreng ne pas ngunau sa dukuhui-Ne. 33 Tandring ire ngalapas anak keledai hiyo, sa ampun ne kuhui, "Ukohiye kon ngalapas keledai hiyo?"

34 Kurueh murid hiyo nyamut, "Tuhan merlu ne." 35 Tahui ire koit anak keledai hiyo tong Yesus. Ire melah jubah ire tei hamau keledai hiyo lukun kawat Yesus de sungkat tong hamau keledai hiyo. 36 Waktu Yesus sungkat keledai hiyo tong Yerusalem, lun-lun merang jubah-jubah ire tei alan.

37 Hayak Yesus haot dini hampe Yerusalem, tei alan sa minau neke Bontot Jaitun, kongoreng murid-Ne sa deo hiyo mingkiak lukun begoh, nango Allah gana kongoreng mujisat sa haot teneau ire. 38 Uhui ire:

"Keneberkat Ne sa hulet jari Raja huang aran Tuhan, damai sejahtra tei surga lukun kemuliaan tei uneng sa paling moh!"*

39 Pipire lun Parisi neke antara lun deo hiyo kuhui lukun Yesus, "Bapak Guru, singku murid-murid Bapak merene."

40 Yesus nyamut, "Prasaya bo! Amun ire merene, watu-watu ti sagar mingkiak."

41 Yesus makin dini tong Yerusalem. Rahat Ne neau kota hiyo, Ne nangis nitir nirinak. 42 Uhui-Ne, "Makaahi bebene! Ku bujur ngaharap nu tanau sara sa sagar gawi nu damai. Tapi nu mo tanau sara hiyo. 43 Sagar hampe waktu ne musuh nu sagar mayarang; ire sagar ngapung nu lukun ngadasak neke awe-awe tei kililing nu.

44 Ire sagar ngahancur nu lukun kongoreng penduduk nu; lukun awe naan isa watu gin sagar dewelah ire tususun tei uneng ne, gana nu mo sadar waktu Allah hulet nyalamat nu!"

45 Rahat Yesus hulet tei Yerusalem, Ne huluk tong Blai Allah tahui ngusir kongoreng pingiai lukun pimidi tei hiyo. 46 Uhui-Ne, "Naan punguhui Allah sa tunulis huang Kitab Suci: ‘Blai-Ku nehiyo blai de uneng bodoa.’* Tapi kon gawi ne ngunau salai penyamun!"*

47 Tiap andrau Yesus ngalajar tei Blai Allah. Imam-imam kepala, guru-guru agama, lukun pimimpin-pimimpin lun Yahudi kelo sara de munu Ne. 48 Tapi ire mo tau, gana talalahui naan deo lun tei dini-Ne sa sanang kiringo ajaran-Ne.