1 Tei waktu hiyo Kaisar Agustus, sa merentah tei kongoreng negeri Roma, merentah de kongoreng lun tei kerajaanne ngadaptar arep de sensus. 2 Sensus sa tema ti dakawi waktu Kirenius jari gubernur Siria. 3 Gana perentah hiyo, maka kongoreng lun tulak tong kota tei awe datu-nini ire hurap muneng de ire kanadaptar.

4 Tahui, Yusup tulak lei neke Nasaret tei Galilea, tong Betlehem tei Yudea. Hiyo uneng kelahiran Raja Daud. Yusup harus tong anai gana ne lului Daud. 5 Yusup tulak ngadaptar arepne dadayo lukun Maria, tunanganne, sa rahat mampung.

6 Rahat ire hampe tei Betlehem, hampe waktune Maria kakan nganak. 7 Maria nganak nikia laki, anakne sa tema. Nikia hiyo sanampune pakai ampin, tahui dewelah tei huang uneng pongokan eha; gana ire mo halu uneng inep.

8 Tei kiwa hiyo lei, naan gembala-gembala sa rahat ngajaga domba-dombane tei pulau rikut dini Betlehem hiyo. 9 Selenga naan malaikat Tuhan peleha arep ne lukun ire. Cahaya tarawa neke Allah bisinar narawa ire, hampe ire bujur-bujur takut. 10 Tapi malaikat hiyo kuhui, "Ada takut! Gana ku hulet de pahampe kabar asuh dela kon, kabar sa bujur-bujur pasanang kongoreng lun. 11 Andrau ti tei kota Daud, haot lahir Panyalamat dela kon, nehiyo Kristus,* Ne hiyo Tuhan. 12 Ti sirine, kon sagar tanau hiye sa dukuhui ku mla bujur: kon sagar bakahalu doak sa sanampu pakai ampin, panakading tei huang uneng pongokan eha pemelum."

13 Selenga naan deo bebene malaikat dadayo malaikat hiyo iroh. Kongoreng ire nango Allah. Uhui ire,

14 "Nango dela Allah tei surga, uneng sa paling moh.

Ne sagar ngokoi damai sejahtra tei bumi dela lun sa pasanang aheng-Ne."

15 Libas hiyo, malaikat-malaikat hiyo waleng tong surga, noyak gembala-gembala. Tahui gembala-gembala kuhui isa lukun sa lainne, "Ayu taka tong Betlehem, neau piristiwa sa haot jari tei anai, sa japo dawara Tuhan lukun taka."

16 Ire tuli tulak tong Betlehem, bakahalu Maria lukun Yusup, lukun doak hiyo sa rahat kading tei huang uneng pongokan eha pemelum. 17 Libas neau doak hiyo, gembala-gembala hiyo ngesah kongoreng sa dukuhui malaikat hiyo iroh tentang doak hiyo. 18 Lengon kongoreng lun kiringo kesah gembala-gembala hiyo. 19 Tapi Maria ngintu kongoreng hiyo tei huang ahengne, lukun nyehune.

20 Gembala-gembala waleng tong pulau rikut sansaluh nango nguhui kangasuh Allah, gana kongoreng sa haot diringo lukun teneau ire, pas ngunau sa dukuhui malaikat hiyo iroh.

21 Libas buumur walu andrau, nikia hiyo sununat. Yusup lukun Maria ngokoi aran-Ne Yesus, nehiyo aran sa haot dawara malaikat samale Ne naan tei huang sanai inai-Ne.

22-24 Hampe waktune, Yusup lukun Maria tulak tong Blai Allah tei Yerusalem de uma adat ngarasih arep munurut Hukum Taurat. Ire kakan ngokoi persembahan tong Allah nehiyo sapasang pupulu blungkukur, tau lei rueh anak pupulu merpati. Ire koit Yesus de nyarah Ne lukun Allah gana naan perentah eso huang Hukum Allah ngunau ti, ‘Amun wawei nganak anak sa temane laki, maka inaine lukun amaine harus nyarah ne tong Allah.

25 Tei waktu hiyo tei Yerusalem nan lun baaran Simeon. Ne lun sa talalahui welum bujur. Ne ngohormat lukun tumun Allah. Ne ngandrei waktu Allah nyalamat Israel. Roh Allah naan dayo ne. 26 Hurap, Roh Allah haot mara lukunne amun ne mo sagar matei samale neau Raja Panyalamat.

27 Roh Allah gawi Simeon tulak tong Blai Allah. Mo ela eso Yusup lukun Maria koit Yesus huluk tong Blai Allah. Ire rueh hulet de gawi sa penerentah huang Hukum Taurat tentang anak punguntuha. 28 Hayak Simeon neau Anak hiyo, Ne nigo-Ne, nyangkapu-Ne, tahui nango Allah. Uhuine,

29 "Tuhan, ku hamba Nu.

Ku siap de matei hayakti lukun damai

gana Hanyu haot nepat janyi-Nu lukun ku.

30 Gana, pakai mate ku gagalo haot neau Panyalamat sa neke-Nu.

31 Panyalamat ti haot siniap Hanyu dela kongoreng bangsa.

32 Panyalamat ti ngunau tarawa sa ngejelas kanakan Tuhan lukun kongoreng bangsa-bangsa sa lain Yahudi.

Ne gin gawi umat-Nu Israel dohormati."

33 Amai lukun inai Anak hiyo lengon kiringo punguhui Simeon tentang Anak ire. 34,35 Simeon ngeberkat Maria lukun Yusup. Libas hiyo ne kuhui lukun Maria, "Anak ti haot dewedi. Deo lun Israel sagar nirime-Ne. Tapi deo lei lun sagar nulak-Ne. Lukun ngunau hiyo, huang aheng deo lun sa siniok sagar jari ite. Lun sa nirime-Ne sagar jari labih dini lukun Allah. Tapi lun sa nulak-Ne sagar jari labih oro neke Allah. Ire sagar ngalawan-Ne. Katais sa sagar dikinam-Ne sagar gawi nu sedih bebene Maria, sama ngunau pedang sa ngamuk aheng nu."

36,37 Tei Blai Allah hiyo naan nabi wawei sa haot bujur tuha. Aranne Hana. Ne anak Panuel neke suku Asyer. Ne piji namane kengelane pitu taun, tapi libas hiyo wanene matei, ne walu. Rahat ne bakahalu anak Maria lukun Yusup, umurne walum pulu epat taun. Ne talalahui tei Blai Allah. Kandrau kiwa ne puasa lukun bodoa de nyamah Allah. 38 Rahat Yusup, Maria lukun doak hiyo naan tei hiyo, Hana hulet tong ire, tahui nguhui sukur tong Allah. Ne bapaner tentang Anak hiyo, Ne bapaner lukun kongoreng lun tei hiyo sa kandrei rahat Yerusalem kenebebas.

39 Yusup lukun Maria tupon gawi kongoreng acara sa penerentah huang Hukum Taurat. Libas hiyo, ire mudi tong Nasaret, leu natat ire tei propinsi Galilea. 40 Anak hiyo panagaya tei hiyo. Ne jari kuat lukun bujur-bujur bijaksana. Allah bujur-bujur sinta Ne.

41 Tiap taun lun tuha Yesus tulak tong Yerusalem de ngaraya Andrau Raya Paskah. 42 Rahat, tei waktu Yesus buumur duablas taun, ire tulak de uma ngaraya Andrau Raya Paskah hiyo ngunau biasa. 43 Libas parayaan hiyo tupon, lun tuha Yesus malan mudi. Tapi, ire mo tanau Yesus toyak tei Yerusalem. 44 Ire malan tarus gana bipikir Yesus naan tei antara rombongan sa rahat dadayo. Libas malan tarus erai andrau kengelane, japo ire malai kelo Ne tei antara puloksanai lukun tuyang-tuyang ire. 45 Tapi ire mo bakahalu Ne. Maka, Yusup lukun Maria waleng eso tong Yerusalem kelo Ne. 46 Akhirne, andrau ketelu, ire bakahalu Ne tei Blai Allah. Ne rahat maharung lukun guru-guru agama Yahudi, kiringo ire, pahampe panane-panane lukun ire. 47 Kongoreng lun sa kiringo ne bapaner jari lengon lukun bujur-bujur pas lukun cerdas. 48 Lun tuha-Ne lengon bebene neau Ne.

Inai-Ne kuhui, "Nak, ada ngunau hiyo lukun inai-amai-Nu. Kamin rueh haot gaer kelo-kelo nu!

49 Yesus nyamut, "Kuno hiye amai lukun inai kelo Ku? Hiye amai lukun inai mo tanau bahwa Ku harus naan tei huang Blai Bapa-Ku?" 50 Tapi ire mo paham sa dukuhui Yesus hiyo.

51 Libas hiyo Ne mudi dadayo ire tong Nasaret, Ne tatap tumun lukun ire. Inai-Ne ngintu kongoreng piristiwa hiyo huang ahengne. 52 Yesus makin gaya lukun makin batamoh bijaksana. Allah lukun mirisia makin jorih lukun Ne.