Lucas 5

Yesus medi murid-murid-Ne sa tema

1 Tei isa andrau Yesus mindri tei pampang danau Genesaret. Deo lun tahui besenselet ngurumung Ne de kiringo Punguhui Allah.

2 Yesus neau naan rueh jukung tei pampang hiyo. Nelayan-nelayan haot minau neke jukung, rahat mui jala. 3 Yesus sungkat tong huang jukung nelayan sa baaran Simon Petrus, nyingku ne nuju jukung dodoho oro neke pampang, Jari, Yesus maharung tei huang jukung hiyo tahui ngajar lun sa deo.

4 Tupon ngalajar, Ne kuhui lukun Simon, "Pokoro jukung ti neke pampang tong uneng sa lalem. Tahui nimai jalanu de nginuh kenah."

5 Simon nyamut, "Bapa Guru, erai malem kamin haot bagawi, awe halu hiye-hiye. Tapi, gana Hanyu nyingkune, maka ku nginam nimai jala eso."

6 Rahat ire haot gawi hiyo, ire halu kenah deo bebene hampe jala malai jabak gana kedeo kenah tei huangne. 7 Tahui ire pakai tangan ngokoi siri tong tuyang-tuyang ire tei jukung sa lain hiyo de kawat ire. Tuyang-tuyang ire hiyo hulet, tahui dadayo nuang kenah huluk huang kurueh jukung hiyo. Ire deo bebene halu kenah hampe kurueh jukung hiyo migisit leteng.

8-10 Simon lukun kongoreng lun sa naan tei hiyo sanganga gana kedeo ire halu kenah. Ngunau hiyo lei tuyang-tuyang Simon aranne Yakobus lukun Yohanes, anak-anak Jebedeus. Neau hiyo, Simon tahui sujud maharung tei tama Yesus. Uhuine, "Welah bo ku, Tuhan! Gana ku lun bodosa!"

Tapi Yesus kuhui lukunne, "Ada takut! Malai neke hayakti nu sagar ngajala mirisia."*5:8-10 Ngajala mirisia artine ire kelo mirisia de jari murid Yesus. 11 Simon lukun tuyang-tuyangne nejut kurueh jukung hiyo tong pampang, noyak kongorengne, tahui jari murid Yesus.*5:12 Munurut hukum-hukum agama Yahudi (Imamat 13-14) lun sa kuno reten ti kananggap mo barasih, tunulak neke kota, lukun mo tau tanangku.