1 Táta̱ nikhi̱i̱ Teófi̱lo̱, ná i̱yu̱ꞌ rí ne̱ne̱ ginii jayu, ni̱tháán ga̱jma̱á numuu mbá xúgíí rí neꞌne jamí rí niꞌsngáá Jesús, 2 asndo mbiꞌi rí ni̱ka̱ jiꞌyáa̱ mikhuíí. Ga̱jma̱á majñu̱u̱ Xu̱u̱ꞌ Ana̱ꞌlóꞌ wapha máꞌ nixná-ñájúu̱n rí mune̱ xa̱bo̱ tsí nixúnguii̱nꞌ, tsí ikhaa̱ máꞌ niraꞌwíi̱n. 3 Ikhiin máꞌ tsúꞌkhue̱n nisngájma-mine̱e̱ꞌ ná inúú, ído̱ rí wámba̱ nimínu̱u̱ꞌ. Mbaꞌa rí niꞌnii̱ ná inúú kajngó mbuyáa̱ rí gakon rí xtáa̱ ndaꞌyee̱. A̱jma̱ skíñú (40) mbiꞌi ni̱ka̱-rasngájma-mine̱e̱ꞌ ná inúú, xúꞌkhue̱n máꞌ ni̱ka̱-raꞌthúu̱n ga̱jma̱á numuu rí Ana̱ꞌlóꞌ ñajuun tsí naꞌthán-ñájúún xa̱bo̱.

4 Jamí nákhí rí mbóó xtáa̱ gajmíi̱, nixná-ñájúu̱n ríge̱ꞌ: «Ma̱xágájnalaꞌ ná Jerusalén, aguaꞌthi̱ínlaꞌ tsí nixuda-mina̱ꞌ Ana̱ꞌlóꞌ rí ma̱ꞌkha̱, ikhaa tsí ni̱tha̱nꞌlaꞌ máꞌ ga̱jma̱á numuu. 5 Gakon máꞌ rí Juáán nixúꞌdu-maꞌíin xa̱bo̱ ná awúun iya, xómáꞌ Ana̱ꞌlóꞌ ma̱ꞌne rí ikháanꞌlaꞌ mu̱dríguíilaꞌ Xu̱u̱ꞌ awúun rí i̱mbá wátha̱ máwáa mbiꞌi rí na̱ꞌkha̱ ge̱jyoꞌ».

6 A̱ꞌkhue̱n rí xa̱bo̱ tsí ni̱gi̱mbíin ga̱jma̱á nindxu̱u̱ ni̱ra̱xíi̱:

—Táta̱, á mbiꞌi máꞌ xúge̱ꞌ ma̱tha̱ne̱ rí maꞌthán-ñájun mbu̱júu Israél rá.

7 Xómáꞌ ikhaa̱ niꞌthúu̱n:

—Ra̱jáꞌyalaꞌ ikháanꞌlaꞌ mbu̱ya̱á náá mbiꞌi gáꞌne o nguáná gáꞌne rí niꞌgí-mina̱ꞌ ikhaa Ana̱ꞌlóꞌ ma̱ꞌne. 8 I̱ndo̱ó máꞌ numuu rí ikháanꞌlaꞌ mu̱drígúlaꞌ tsiakhe̱, ído̱ gáꞌkha̱ Xu̱u̱ꞌ Ana̱ꞌlóꞌ ga̱jma̱á nindxa̱ꞌlaꞌ, a̱ꞌkhue̱n mu̱tha̱nlaꞌ rí gakon ga̱jma̱á numuꞌ ná Jerusalén, mbá xúgíí numbaa Judéa̱, ná numbaa Samária̱, jamí asndo ná ndámba̱-ri̱go̱o̱ rawuun numbaa.

9 Ído̱ wámbo̱o̱ niꞌthée̱n ajngáa rúꞌkhue̱n, jamí awúun máꞌ rí ikhii̱n nu̱ya̱xíi̱, a̱ꞌkhue̱n ndiyáa̱ rí na̱ka̱ jiꞌyáa̱ mikhuíí, asndo rí mbá du̱u̱n nirkaꞌwii̱ ná inúu̱, jamí nánguá máꞌ ndiyáa̱. 10 Xómáꞌ ikhii̱n wéje̱ idúu̱n nu̱ya̱xi̱i̱ ná mikhu awúun máꞌ rí ikhaa̱ na̱ka̱-raꞌne-tsíngo̱o̱ꞌ. A̱ꞌkhue̱n ni̱xu̱ꞌma-mijná a̱jmi̱i xa̱bekha tsí miꞌxá xtíñúú ná nijñúu̱. 11 Ikhiin tsúꞌkhue̱n nithan: «Xa̱bo̱ buanuu tsáanꞌ naguwalaꞌ ná numbaa Galiléa̱, náá numuu kajngó nu̱ya̱xe̱laꞌ ná mikhu róꞌ. Ikhaa máꞌ Jesús tsíge̱ꞌ, tsí watríya̱aꞌ ná majña̱ꞌlaꞌ, ni̱ka̱ jiꞌyáa̱ mikhuíí. Xómá ndi̱ya̱álaꞌ rí na̱kaa̱ mikhuíí xkuaꞌnii máꞌ ma̱ꞌkhaa̱».

12 A̱ꞌkhue̱n niguátaa̱n ná júba̱ rí mbiꞌyuu Olíbo̱, niguwáa̱n ná Jerusalén. Mijngi máꞌ ꞌgí júba̱ rúꞌkhue̱n ná Jerusalén, xómá rí nandoo ma̱ꞌga nakhúu xa̱bo̱ awúun mbiꞌi rí nduya̱a xu̱únꞌ xa̱bo̱. 13 Jamí ído̱ niguáꞌnúu̱ ná xuajen, a̱ꞌkhue̱n nitsimáa̱ ná guꞌwá ri̱jma̱á ná niwájwii̱n. Ikhii̱n ñajúún

Pédro̱,

Santiágo̱,*

Juáán,

Andrés,

Felípe̱,

Tomás,

Bartolomé,

Matéo̱,

Santiágo̱ a̱dée Alféo̱,

Simón Selóte̱

jamí Júda̱s dxíyo̱o̱* Santiágo̱.

14 Mbá xúgíin tsíge̱ꞌ na̱gi̱mbúu̱n máꞌ xúꞌkhue̱n rí muthán-jáñíi̱ Ana̱ꞌlóꞌ, gajmíi̱ mbá tikhuun go̱ꞌo̱, ga̱jma̱á María̱ nánée Jesús, jamí gajmíí máꞌ dxíyo̱o̱.

15 Mbá mbiꞌi máꞌ rúꞌkhue̱n ni̱tu̱xu̱u̱ꞌ Pédro̱ ná majñu̱ú a̱ngia̱nꞌlóꞌ, tsí naꞌne máꞌ xí mbá majun skíñíi (120) wáa xa̱bo̱ ñajúún, jamí niꞌthúu̱n: 16 «Xa̱bo̱ buanuu a̱ngui̱nꞌ, ndiꞌyóo rí ma̱mba̱núu i̱yi̱i̱ꞌ ajngóo Ana̱ꞌlóꞌ rí niꞌthán Xu̱u̱ꞌ Ana̱ꞌlóꞌ ga̱jma̱á majñu̱u̱ Dabíd ga̱jma̱á numuu Júda̱s, tsí ndiyá ikhúún xa̱bo̱ tsí ni̱rtuwiin Jesús. 17 Júda̱s ningrigo̱o̱ꞌ ga̱jma̱á nindxa̱ꞌlóꞌ, jamí niꞌnii̱ mangaa̱ ñajun rí nu̱ꞌne̱ ikháánꞌlóꞌ».

18 (Ikhaa̱ niꞌtsi̱i̱ mbá mbaa ga̱jma̱á mbúkha̱a̱ rí nijanáa̱ ga̱jma̱á numuu rí ra̱máján niꞌnii̱, ikhín ni̱rákaa̱ ga̱jma̱á idxu̱u̱ jamí nimídáa̱ ti̱kua̱pha̱a̱, xúꞌkhue̱n máꞌ mbá xúgíí chámbóo̱ ningujwíi. 19 Jamí mbá xúgíin xa̱bo̱ xuajen Jerusalén ni̱dxawíín rúꞌkhue̱n, ikhaa jngó mbaa rúꞌkhue̱n nixna-mbiꞌíi̱ Asélda̱ma̱ rí ná ajngúu̱n ikhii̱n, rí nandoo gáꞌthán «Mbayuu Iꞌdi»).

20 «Numuu rí ka̱ma naꞌthán ná I̱yu̱u̱ꞌ ajmúú:

"Ga̱nguanáchúu la guꞌwóo̱,

jamí ma̱xáxtáa nimbáa ná awúun ne̱"*.

Jamí naꞌthán ne̱ mangaa:

"I̱mba̱a̱ꞌ gáyáa la ñajuu̱n"*.

21 »Ikhaa jngó, ndaꞌyóo rí mu̱ꞌgíilóꞌ mbáa xa̱bo̱ tsí ma̱xtáa ga̱jma̱á nindxa̱ꞌxo̱ꞌ kajngó maꞌthée̱n mangaa̱ rí ndiyáa mbiꞌyuu Jesús. Mu̱ríya̱a̱ꞌlóꞌ ná majñu̱ú máꞌ xa̱bo̱ tsíge̱ꞌ, tsí ningrigu̱ún ga̱jma̱á nindxa̱ꞌxo̱ꞌ mbá xúgíí mbiꞌi rí ningrigo̱o̱ꞌ Táta̱ Jesús ga̱jma̱á nindxa̱ꞌxo̱ꞌ, 22 asndo nákhí nigíꞌdu̱u̱n Juáán nixúꞌdu-maꞌíin xa̱bo̱ ná awúun iya asndo mbiꞌi rí ni̱ka̱ jiꞌyáa Jesús mikhuíí».

23 A̱ꞌkhue̱n ni̱raꞌwíi̱n a̱jmi̱i xa̱bo̱: José tsí mbiꞌyuu Barsabás, tsí mangaa máꞌ nutháa̱n Jústo̱, jamí Matía̱s. 24 A̱ꞌkhue̱n nithán-jáñíi̱ Ana̱ꞌlóꞌ xáꞌnii: «Ikháánꞌ, Táta̱, nathane̱-nuwiin a̱kui̱ín mbá xúgíin xa̱bo̱, atasngájma tsáa tsí a̱jmi̱i tsíge̱ꞌ nitraꞌwíi, 25 kajngó ma̱grui̱guíi̱ ma̱ꞌnii̱ ñajun ríge̱ꞌ rí nune̱ tsí nixúngui̱inꞌ Jesús, ñajun rí niniñuu Júda̱s ga̱jma̱á numuu aꞌkhúun, kajngó ma̱ꞌgee̱ ná jaꞌyoo̱». 26 A̱ꞌkhue̱n ni̱ra̱xe̱-mijnée̱ kajngó mbuyáa̱ tsáa ágájnuu mbiꞌyuu ma̱ꞌne ñajun rúꞌkhue̱n, a̱ꞌkhue̱n nigájnuu mbiꞌyuu Matía̱s. Jamí asndo nákhí máꞌ mbiꞌi rúꞌkhue̱n ninindxu̱u̱ tsí waxúngua̱a̱ꞌ gajmíi̱ tsí mbá gu̱wa̱ꞌ i̱mbi̱in (11) tsí nixúngui̱inꞌ Jesús.