1 Ído̱ Páblo̱ ga̱jma̱á Bernabé niguáꞌníi̱ ná xuajen Ikónio̱, a̱ꞌkhue̱n ni̱tu̱ꞌúu̱n ná guꞌwá rí na̱gi̱mbíin xa̱bo̱ judío̱. Jamí phú mitsaan nithee̱n, ikhaa jngó phú mbaꞌiin xa̱bo̱ judío̱ ninimbu̱únꞌ xúꞌkhue̱n máꞌ xa̱bo̱ griégo̱. 2 Xómáꞌ xa̱bo̱ judío̱ tsí tánimbu̱únꞌ, nene̱-rájíi̱n jamí ni̱sngrúꞌúu̱n xa̱bo̱ tsí ra̱ꞌkháa judío̱ ñajúún kajngó ma̱jiꞌníi̱ juñúu̱ a̱ngia̱nꞌlóꞌ. 3 Maske máꞌ xúꞌkhue̱n, phú mba̱yo̱ꞌ ninguanúu Páblo̱ ga̱jma̱á Bernabé ikhín, jamí ga̱jma̱á mbá jañii a̱kuíi̱n ná inuu Táta̱ támíñúu̱ muthúu̱n xa̱bo̱ rí Ana̱ꞌlóꞌ nandoo jaꞌñúu̱. Xómáꞌ Ana̱ꞌlóꞌ ni̱ka̱-rasngájma rí gakon ajngáa rí nuthee̱n, numuu rí ikhaa̱ nixnúu̱ tsiakhe̱ rí muni̱i̱ rí phú wáá jamí rí phú namakúún xa̱bo̱ eꞌne. 4 Xómáꞌ xa̱bo̱ xuajen ni̱xpi̱ꞌtha̱-mijná: mbá tikhuun júwa̱ꞌ gajmíí xa̱bo̱ judío̱, jamí i̱ꞌwíin júwa̱ꞌ gajmíí tsí nixúngui̱inꞌ Jesús. 5 A̱ꞌkhue̱n xa̱bo̱ judío̱ jamí xa̱bo̱ tsí ra̱ꞌkháa judío̱ ñajúún, nimbáxúu̱n gajmíi̱ xa̱bo̱ ñajun, kajngó mune̱-ngíníi̱ jamí muxnúu̱ ga̱jma̱á itsí. 6 Ído̱ nidxawuun Páblo̱ ga̱jma̱á Bernabé rúꞌkhue̱n, a̱ꞌkhue̱n nigáñúu̱ nigóo̱ ná Lístra̱ ga̱jma̱á Dérbe̱, xuajen rí triga̱ ná numbaa Likaónia̱, jamí nda̱wa̱á nigóo̱ mbá xúgíí numbaa rí triga̱ mbá nawa̱a̱. 7 Jamí ikhín nuthan-raꞌee̱ ajngáa máján mangaa.

8 Jamí ná xuajen Lístra̱ xtáa mbáa xa̱bo̱ tsí nixtriga̱a̱, réngui̱i̱ asndo nákhí máꞌ ni̱gu̱maa̱, jamí nimbá miꞌtsú tángrigo̱o̱ ga̱jma̱á nakhúu̱. 9 Ikhaa tsúꞌkhue̱n ꞌgí nadxawuun rí naꞌthán Páblo̱. Jamí Páblo̱ niraꞌa̱ mújúun inuu̱, a̱ꞌkhue̱n ndiꞌyoo̱ rí wéje̱ a̱kuii̱n ná inuu Ana̱ꞌlóꞌ kajngó ma̱ꞌni̱i a̱kuii̱n. 10 A̱ꞌkhue̱n Páblo̱ mbá gakhe̱ niꞌthúu̱n: «Ariajún jmbu ga̱jma̱á nakhuáaꞌ». A̱ꞌkhue̱n ikhaa̱ asndo na̱ki̱xi̱i̱ ni̱tu̱xu̱u̱ꞌ, jamí nigíꞌdu̱u̱n ningrigo̱o̱ꞌ.

11 Ído̱ ndiyáá xa̱bo̱ rí neꞌne Páblo̱, a̱ꞌkhue̱n ni̱ndxa̱ꞌwe̱e̱ jamí nithee̱n ga̱jma̱á ajngáa rí nuthan xa̱bo̱ ná Likaónia̱: «¡Ana̱ꞌlóꞌ tsí xómá xa̱bo̱ numbaa jaꞌñúú niguátaan gúyalóꞌ!». 12 A̱ꞌkhue̱n tsí Bernabé nuxna-mbiꞌíi̱ Júpi̱te̱r, xómáꞌ Páblo̱ nuxna-mbiꞌíi̱ Merkúrio̱,* numuu rí ikhaa̱ ñajuu̱n tsí naꞌthúún xa̱bo̱. 13 Xómáꞌ dxakuiin Júpi̱te̱r, tsí ꞌgí guꞌwá dxákuiin ná rawuun xuajen, ni̱ꞌkha̱ jaguu̱n xede̱ jamí re̱ꞌe̱ ikhín. Ikhaa̱ gajmíi̱ xa̱bo̱ tsí mbaꞌiin, nandoo̱ maxnáxii̱n xu̱kú tsí nijáñúú ná inuu Bernabé ga̱jma̱á Páblo̱.

14 Ído̱ ni̱dxawíín ríge̱ꞌ tsí nixúngui̱inꞌ Jesús, Bernabé ga̱jma̱á Páblo̱, ni̱ru̱thii̱n xtíñúu̱ numuu rí phú ra̱máján ene̱ xa̱bo̱ iyáa̱. A̱ꞌkhue̱n nigóo̱-ragáñúu̱ ná majñu̱ú xa̱bo̱ tsí mbaꞌiin jamí ni̱ndxa̱ꞌwe̱e̱: 15 «¡Xa̱bo̱ buanuu, náá numuu kajngó nu̱ne̱laꞌ rúꞌkhue̱n róꞌ! Ikháanꞌ mangáanꞌxo̱ꞌ ñajwanxo̱ꞌ xa̱bo̱ numbaa xómá ikháanꞌlaꞌ, jamí nu̱tha̱n-ráꞌalaꞌxo̱ꞌ rí gu̱ni̱ꞌñáá-ru̱ne̱laꞌ ríge̱ꞌ, rí nda̱a̱ mbá jayu numuu, jamí ga̱thanga̱ánꞌlaꞌ ná inuu Ana̱ꞌlóꞌ tsí ndaꞌya, tsí neꞌne-ku̱maa mikhu ga̱jma̱á ju̱ba̱ꞌ, iya a̱pha̱, jamí mbá xúgíí rí ríga̱ ná awúun ne̱. 16 Rí nákhí wajyúú Ana̱ꞌlóꞌ niniñúú mbá xúgíin xa̱bo̱ rí guni̱i̱ mbá xúgíí máꞌ rí nandúu̱n ikhii̱n. 17 Maske máꞌ xúꞌkhue̱n, tániñuu̱-rasngájma-mine̱e̱ꞌ ga̱jma̱á majñu̱u̱ rí máján naꞌnii̱. Naxnálóꞌ mbiꞌi rí na̱ꞌkha̱ ruꞌwa jamí naxnálóꞌ mbiꞌi rí mu̱gímbúulóꞌ rí nijma̱a̱. Xkuaꞌnii naꞌne-matíi̱ ganitsu rí mu̱ꞌpholóꞌ, jamí naꞌne-gagii̱ a̱kia̱nꞌlóꞌ». 18 Maske máꞌ nithúu̱n xa̱bo̱ mbá xúgíí rúꞌkhue̱n, ga̱jma̱á kháan niwajún-ꞌthúu̱n kajngó mu̱xúxna̱xíi̱n xu̱kú tsí nijáñúú ná inúu̱.

19 A̱ꞌkhue̱n niguáꞌnú mbá tikhuun xa̱bo̱ judío̱ tsí naguwá ná Antiokía̱ jamí ná Ikónio̱. Ikhiin tsúꞌkhue̱n nene̱-rájíi̱n xa̱bo̱ tsí mbaꞌiin rí muxnáa̱ Páblo̱ ga̱jma̱á itsí. A̱ꞌkhue̱n ni̱xma̱taa̱, ni̱ríya̱a̱ꞌ asndo ná rawuun xuajen, numuu rí ni̱ju̱múu̱ rí nijáñuu̱. 20 I̱ndo̱ó máꞌ numuu rí mbá nawa̱a̱ niwájun tsí nanimbu̱únꞌ juyáá Jesús ná kri̱ga̱a̱ Páblo̱, a̱ꞌkhue̱n ni̱tu̱xii̱ jamí ni̱ta̱ꞌaa̱ ná xuajen. Jamí i̱mba̱ mbiꞌi nigájnuu̱ ni̱ke̱e̱ ga̱jmáa̱ Bernabé ná xuajen Dérbe̱.

21 Nithan-raꞌee̱ máꞌ ajngáa máján ná xuajen rúꞌkhue̱n mangaa, jamí phú mbaꞌiin xa̱bo̱ ninimbu̱únꞌ juyáá Jesús. Nda̱wa̱á a̱ꞌkhue̱n nithangii̱n ná xuajen Lístra̱, ná Ikónio̱ xúꞌkhue̱n máꞌ ná Antiokía̱. 22 Ikhín nixnaa̱ la tsiakhe̱ tsí nanimbu̱únꞌ juyáá Jesús, nithán-múꞌúu̱n rí mu̱xúni̱ꞌñáa̱-ranimbúu̱n juyáa̱. Jamí nithúu̱n: «Ndaꞌyóo rí ma̱nújngalóꞌ ná majñu̱u̱ mbaꞌa jamínu̱ꞌ kajngó ma̱nindxaꞌlóꞌ xa̱bo̱ tsí naꞌthán-ñájúún Ana̱ꞌlóꞌ». 23 Jamí ni̱strigii̱n xa̱bo̱ buanuu tsí mbuya̱ idxu̱u̱ mbámbá ná júwa̱ꞌ tsí nanimbu̱únꞌ juyáá Jesús. Ído̱ wámbúu̱n nithán-jáñíi̱ Ana̱ꞌlóꞌ jamí nene̱-miꞌkhíi̱, a̱ꞌkhue̱n ni̱xna̱xíi̱n ná ñawúun Táta̱ tsí ninimbúu̱n juyáa̱.

24 Ído̱ ni̱gíꞌmaa̱ jambúu̱n, a̱ꞌkhue̱n ninújngúu̱n ná mbayuu Pisídia̱, jamí niguáꞌníi̱ ná mbayuu Panfília̱. 25 Jamí ído̱ wámbúu̱n nithan-raꞌee̱ ajngóo Ana̱ꞌlóꞌ ná xuajen Pérje̱, a̱ꞌkhue̱n niguátaa̱n ná xuajen Atália̱. 26 Ikhín ni̱tu̱ꞌúu̱n ná awúun guꞌwá-rguwa jamí nigúu̱n ná Antiokía̱, ná nigájnúu̱ nákhí waxnáxii̱n ná ñawúun Ana̱ꞌlóꞌ kajngó magóo̱ gúni̱i̱ ñajun rí wámbúu̱n máꞌ nene̱-mbáníi̱ xúge̱ꞌ. 27 Ído̱ niguáꞌnúu̱, a̱ꞌkhue̱n ni̱ru̱wii̱n la tsí nanimbu̱únꞌ juyáá Jesús, jamí nithúu̱n mbá xúgíí rí neꞌne Ana̱ꞌlóꞌ ga̱jma̱á nindxúu̱n ikhii̱n. Xúꞌkhue̱n máꞌ nithúu̱n rí Ana̱ꞌlóꞌ nirmáꞌthoo kajngó xa̱bo̱ tsí ra̱ꞌkháa judío̱ ñajúún ma̱goo ma̱nimbu̱únꞌ juyáá Ana̱ꞌlóꞌ. 28 Jamí phú mba̱yo̱ꞌ ninguanúu̱ ikhín gajmíi̱ tsí nanimbu̱únꞌ juyáá Jesús.