Atos 16

10 Ído̱ Páblo̱ ndiꞌyoo inu-mbiꞌíí rúꞌkhue̱n, a̱ꞌkhue̱n mbá nacha̱ máꞌ ne̱ne̱-mbánu-mijnáxo̱ꞌ kajngó mu̱ꞌguáxo̱ꞌ ná numbaa Masedónia̱, numuu naꞌne jañii a̱kia̱nꞌxo̱ꞌ rí Ana̱ꞌlóꞌ nandxaꞌwáxo̱ꞌ ikhín kajngó mu̱tha̱n-ráꞌaxo̱ꞌ ajngáa máján.

Páblo̱ gajmíí a̱ngui̱in nagóó géjwa̱nꞌ ná Filípo̱s

11 Nitsimaxo̱ꞌ guꞌwá-rguwa rí nagájnuu ná xuajen Tróa̱s, jamí nikuá-jmbaxo̱ꞌ ná Samotrásia̱. Jamí i̱mba̱ mbiꞌi nikuáxo̱ꞌ ná xuajen Neápo̱li̱s. 12 Ikhín nigájnaxo̱ꞌ nikuáxo̱ꞌ ná xuajen Filípo̱s. Xuajen rúꞌkhue̱n phú gíꞌdoo numuu ná numbaa Masedónia̱, jamí mbá xuajñúú xa̱bo̱ Róma̱ ñajuun ne̱. Jamí nijuwaxo̱ꞌ mbá wátha̱ wáa mbiꞌi ná xuajen rúꞌkhue̱n.

13 Mbá mbiꞌi rí nduya̱a xu̱únꞌ xa̱bo̱, nigájnaxo̱ꞌ ná rawuun xuajen, jamí nikuáxo̱ꞌ ná rawuun matha, ná nuthán-jáñíí xa̱bo̱ Ana̱ꞌlóꞌ. A̱ꞌkhue̱n nitrigáanꞌxo̱ꞌ ni̱ndxákuun gajmiáxo̱ꞌ go̱ꞌo̱ tsí ni̱gi̱mbíin ikhín. 14 Ikhín ꞌgí nadxawuun mbáa a̱ꞌgo̱ mbiꞌyuu Lídia̱, tsí na̱ngu̱jwa̱ xtíin rí maña̱ꞌ skuni. Ikhaa̱ na̱ꞌkhe̱e̱ ná xuajen Tiatíra̱, jamí naꞌne-mba̱a̱ jayu Ana̱ꞌlóꞌ. Xómáꞌ Ana̱ꞌlóꞌ nirmáꞌthoo a̱kuii̱n kajngó maꞌgíi̱ idxu̱u̱ rí naꞌthán Páblo̱. 15 A̱ꞌkhue̱n ikhaa̱ waxúꞌdu-maꞌáa̱n ná awúun iya gajmíi̱ xa̱bo̱ guꞌwóo̱, jamí nda̱wa̱á niꞌthán-jáñaxo̱ꞌ: «Xí ikháanꞌlaꞌ na̱ju̱ma̱ꞌlaꞌ rí gakon rí nanimbo̱ꞌ ja̱yo̱o̱ Táta̱, ga̱nújngalaꞌ ná guꞌwóꞌ, jamí ga̱wajúnlaꞌ ikhín». Xkuaꞌnii ni̱ꞌngo̱o̱ neꞌne-rájáanꞌxo̱ꞌ, jamí niwajúnxo̱ꞌ ná guꞌwóo̱.

16 Mbá mbiꞌi rí nakuáxo̱ꞌ gútha̱n-jáñíí Ana̱ꞌlóꞌ, a̱ꞌkhue̱n ni̱ga̱ti̱ya̱a̱ꞌ mbáa dxáꞌgú inaxo̱ꞌ, tsí gíꞌdaa mbáa gíñá ꞌguéen tsí naꞌne rí mba̱ꞌyoo̱ dí ñajuun rí ma̱ri̱gá. Maphú mba̱a̱ mbúkha̱a̱ naꞌnii̱ rí mudaa ña̱ꞌñii̱, ga̱jma̱á numuu rí ndaꞌyoo̱ dí ñajuun rí ma̱ri̱gá. 17 Ikhaa dxáꞌgú tsúꞌkhue̱n na̱ka̱ tsu̱da̱ꞌxo̱ꞌ gajmiáxo̱ꞌ Páblo̱, jamí nandxaꞌwée̱ xáꞌnii: «Xa̱bo̱ tsíge̱ꞌ ñajúún yumbée Ana̱ꞌlóꞌ Mikhuíí, jamí nuthanlaꞌ xáne ma̱goo ma̱jríñáaꞌlaꞌ».