1 Biluumbi na baana ba ngu babaaba hu musyenge a Yuda, baayuhi ti baatu ba baavele Bayudaayo kaka, ba baasiingi mambu ma Nzambi. 2 Mu taangu yi Peetelo hafutihi hu musyenge a Yeruselemi, Bayudaayo ba baasiingi Yisu, baasyembi nde bu: 3 «We miikoto huli ba baavelekete, na we miidya na bo!»

4 Buuna, Peetelo abinduli bo mu tsiki moosi ma maavyohi. Nde aleeli bunuubu: 5 «Me ambeedi hu musyenge a Yafa, na me akatsambila. Me amoni mu imono-miisu, isiha imosi hyakakulamana mu ifwaani hya tsanda yi baakaanga mu matsoso ma mana. Isiha mo hina, hyakasutaha ŋa toto natee huli me. 6 Me akakengese bubwe-bubwe, na me amoni banyama baa miilu mina, bibulu bya bwadi, bibulu bi bibaayene mu bali na banyunyi baa hu yulu. 7 Me anzuhi ndaha mosi yakaleele me: "Teleme Peetelo! Duba na dya." 8 Ka me apfutili: "Naana! Pfumu, ka me kini a handiidi ibaabi ve, buuve hi hyasumaha." 9 Ndaha yabweyuhana hu yulu: "Hina hi Nzambi haleele hya ngidi, a hamono hyo ibaabi tso hyasumaha ve." 10 Imono-miisu mo hina hyamonihili monehele tatu, titswene byosi byakambuhi hu yulu.»

11 «Ka masulubete, babahala batatu ba baamati hu musyenge a Sezare, baayidi hu nzo yi bisu laaba. 12 Livupu la Ngidi laaleeli me mu uyene na bo hwavele utsika. Baana baa ngu mu Kristo basamunu ba me anzidi na bo, baayavehese me hu Sezare. Na bisu boosi laakoti mu nzo a mukuutu Korineye. 13 Korineye ayabisi bisu buni nde hamoni pofi wu akateleme mu nzo a nde na wu akaleele nde ti: "Tsindaha muutu hu musyenge a Yafa mu uyavolo Simoni, nga kuumbu Peetelo. 14 Nde sa aleele we mambu ma mu ubehele we liyobolo. Liyobolo huli we, natee huli ikuta hya we hyoosi."»

15 «Ŋa me ambaandihi utoyo, Livupu la Ngidi laabwidi ŋa yulu a bo, we bu lo laabwidi ŋa yulu a bisu ŋa mbandu. 16 Me anzibwili moonyi mu ma Pfumu haleeli: "Yowani atondihi baatu mu mamba, ka benu, sa batondehe benu mu Livupu la Ngidi." 17 Nzambi aviidi bo kabu li bungodu li laafwana. Ni we kabu li nde havidi bisu mu taangu yi bisu laasiidi hiitu mu Pfumu Yisu Kristo. Buuna, na me ambeedi mu ubisala Nzambi?» 18 Humbisa uyuha mambu mo maana, bo baavudimini, baayusi Nzambi. Bo baaleeli: «Kaahu mbuli, Nzambi amiiva nzila yi usobo mbiili na yi uyaka moonyi a mbuli, huli ba bavele Bayudaayo.»

19 Mbingisili yi yabwidi mu taangu yi baadubi Etyene, yaatumisi banga hiitu mu utsamuha. Bamosi ŋa hati la bo baayeni natee hu itaanzi hya Fenesiya, hu iliiŋa hya Kipere na hu musyenge a Antyokya. Ka bo baakalongese mambu ma Nzambi ndulu huli Bayudaayo. 20 Buuna bakima ŋa hati la bo, ba baaba baa ibiingi hya Kipere na bisu Kilene, bo ka baayeni hu musyenge a Antyokya. Ka bo baakayabisa ka Bangeleke na ulongese bo musamu wu mubwe wa Pfumu Yisu. 21 Matwala ma Pfumu maabeedi na bo. Ni mu buuna, baatu ba banzuhisini baasiidi hiitu mu Pfumu na baaduukili nde.

22 Libundu la Yeruselemi laayuhi tsangu a kinguli buyedi ya baatu mo baana. Lo laatsindihi Baranabasi hu musyenge a Antyokya. 23 Bu nde hayato huuna, nde amoni buni Nzambi hasyemi ba baasili nde hiitu. Nde amoni kinya na ahwadisi bo boosi mu ukangama na hiitu hyoosi mu Pfumu. 24 Baranabasi abeedi muutu wu mubwe, wu aluula mu Livupu la Ngidi na mu imiinu mu Nzambi. Baatu ba banzuhisini baabiisili Pfumu. 25 Titswene, Baranabasi ayeni hu musyenge a Tarese mu uyasaha Sahuli. 26 Bu nde hasooli Sahuli, nde abiti nde hu Antyokya. Bo baboole baavyosi ilima hi itindala itwadi mu libundu mo liina. Bo baakalongese mabuli mamanene ma baatu. Hu Antyokya, ni huuna baateeli bayihi ba Yisu hati a tsomi, ti bo «Bakristo».

27 Mu taangu mo yiina, hwabeedi na mimbihuli mi myamati hu Yeruselemi mu uyene hu Antyokya. 28 Mumosi mu bo nduhi a nde Angabusi, ayabisi mu matwala ma Livupu la Ngidi ti husaali hole, limbunga lilinene sa liba mu toto yoosi. Limbunga mo liina, laavangimi mu taangu yi pfumu a Looma haba nduhi Koloode. 29 Bayihi baavoli kesili ti muutu-muutu mu bo, atsindaha likumbasa huli baana ba ngu ba baakatsahala hu itaanzi hya Yuda. 30 Bo baavangi buuna. Na baatsindihi bungodu mo buuna ŋa myoho mya Baranabasi na Sahuli, huli bakuutu ba libundu baa hu Yuda.