1 Mwa litangu la baatu ba baamati hu tsi a Yuda, baayato hu musyenge a Antyokya. Bo balongisi baana ba ngu ndongisili moyi: «Bavelekete benu we bu huli tumili mikele mya Moose, benu utwala uyoboho ve.» 2 Pahuli na Baranabasi a baasingisili bo ve. Titswene, paha na kele yi mifudi byabwidi ŋa hati la baatu mo baana mu dyaambu mo liina. Libundu laavoli kesili ti Pahuli, Baranabasi na baana ba ngu bakima, bisu Antyokya, baafwana uyene hu Yeruselemi. Ni huuna bo buyatsikaha musamu mowuna huli biluumbi, na huli bakuutu ba libundu.

3 Libundu laaviidi bo likumbasa li lafwana mu uvangimasa mudyenge mowuna. Bo baavyohi mu mukesu bitaanzi bya Fenesiya na Samariya. Bo baakayabisa buni ba bavele Bayudaayo baasobi mbiili mu usa hiitu mu Nzambi. Ikuumbu mo hinihi hyakamweese kinya yinene huli baana ba ngu boosi. 4 Bu bo baatoodi hu Yeruselemi, libundu li Bakristo loosi, biluumbi na bakuutu ba libundu, baayaki bo. Pahuli na Baranabasi baayabisi bo moosi ma Nzambi havangi mu nzila na bo. 5 Bu bo baakava ikuumbu, hwaba na mwaana a kabu mu libundu mo liina, ba baaba Bafarisi. Bo baatelimi, na baaleeli bu: «Bafwana ukete ba bavele Bayudaayo, na utuma bo mu ukiinza mikele mya Moose.»

6 Biluumbi na bakuutu ba libundu baapfuutini mu utsikaha musamu mowuna. 7 Humbisa usobosono minywa, Peetelo atelimi na aleeli bo: «Bana baa ngu ba me, benu liyabi umata beleve, ti Nzambi asooli me ŋa hati la benu. Nzambi asooli me, mana me nzanzabisa Musamu wu Mubwe huli ba bavele Bayudaayo, mana bu bo buyuha nde, bo basa hiitu mu Nzambi. 8 Nzambi wu yaabi matswehi ma mitima mya baatu, aviidi huli ba bavele Bayudaayo Livupu la Ngidi. Nde haviidi bo Livupu la Ngidi, we bu hasiidi mu bisu, mu umweese ti nde a hatimba bo ve. 9 Nde a hasa lisobosono ŋa hati la bo na bisu ve. Bu bo baasiidi hiitu mu Nzambi, nde atsyemisi ka mitima mya bo. 10 Bunuubu, mu hima lili mu usongo Nzambi, mu usaha ukwiha bayihi mupfuna, wu tso bakaaha ba bisu, tso bisu mwakulu, laaveletwala ubita? 11 Ka bisu na hiitu ti ni mu bubwe bwa Pfumu Yisu bisu laamiyoboho, pila mosi we bo, ba bavele Bayudaayo.»

12 Na baatu boosi baasi swii. Buuna, Pahuli na Baranabasi baakayabisa bo biliimbu bya kimuhili, na bipadi bi bo baasiidi mu matwala ma Nzambi, ŋa hati la ba bavele Bayudaayo. 13 Bu bo baamani uyambila, Yaki avoli munywa na aleeli: «Baana baa ngu, yuhaani me! 14 Simoni miibindula benu, buni Nzambi havoli kesili mu usoolo baa bu uba baatu ba nde, ŋa hati la ba bavele Bayudaayo. 15 Na mambu ma maaleele mimbihuli, mali mu uyelemene na vanga mo linili, mu tooni ati baasonehe mu ma Ngidi:

16 "Ŋa mbisa a maana, me unzapfutaha,

we bu uleeli Pfumu.

Me umbwetuunga nzo a Davidi yi yabwidi.

Me utsuula bibaha bi byatsamuhi,

me utsuungaha nzo mo.

17 Na mabuli moosi, na baatu ba mabuli moosi ba me atsoolo,

baatu mo baana bu usaha Pfumu.

Mono ma Pfumu amiileele,

18 wu ayabisi matsimi ma nde umata beleve*.."»

19 Ni mu buuna, Yaki abwebwese bu: «Me tsimi ti, a lisaani bikahu mu ba bavele Bayudaayo ve. Baatu moba, baamiisa hiitu hya bo mu Nzambi. 20 Ka lisonehani bo maniima: "A lidya banyama ba baasumaha, ba baayeholo huli bifwita ve. A lidya misunya mi banyama ba baapinya ŋa mivodi, tso unywa makila ma bo ve. A lisa bumbembo ve*.. 21 Bo a bafwana uvanga maana ve, mu tooni ati, umata tsikulu, baatu bali mu ulongese mikele mya Moose, mu pasi musyenge. Na ubaataanga nde mu manzo moosi ma lisambulu ma Bayudaayo mu pasi saba."»

22 Buuna biluumbi na bakuutu ba libundu, na libundu loosi baavoli kesili yi usoolo mwa bakima ŋa hati la bo. Na utsindaha bo hu Antyokya, nzila mosi na Pahuli na Baranabasi. Bo baasooli Yude nga kuumbu Barasabasi na Silaasi. Bo boole baakuha ŋa hati la bana baa ngu. 23 Baaviidi bo mu ubita muhanda wu baasonehe bunuubu:

«Bisu biluumbi na bakuutu ba libundu, bambaahi baa benu banga imiinu, limiisuula benu baana ba ngu baa laavele Bayudaayo. Bisu limiisuula benu baa lili hu musyenge a Antyokya, hu bitaanzi bya tsi a Siriya na itaanzi hya Silisiya. 24 Bisu laayuha ti baatu ba baamata huli bisu, baayakotese muyungisi na umweese benu boomo mu mambu ma bo. Ka, a bisu laatumasa bo mu dyaambu mo liina ve. 25 Ni mu buuna, bisu boosi laavolo kesili mu itwadi, mu usoolo baatu na utsindaha benu bo. Bisu lutsindaha bo itwadi na bambaahi ba bisu baa litondo, Baranabasi na Pahuli. 26 Ni baatu mo baana ba baamiivahula mivumu mya bo. Bo baavangi buuna, mu tooni isalu hya Pfumu a bisu Yisu Kristo. 27 Bisu limiitsindaha benu Yude na Silaasi, ni bo mwakulu bu uyabisa ma bisu limiisonehe benu mu muhanda mo wunuuwu. 28 Bunuubu, Livupu la Ngidi na bisu, limiivolo kesili mu ubwevelekwiha benu pasi mupfuna, vengo mangidi mo maniima ma maafulala talu: 29 "Uveledya banyama ba baayeholo huli bifwita. Uvelenwya makila, tso udya misunya mi banyama ba babaapinya ŋa mivodi. Uvelesa bumbembo". Hwafwana bubwe, benu mu ubata miina myosi. Saalaani bubwe.»

30 Bo baasiisi baatu ba baasooli mu uyene hu Antyokya. Bu baatoodi huuna, bo baakuukihi libundu loosi na baayakisi bo muhanda. 31 Baatu baataangi muhanda mowuna, na boosi baamoni kinya mu kwadisili yi yaba muuna. 32 Yude na Silaasi, ba baaba mimbihuli bo mwakulu, baatoyi bunzuhisini na baana ba ngu, mu uhwadisa bo na uva bo mifudi mu imiinu. 33 Bo baavyosi mwa bilumbu huuna, titswene bo baakabuhi mu hyenze na baana ba ngu, mu ufutaha huli ba baatsindihi bo. [ 34 Ka Silaasi amoni bubwe mu usaala na bo.] 35 Buuna, Pahuli na Baranabasi, baasaali hu Antyokya. Itwadi na bakima-bakima, bo baakayihasa na baakalongese mambu ma Pfumu.

36 Mwana taangu hole, Pahuli aleeli huli Baranabasi: «Tswende liyamono baana ba ngu, hu misyenge myosi mi bisu a we laalongese mambu ma Pfumu, mu uyamono mbiili a bo.» 37 Baranabasi atsimi ti bo bavolo ka Yowani nga kuumbu Malako, mu uyene na bo. 38 Ka Pahuli a hatondi ti bo babita nde ve, mu tooni ati Yowani akabi manzila na bo hu musyenge a Papfiliya, na nde a habweyakumbasa bo mu isalu hya bo ve. 39 Buuna, paha yinene yatelimi, na bo baakabuhi. Baranabasi avoli Malako, na bo boole baayeni hu iliiŋa hya Kipere. 40 Ka Pahuli asooli Silaasi, na bo ka baayeni, bu baana ba ngu baavondi huli Pfumu mu ukeelese bo, na usyeme bo. 41 Pahuli ataangili matsi ma Siriya na Silisiya mu ubaahwadisa mabundu.