1 Bu Peetelo na Yowani baaba kini mu uyambila na baatu, bangaanga ba Nzambi, na mukuutu bakeedi baa nzo a Nzambi, na Basaduki baayidi. 2 Bo baaluuli mu kesi yindahi mu umono biluumbi bi byole mu ubaalongese baatu. Byo byakayabisa ti mu Yisu, babaakwa utwala usuuha mu lipfu. 3 Ni mu buuna, bu busi bwaba bwakalala, baakangi na baabwahi byo mu kondaayi te ŋa ngwali. 4 Ka, ŋa hati la ba baayuhi mambu ma Nzambi, ba banzuhisini baasiidi hiitu mu Yisu. Buuna, litangu la baatu latoodi bebele a biveeve bitaanu (5 000).

5 Mu ilumbu hi hyaduukili, bapfumu ba Bayudaayo, itwadi na bakuutu ba bo, na milongisi mi Mikele, baakuukimi hu musyenge a Yeruselemi. 6 Hwaba huuna: Ane mukuutu bangaanga ba Nzambi, Kayife, Yowani, Alezande, na baatu boosi ba ibaandu hya nde. 7 Bo baabiti biluumbi ŋa busu bwa bo, na bafuuli byo: «Mu ki matwala, buuve mu nduhi a na benu limiibeloso muutu mo wunuuwu?» 8 Buuna Peetelo, bu haluuli mu Livupu la Ngidi aleeli bo: «Bapfumu na bakuutu ba Bayudaayo, yuhaani! 9 Loloyi bali mu uva bisu byuhu, mu tooni libwe li bisu limiisa huli muutu wu beedi na miilu mi myavolo. Benu lili mu usaha utsikaha buni nde habeluhi. 10 Bisu litondi ti benu litsikaha dyaambu mo linili bubwe, benu boosi, napa baatu ba Isereli boosi. Tso bahala mo linili, lili polo ŋa busu bwa benu, ni mu tooni a nduhi a Yisu Kristo, musi Nazareti. Yisu wu benu laakomini ŋa muti, na wu Nzambi hasuuli ŋa hati la babaakwa. 11 Yisu ni:

"Manya li benu batungi laanyanzi,

na li laakituhi manya la ngu ŋa itungu✝."

12 Liyobolo ndulu mu nde lili. Mu tsi yoosi, Nzambi a hava muutu mukima ve ŋa hati la baatu, wu ufuuhasa bisu a benu.»

13 Baatu ba pfuundu bakuutu baakimuhi hu unzuhisini, mu umono tsiki a Peetelo na Yowani. Bo baamoni ti bo baatu ba baakulamana, na ba baavele a nzaabili. Bo baayabi ti, bo baaba itwadi na Yisu. 14 Ka bu bo baakamono muutu wu abeluhi ateleme ŋa pedu a bo, bo a baabahi dyaambu li ukaala ve. 15 Buuna, bo baatumi bo mu upala mu nzo, na baasaali mu ukese musamu ŋa hati la bo. 16 Bo baakalelesene: «Ipadi mo hya mbuli, bisu a benu hima lu usaani mu baatu mobaniba? Mu tooni ati, baatu boosi ba Yeruselemi, baayabi bubwe ti ipadi mo hinihi mbuli bo baasiidi hyo, na bisu a benu utwala utuna hyo ve. 17 A huli bubwe ve ti dyaambu mo linili lisinzatsamuha ŋa hati la baatu. Lilihaani bo na bukanyi bwosi, bo mu ubweveletoyo mu nduhi a Yisu huli pasi muutu.»

18 Bo baabweteele Peetelo na Yowani, na baakali bo mu mifudi mu utangula na mu ulongese baatu nduhi a Yisu. 19 Ka Peetelo na Yowani baakaali bo: «Monwaani benu mwakulu, tso hwafwana ŋa busu bwa Nzambi mu usiingala benu na uvelesiingala Nzambi. 20 Ka bisu, bisu utwala ubisa mu uyambila mu mambu ma bisu laamono na laayuha ve.» 21 Baatu ba pfuundu banzonzi baakanini bo, titswene baanyahuli bo. Bo a baabahi tooni yi usyembe Peetelo na Yowani ve, mu tooni ati, baatu boosi baakayusa Nzambi mu mambu ma maavangimi. 22 Bahala mo li laabeeluhi mu ipadi, aba amiivyoso maku mana ma bilima.

23 Bu baanyahuli bo, Peetelo na Yowani baayeni huli bambaahi ba bo. Baayabisi bo ma bakuutu ba bangaanga ba Nzambi na bakuutu ba bibandu baaleeli bo. 24 Bu bo baamani uyuha bo, bo boosi baabaandihi usambila Nzambi na uleele: «Pfumu, we ni wu avangi mayulu, toto, mubu na byosi bibili muuna✝. 25 We ni wu aleele mu Livupu la Ngidi li laatoyi mu munywa a kaaha a bisu Davidi, musalili a we ti:

"Mu hima mabuli ma matsi ma bumwenyi

maaminyangumana?

Na matsi maamikuta mapfuundu ma mupu!

26 Batumi baa toto baamivangama

mu mudingu

na bakuutu baamipfutana

mu ulwanisa Pfumu

na Masiya wu nde hasoolo.✝"

27 Ni mbuli: Eloode na Ponse Pilaato baamipfutana mutso musyenge mo wunuuwu. Bo baamipfutana itwadi na baatu ba matsi ma bumwenyi, na bisu Isereli, mu ubelele musalili a we wa ngidi, Yisu. Nde wuuna wu we asoolo Masiya. 28 Bo baavangi maana moosi, we bu we atondi na akeesi mo mu hati a tsomi, mu matwala ma we. 29 Pfumu, mu taangu yiniiyi, mono bu bo bali mu umweese bisu pasi, na va basalili ba we mifudi mi uyalongese mambu ma we na hiitu hyoosi. 30 Mweese matwala ma we, mana babeedu babeeloho. Nyaha biliimbu na bimangu bivangama mu nduhi a Yisu, musalili a we wa ngidi.» 31 Bu bo baakasambila, mbuha yi bo baaba baakuukama yanyingimi. Bo boosi baaluuli mu Livupu la Ngidi, na bo baakayabisa mambu ma Nzambi na hiitu hyoosi.

32 Konge a banga hiitu, yaba na matsimi mamosi, na mutima mumosi. A hwaba na muutu wu akaleele ti busina bwa nde, bwa nde siha ve. Ka byosi bi bo baaba na byo, aba bi itwadi. 33 Na mifudi mi milahi, biluumbi byakata imbangi mu tooni a tsuuhili a Pfumu Yisu. Nzambi akava bo boosi hyese hi hilahi. 34,35 A hwaba na mumosi wu akakiima isiha ve. Mu tooni ati, ba baaba na mangundu buuve manzo, baakasumbasa na baakava mbongo a fwanda huli biluumbi. Titswene biluumbi byakakaba mbongo huli muutu-muutu we bu hwaba manzala ma nde. 36 Hwaba na muutu mumosi nduhi Yosefi, wu baabuti hu iliiŋa hya Kipere, wu ibaandu hya Levi. Biluumbi byakateele nde Baranabasi, mbindulili a nduhi ti: «wu ubaabombesele». 37 Nde asumbisi tsyehe yi nde haba na yo, abehi mbongo, na aviidi yo huli biluumbi.