1 Mukuutu bangaanga ba Nzambi ni ufuula Etyene: «Mambu ma bali mu uleele mu we, mali ma mbuli?» 2 Etyene afutili: «Bataata na baana ba ngu ba me, yuhaani! Nzambi yi muyusu ayamonehele huli kaaha a bisu a benu Abrahami, ŋa nde haba hu itaanzi hya Mezopotami. Nde ayamonehele na nde, tswamina nde mu uyatsahala hu musyenge a Harani. 3 Na Nzambi aleeli nde: "Mata mu tsi a we na buli la we, na yene hu tsi yi me umweese we✝." 4 Abrahami amati mu tsi a bisu Kaledeya na ayatsahala hu musyenge a Harani. Na, humbisa lipfu la taata a nde, Nzambi atsindihi nde mu tsi yi benu lili mu yo loloyi. 5 Huuna, Nzambi a havidi nde iloho tso imosi ve, tso ibuha hi ususa hulu ve. Mu taangu mo yiina, Abrahami a haba na mwaana ve. Ka Nzambi ti asiidi nde nzuhisini li uva nde tsi. Nde asiidi nde ka nzuhisini ti, bikiisa bya nde sa bibaha yo.

6 Nzambi aleeli Abrahami bunuubu: "Bikiisa bya we byutsahala mu tsi bumwenyi, hu bu ukitusa bo baviha. Huuna bu unyongese bo mu makama mana (400) ma bilima. 7 Ka me utsundasa tsi yi yuukitusa bo baviha. Hu mbisa, bo buupala mu tsi bumwenyi na buusalila me mu tsi mo yiniiyi✝." 8 Titswene Nzambi akuti nzuhisini na Abrahami mu iliimbu hya ketili. Ni mu buuna, Abrahami haketi Isaki wu nde habuti, mu ilumbu hya poombo hi hyaduuki mbutili a nde. Isaki kaka pila mosi aketi Yakobi, na Yakobi kaka aketi bakaaha ba bibandu kuumi na byole bi Isereli.

9 Bakaaha baa bibandu baaba na nyengi a Yosefi, baasumbisi nde mu ukitusa nde muviha na baabiti nde hu tsi a Ngipiti. Ka Nzambi akumbisi nde. 10 Nzambi apalisi nde hutso munyongi. Nde aviidi Yosefi hyese mu ubaha buyedi ŋa busu bwa Falahoni, pfumu a Ngipiti. Falahoni asilisi Yosefi, na abyalisi nde mutumi a tsi a Ngipiti yoosi na ŋa yulu nzo a pfumu yoosi.

11 Na limbunga laayabwa mu tsi a Ngipiti yoosi na mu tsi a Kanana. Lo laabehi munyongi wu afulala iteesi, na bakaaha ba bisu a baakabwebaha byudya ve. 12 Bu Yakobi hayuhi ti hu Ngipiti hwaba na byudya, nde atsindihi bakaaha ba bisu huuna tsindaha latsomi, mu uyasumba byudya. 13 Mu tsindaha la mole, Yosefi ayayabaana huli bakulu ba nde. Buuna Falahoni abwani bakulu baa Yosefi, na ayabi huni nde hamati. 14 Titswene Yosefi atsindihi baatu mu uyavolo taata a nde Yakobi, na ibaandu hya nde hyoosi. Bo aba litangu maku tsambu baatu bataanu (75). 15 Yakobi ayeni hu tsi a Ngipiti, te bu nde hakwidi, napa bakaaha ba bisu. 16 Baabiti bamvumbi ba bo hu bula bwa Siseme, na baadiihi bo mu ngila yi Abrahami hasumbi mu mbongo huli baana ba Hamoli, hu bula bwa Siseme.

17 Bu taangu yi ukuhasa nzuhisini li Nzambi hasiidi huli Abrahami yaba bebele, baatu ba bisu baakabutasana na baapfuni hu unzuhisini hu tsi a Ngipiti. 18 Ilumbu imosi, baatsahisi pfumu wu munyatihi wu atumi tsi a Ngipiti. Nde a hatsikihi Yosefi ve. 19 Pfumu mo wuuna apfuti ibaandu hya bisu, na unyongese bakaaha ba bisu. Nde atumisi bo mu utimba bikenyi bya bo mana byo bikwa.

20 Ni mu taangu mo yiina, baabuti mwaana mumosi nduhi Moose. Nde aba mwaana wu mubwe ŋa busu bwa Nzambi. Baabungili nde mu batsungi batatu mu nzo a taata a nde. 21 Mu taangu yi baatimbi nde hu mbadi, mukaasu mumosi, mwaana a Falahoni atoli nde, na abungili nde we mwaana a nde mwakulu. 22 Ni huuna, Moose hayihi nzaabili yoosi ya bisu Ngipiti. Nde abahi matwala ma manene mu bitoyili na mu mavaanga ma nde. 23 Bu Moose hatoosi maku mana (40) ma bilima, nde atsimi uyamono baana ba ngu a nde baa ibaandu, bisu Isereli. 24 Nde amoni musi Ngipiti mumosi, mu ubeete musi Isereli. Moose avolili nde mileembe. Na mu ufutala pindu, Moose adubi musi Ngipiti mo wuuna. 25 Moose atsimi ti baana bangu a nde bisu Isereli, bu utsikaha ti Nzambi tondi usalila nde mu uyobolo bo. Ka bo a baakatsikaha tso hole ve. 26 Ŋa ngwali, Moose amono bisu Isereli boole mu ulwana, nde atondi ufutala hyenze ŋa hati la bo. Nde aleeli bo: "Benu ti baana ba ngu lili. Ka mu hima lili mu ulwana benu mo na benu mo?" 27 Ka muutu wu akwamisi wuna, atsindihili Moose na uleele nde: "Na asoolo we mu uba mukuutu na nzonzi ŋa hati la bisu? 28 We kaka me tondi uduba, we bu we aduba musi Ngipiti matsiha?" 29 Moose ayuha buuna, nde abati na ayatsahala hu tsi a Madyani. Huuna, nde abuti baana boole ba babahala✝.

30 Bilima maku mana (40) bivyoho, pofi mumosi ayamonehele na Moose hutso a kumu a nzala, bebele na isyelo hya Sinayi. Pofi ayamonehele mu ludi la mbaahu, li laakalulaha mu muti nga matsyende. 31 Moose akimuhi bu nde hamoni imono-miisu mo hina. Ka bu nde hakayasusaha mu utsikaha ŋa bebele, nde ayuhi ndaha a Pfumu yaleeli: 32 "Me ni Nzambi bakaaha ba we, Nzambi ya Abrahami, ya Isaki na ya Yakobi!" Bu hakatsula likamba mu boomo, Moose a habweyehele utala ve.

33 Pfumu aleeli nde: "Kuula bikoodi bya we mu miilu, mu tooni ati, mbuha yi we ateleme, yili mbuha ya ngidi. 34 Me amono buni bali mu unyongese baatu ba me hu tsi a Ngipiti. Me anzuha mibima mya bo na me anza mu uyobolo bo. Bunuubu yene! Me tondi utsindaha we hu tsi a Ngipiti✝." 35 Moose mo wunuuwu, wu bisu Isereli banyanzi na uleele: "Na asoolo we mu uba mutumi na nzonzi?" Nzambi atsindaha nde mu uba mukuutu na muyobili, mu likumbasa la pofi wu ayamonehele na nde mu mbaahu mu muti nga matsyende✝. 36 Ni Moose apalisi bisu Isereli hu Ngipiti, na ubaavanga bimangu na biliimbu mu tsi mo yiina. Nde asiidi buuna kaka, hu Mubu wu abenge na hu kumu a nzala, mu maku mana (40) ma bilima✝. 37 Ni Moose mo wunuuwu kaka, abweleele huli bisu Isereli ti: "Nzambi upalisa ŋa hati la benu mumbihuli we me, wu uba inama hya buli la benu✝." 38 Ŋa yulu a ŋana, bu buli la baatu ba Isereli laba laakuukama hu kumu a nzala, nde ni wu akateleme na bakaaha ba bisu. Nde aba kaka na pofi wu akatoyo na nde ŋa yulu isyelo hya Sinayi. Nde ayaki mambu ma moonyi ma Nzambi, mu utoosele bisu✝. 39 Ka bakaaha ba bisu baabisi usiingala nde. Bo baanyasuli nde hutso mutima, bo baafutihi hu Ngipiti✝. 40 Bo baayaleele Aroni: "Vangila bisu binza-nzambi bi byukaabita bisu. Mu tooni ati, bisu a liyabi ki dyaambu laamiibwila Moose wu apalisa bisu mu Ngipiti ve✝." 41 Bo baavangi ifwita hya mwaana a ngombe, na bo baaviidi bungodu huli ifwita mo hiina. Bo baasangili mavaanga ma myoho mya bo✝mu kinya. 42 Ka Nzambi atehili bo mbisa, na anyahi bo bayusa bamvwelele baa hu yulu, we bu baasonehe mu muhanda mimbihuli:

"Buli li Isereli, mu mbuli, ni huli me

benu laayeholo banyama na bungodu bukima,

mu maku mana (40) ma bilima hutso a kumu a nzala?

43 Naana, benu laabiti binza-nzambi bya benu:

nzo a ngooto ya Molooke,

benu laabiti ifwaani hya mvwelele a benu Refani.

Ni bifwita bya benu bi laavaangi mu myoho mya benu,

mu ukongemene na usalila byo.

Ni mu buuna, me utsindaha benu lala mu buviha

na tsi a Babylooni✝."

44 Hutso a kumu, bakaaha ba bisu, baaba na nzo a ngooto, huuna hwaba na kasu a ngidi ya nzuhisini la Nzambi. Baatungi yo we bu Nzambi havidi tumili huli Moose, mu uduukala ifwaani hi nde hamoni. 45 Humbisa, baaviidi nzo mo a ngooto, huli tungi li laakaduuka bakaaha ba bisu. Bo baabiti yo, ŋa bo baaba hutso lituma la Yosuwa. Bo baabiti yo mu tsi yi bo baapatuli huli baatu bakima, baa Nzambi habingi ŋa busu bwa bo. Yo yakwilili huuna natee mu taangu a pfumu Davidi. 46 Davidi abahi hyese hya Nzambi, na avondi nde muswa mu utunga mbuha yi bikiisa bya Yakobi byukasambila Nzambi. 47 Ka monwaani, ni mwaana a nde Soolomo atungili nde yo. 48 Ka Nzambi a Pungu, a hubaatsahala mu manzo ma baatu baatunga mu myoho mya bo ve. We bu baasonehe mu libuuku la mumbihuli:

49 "Pfumu aleeli: ‘Yulu ni kiti-ipfumu hya me,

na toto ni isuusili hya me hya miilu.

Ki pila a nzo litondi utungala me?

Ŋa ki mbuha me utwala upuma?

50 Me ni wu avanga bi byosi mu myoho mya me✝!’"

51 Benu baatu ba lili na mitswe ngolo. Mitima mya benu mili ngototo, na matswi ma benu maakinda mu mambila ma Nzambi. Benu libaabisa usiingala taangu yoosi Livupu la Ngidi! Benu lili we bakaaha ba benu! 52 Ki mumbihuli bakaaha ba benu baavelitsuta? Bo baadubi boosi ba baayayabisa nziili a wuuna wu asungama. Na bunuubu, nde ni wu benu laayehuli na laadubi. 53 Benu laayaki mikele mya Nzambi mu likumbasa li bapofi, na benu a laakeeli myo ve.»

54 Baatu ba pfuundu banzonzi baadasuhi hu unzuhisini, bu baayuhi mambu mo maana. Mu tooni a mambu ma Etyene, bo baakakwete miinyu ma bo na kesi yoosi. 55 Ka nde, bu haba wu aluula mu Livupu la Ngidi, atali hu yulu. Nde amoni muyusu a Nzambi, na Yisu ateleme ŋa mbahala a Nzambi. 56 Nde aleeli: «Yuhaani, me ndi mu umono mayulu bwasi, na Mwana a Muutu ateleme ŋa mbahala a Nzambi!» 57 Bo baafulihi mu mifudi, na bo baadibuhi matswi ma bo. Bo boosi mu itwadi baayitumini ŋa yulu a nde. 58 Bo baapalisi nde hu mbadi musyenge, na baalangi nde mamanya mu tooni uduba nde. Bambangi baasiisi bikutu bya bo ŋa miilu mi mufudu mbahala mumosi nduhi Sahuli, mu ukeelese byo. 59 Bu baakalanga nde mamanya, Etyene akasambila bunuubu: «Pfumu Yisu, yaka iluunzi hya me!» 60 Titswene nde atsokimi na afulihi mu mifudi: «Pfumu, sa bo kolo-kolo mu lisumu mo linili!» Bu nde hamani uleele buuna, nde amani muvumu.