1 Bilumbu bitatu bi byaduuki nziili a nde hutso itaanzi, pfumu Fesitusi amati musyenge a Sezare mu uyene hu musyenge a Yeruselemi. 2 Bakuutu ba bangaanga ba Nzambi na bangeele baa Bayudaayo, baayakese Pahuli ŋa busu bwa pfumu mo wunuuwu. Bo baalembisini nde, 3 mu uvangila bo dyaambu li lumweese bo kinya, mu ufutala Pahuli hu musyenge a Yeruselemi. Bo baasiidi buuna, mu tooni ati bo baakuti pfuundu mu uduba nde mu nzila. 4 Ka Fesitusi afutili na aleeli: «Pahuli mu kondaayi ali hu musyenge a Sezare. Me mwakulu a utaamba mu dwe huuna ve.» 5 Nde abweleele li: «Nyaha bakuutu ŋa hati la benu bakulamana na me hu musyenge a Sezare. Na bo bayakese bahala mo linili, tso nde avanga dyaambu lilibi.» 6 Fesitusi avyosi ndulu bilumbu poombo buuve kuumi na bo, titswene nde afutihi hu musyenge a Sezare. Mu ilumbu hi hyaduuki, nde ayeni hu nzo a tsundusu na nde atumi babehele nde Pahuli. 7 Bu Pahuli hayato, Bayudaayo ba baamati hu musyenge a Yeruselemi baayadiinga nde. Bo baakwihili nde matooni ma malahi ma manono, hwavele utwala umweese bumbuli bwa mo. 8 Ka Pahuli akakala nyutu a nde. Na akaleele: «Me a hatsa lisumu tso limosi ve, tso ŋa busu bu mikele mi Bayudaayo, tso ŋa busu bwa nzo a Nzambi, tso ŋa busu bu lituma la pfumu a tsi, Kayisaali.» 9 Fesitusi wu akasaha bukaanga na Bayudaayo, afuuli Pahuli: «We siingi uyene batsundasa we, mu dyaambu mo linili ŋa busu bwa me, hu Yeruselemi?» 10 Pahuli afutili: «Me miiteleme ŋa busu bwa tsundusu yi yili hutso lituma la Kayisaali, ni ŋa baafwana utsundasa me. Me a hatsa dyaambu lilibi huli Bayudaayo ve, we bu we mwakulu yaabi lo bubwe-bubwe. 11 Tso me ndi na matooni, buuve tso me apaanga dyaambu li bafwana uduba me, me a humbata lipfu ve. Ka tso baatu mobaniba bali mu ukwiha me matooni ma upfuta, a huli na muutu wu uli na muswa mu uvahula me ŋa myoho mya bo ve. Me tondi ti lituma la Kayisaali, litsundasa me.» 12 Buuna, Fesitusi bu hamani pfuundu na batsyengi ba nde, afutili: «We miitondo ti Kayisaali nde mwakulu nga tsi, atsundasa we. We sa yene ŋa busu bwa nde.»

13 Humbisa a mwa bilumbu, pfumu Agilipa na Belinisi kedi a nde, baayidi hu musyenge a Sezare mu uyasuula Fesitusi. 14 Bu bo baavyosi bilumbu bi bilahi huuna, Fesitusi ayabisi huli mutumi musamu a Pahuli. Nde aleeli bu: «Me ndi ŋa na bahala limosi, li Felikisi hasiisa hutso a kondaayi. 15 Ŋa me anzyeni hu Yeruselemi, bakuutu ba bangaanga ba Nzambi, na bakuutu ba Bayudaayo, baayakese muutu mo wunuuwu. Na baayavondo me mu ukotese nde mu kondaayi. 16 Me anzabisa bo ti bisu Looma a bali na ipfu hi uvahula pasi nde hu lipfu, hwavele nde umaakala nyutu a nde ŋa busu bu matooni ma baakese nde ve. 17 Na bo baayidi ŋa na me. Mu mawasa, ilumbu hi hyaduuki, me atumi mu ubehele me bahala mo linili na me apaangi dyaambu. 18 Ba baayakese nde bu baayidi, me amoni ti matooni ma bo baakesi nde, a maaba we bu me akatsima ve. 19 Tooni ndulu ukaakana mu biyusili bya Nzambi a bo mwakulu. Bo baakakaakana ka mu tooni a muutu mumosi wu bali mu uteele Yisu, wu akwa. Pahuli li mu usilasa ti, nde moonyi ali. 20 Aba pasi huli me, mu ukese musamu wa pila yina. Mono bu me apfuula nde tso nde tondi uyene hu musyenge a Yeruselemi, mana batsundasa nde huuna. 21 Ka Pahuli abisa buuna. Nde avondi ti bayavaanga dyaambu la nde ŋa busu bu lituma la nga tsi, Kayisaali. Buuna, me atuma bakeelese nde mu kondaayi, tswamina me tsindaha nde huli Kayisaali.» 22 Agilipa aleeli Fesitusi: «Me kaka tondi uyuha bahala mo linili.» Fesitusi afutili: «Ngwali we uyuha nde.»

23 Ilumbu hi hyaduuki, Agilipa na Belinisi baayidi mu konge na muyusu woosi, na baakoti mu nzo a tsundusu. Bo baakoti na bakuutu ba masadaadu na baa bubaatuma musyenge. Fesitusi atumi babehe Pahuli. 24 Na Fesitusi aleeli: «Pfumu Agilipa na benu baa lili na bisu, benu lili mu umono bahala mo linili. Buli li Bayudaayo loosi laayakese nde huli me, umata hu Yeruselemi natee huni. Bo bali mu ubafulaha mu mifudi, ti bafwana uduba nde. 25 Me amono ti nde a habuka dyaambu, li bafwana uduba nde mu love. Ka nde mwakulu, bu hatondi ti nga tsi Kayisaali avanga dyaambu la nde, me moni ti hwafwana me mu utsindaha nde ŋa busu bwa nga tsi. 26 Ka me a ndi na la tsiki mu usonehe huli nga tsi mu tooni a Pahuli ve. Ni mu buuna, me tondi ti batsundasa nde ŋa busu bwa we, pfumu Agilipa. Me atsiidi buuna, mana me mbaha ma me utsonehe, humbisa a byuhu bya we. 27 Mu tooni ati, a hwafwana mu utsindaha ikondaayi hu Looma, hwavele uyabisa mu tsiki, matooni ma kesili a nde ve.»