1 Humbisa ukabuha na bo, bisu laakoti mu likuumbi la nzali mu uyene hu tsyelo iliiŋa hya Koose. Ŋa ngwali, bisu laayato hu iliiŋa hya Lodesi. Limata ŋaana, bisu laayeni hu musyenge a Patala. 2 Huuna, bisu laabiisi likuumbi li laakasabuha hu tsyelo a tsi a Fenesiya. Buuna, bisu laakoti mu lo na laayeni. 3 Bu laatoodi bebele mu utalila iliiŋa hya Kipere, bisu laakulimini hu baanda iliiŋa mo hina, mu uyene hu tsyelo a tsi a Siriya. Bisu laatsikimi hu simu la kaasu li musyenge a Tiilo, hu baapalisi makatu mu likuumbi. 4 Huuna, bisu laabiisi banga hiitu, na laatsahili bilumbu tsambu na bo. Hutso a nzaabili Livupu la Ngidi, bo baaleeli huli Pahuli mu uveleyene hu musyenge a Yeruselemi. 5 Ka bilumbu tsambu bifwa, bu laabwevolo nzila, bo boosi baayavehese bisu, na bakadi ba bo, na baana ba bo, natee hu mbadi musyenge. Bu laatoodi ŋa simu li mubu, bisu laatsokimi, na laasambili Nzambi. 6 Titswene, bu laamani ulanisa bambaahi, bisu laakoti hutso likuumbi la nzali, bo baafutihi mu manzo ma bo. 7 Bisu laamani mudyenge a bisu ŋa yulu mubu, umata hu Tiilo natee hu musyenge a Tolemayise. Bisu laaviidi mabwehe huli baana ba ngu baa musyenge mo wunuuwu. Bisu laavyosi ilumbu imosi na bo. 8 Ilumbu hi hyaduuki, bisu laabwevolo nzila na laayato hu musyenge a Sezare. Huuna, bisu laayakoto mu nzo a Filipo, wu bubaateele «iluumbi hi Musamu wu Mubwe», na bisu laatsahili hubwa nde. Nde aba mumosi mu tsambu li bakeelisi balibundu, ba baasooli hu Yeruselemi. 9 Nde aba na banuumba ba baaba baavelekwele, ba baakabihula. 10 Bisu laaba huuna bilumbu bi bilahi, ŋa mumbihuli mumosi nga nduhi a Angabusi, wu amati hu tsi a Yuda, hayidi. 11 Nde avoli mudi a luungu wa Pahuli, akuti miilu na myoho mya nde mwakulu, na aleeli: «Yuhaani mamali mu uleele Livupu la Ngidi: "Bahala nga mudi mo wunuuwu, Bayudaayo sa bakuta nde mu ifwaani mohi hu Yeruselemi, na sa bayeholo nde ŋa myoho mya byenyi."» 12 Bu laamani uyuha maana, bisu, na babaaba ŋaana, laayayini Pahuli mu uveleyene hu musyenge a Yeruselemi. 13 Ka Pahuli akaali: «Mu hima benu lili mu ulila na lili mu umweese me pasi mu mutima? Me ndi wu avangama, me Pahuli, ndulu a mu usa ti bakuta me ve. Ka napa mu ukwa hu musyenge a Yeruselemi, mu tooni muyusu wu afwana mu Pfumu Yisu.» 14 Bu bisu laavelitwala usa ti nde asobo tsimi, bisu laanyahi, na bisu boosi laaleeli: «Nyaha litondo la Pfumu Nzambi livangama!»

15 Humbisa a mwa bilumbu mo biina, bisu laavangimi na laakumi hu musyenge a Yeruselemi. 16 Kabu li bayihi ba musyenge a Sezare, laayabiisala bisu. Bo baabiti bisu huli muutu wu avangimi mu uyaka bisu hubwa nde. Nduhi a nde Manasoni, musi iliiŋa hya Kipere, wu aba muyihi umata beleve.

17 Bu bisu laayato hu musyenge a Yeruselemi, baana ba ngu baayaki bisu mu kinya. 18 Ilumbu hi hyaduuki, Pahuli ayeni na bisu huli Yaki. Bakuutu ba libundu boosi baayatsonzomo ŋaana. 19 Pahuli ayava bo mabwehe. Humbisa, nde ayabisi bo moosi ma Nzambi havangi ŋa hati la ba bavele Bayudaayo. 20 Bu baamani uyuha nde, bo baayusi Nzambi. Titswene bo baaleeli huli Pahuli: «Mwana a ngu, we miimono buni biveeve bi Bayudaayo bamiikoto mu buli la Kristo. Bo boosi aba babaasinzakangama mu mikele mya Moose. 21 Ka, mono ma baaleele mu we: we li mu ulongese huli Bayudaayo, ba bali mu utsahala ŋa hati li bibandu bikima, mu utimba mikele mya Moose. Baaleele ti, we li mu ulongese bo mu ubwevelekete baana ba bo, na mu ubweveleduukala bukulu bu Bayudaayo. 22 Buni luusa? Mu tooni ati, bo sa bayuha ti we miya. 23 Ni mu buuna, sa ma bisu lu utuma we mu usa. Tala me, bisu lili na babahala bana ŋa hati la bisu, ba bamiisa mulabu mu Nzambi. 24 Volo bo. Koto na bo, mu utsyemese manyutu ma bo. Futa mbongo, mana bakuula mitswe mya bo. Na baatu boosi sa bayaaba ti, moosi ma baaleele mu tooni a we, mali ma upfuta. Na ti we ka ubaadyata hutso lituma li mikele mya Moose. 25 Ka huli ba bavele Bayudaayo, ba baamiisingama mu Kristo, bisu laasonehele bo mu uyabisa makesili ma bisu. Bo a baafwana udya tso banyama ba baadubala bifwita ve, tso banyama ba baapinya ŋa mivodi, tso unywa makila, na bo baafwana usa mifudi mu uvelesa mayamba✝.»

26 Buuna, mu ilumbu hi hyaduuki, Pahuli avoli babahala mo babana, bo babaandihi utsyemese nyutu a bo. Humbisa, nde akoti mu nzo a Nzambi, mu uyayabisa ki taangu bilumbu bya tsyemili a bo byufwa. Na ki taangu muutu-muutu mu bo, hu uva bungodu✝ bu bwayelemene huli Nzambi.

27 Bu bilumbu tsambu mo byaba hupedu ufwa, Bayudaayo bakima baa itaanzi hya Asiya, baatalili Pahuli hutso litandala la nzo a Nzambi. Bo baatumbisi konge a baatu yoosi, na baakangi nde. 28 Bo baakafulaha: «Bisu Isereli, yakumbasaani bisu! Monwaani muutu mo wunuuwu li mu uva huli boosi, matsyelo moosi, ndongisili yi yavelebaambana na buli la bisu, na mikele mya Moose, na nzo a Nzambi. Ŋaniiŋa, nde miiyakotese te ba bavele Bayudaayo mu litandala la nzo a Nzambi, na usumana mbuha ya ngidi yi!» 29 Bo baaleeli buuna, mu tooni ati bo baamoni muutu mumosi, nduhi Tolofime musi Efeso, na Pahuli hutso musyenge. Muutu mo wuuna aba musi musyenge a Efeso*. Bo baakatsima ti, Pahuli akotisi Tolofime mu litandala la nzo a Nzambi. 30 Buuna, kele yabwidi hutso musyenge woosi. Baatu baayidi mawasa-mawasa, mu matsyelo moosi. Bo baakangi Pahuli, na baadutihi nde mu upalisa nde mu litandala la nzo a Nzambi. Humbisa, bo baadibuhi bikotili bya mumbu a nzo a Nzambi.

31 Baatu mo baakasaha uduba Pahuli. Bo baayayabisa huli mukuutu balwani, baa tsi a Looma baa hu Yeruselemi, ti musyenge woosi aka hutso a hyalasasa. 32 Mu mawasa, mukuutu balwani akungi masadaadu, na batumi baa mo. Nde ayeni lititinu na bo hu tsyelo yi konge a baatu yaba. Bu bo baamoni mukuutu balwani na masadaadu, bo baanyahi utete Pahuli. 33 Buuna, mukuutu balwani ayasusaha hupedu a Pahuli. Nde atumi ukaanga Pahuli, na ukutala nde mapanga moole. Titswene nde afuuli nde, nde na haba, na nde hima hasiidi. 34 Ka ŋa hati la konge, bamosi baakafulaha dyaambu limosi. Bakima baakafulaha likima. Mu tooni a hyalasasa, mukuutu balwani a hatwali ukaanga tso limosi la tsiki ve. Nde atumi mu ubita Pahuli hutso a mumbu masadaadu. 35 Bu Pahuli hatoodi ŋa ikaada hya mumbu, masadaadu maatsyeti nde, mu tooni mafufu ma maaba na konge a baatu. 36 Bu maambu mo maniima maakavyoho, baatu boosi baakaduukala nde na ubaafulaha: «Dubaani nde!»

37 Mu taangu yi baakiikotese nde hutso a mumbu, Pahuli aleeli huli mukuutu masadaadu: «Me utwala uleele we dyaambu?» Mukuutu masadaadu afuuli nde: «We yaabi utsuha Ingereke? 38 We a ni musi Ngipiti wu atumbisi baatu, na wu abiti biveeve bina bi badubi ba baatu hu bwadi ve?» 39 Pahuli afutili: «Me Muyudaayo ndi, wu baabuta hu musyenge a Talasi hu tsi a Silisiya, musi musyenge wu munene. Kolo-kolo a we, va me muswa mu utoyo huli kuungi la baatu.» 40 Mukuutu balwani aviidi nde muswa. Pahuli, mu tele ŋa yulu ikaada hya mumbu, avuhi hoho mu uyungasa kele. Na nde atsuhi huli bo mu ndaha Ibeleho.