1 Mu bilumbu mo biina, litangu li bayihi laakapfuna, Bayudaayo ba baakayambila ndaha a Bangeleke, baakaŋono. Bo baakaŋono mu tooni ati, pasi ilumbu, mu taangu a kabili a byudya, Bayudaayo ba baakayambila Ibeleho, baakafumbasa bakwili ba bo ba bakaasu. 2 Ni mu buuna, kuumi biluumbi byole byakungi konge yoosi yi bayihi, na baaleeli: «A hwafwana huli bisu mu unyaha ulongese mambu ma Nzambi mu tooni a isalu hya kabili a byudya ve. 3 Ni mu buuna, baana ba ngu, soolowaani ŋa hati la benu, babahala tsambu baa buutiila imbangi hi ibwe, ba baaluula mu Livupu la Ngidi na mu tsiki. Na bisu a benu livaani bo isalu mo hiniihi. 4 Buuna bisu lu ukaahwada taangu yoosi, mu lisambulu na mu isalu hi ulongese mambu ma Nzambi.»

5 Baatu boosi baasiingi mambu ma bo baayabisi. Ni mu buuna, bo baasooli Etyene bahala li laaluula mu hiitu na mu Livupu la Ngidi, Filipo, Pokole, Nikanoli, Timoni, Palamenasi na Nikolasi musi Antyokya, wu asiingi usalila Nzambi Bayudaayo. 6 Na baamweesi bo huli biluumbi, bi byasambili mu bo na byasuusili bo myoho. 7 Mambu ma Nzambi maakatsamuha, litangu li bayihi laakakula bunzuhisini hu Yeruselemi. Na litangu lilinene li bangaanga ba Nzambi, baakasa hiitu mu Yisu.

8 Etyene wu aba aluula mu matwala na mu hyese akavaanga bipadi na bimangu bibinene ŋa hati la baatu. 9 Mwa litangu la baatu layakaakana na nde. Baatu mo baana aba baa kabu la baatu ba nzo lisambulu yi Bayudaayo, li bakateele kabu li «baviha na ba baaba bunyanga». Kabu mo aba na Bayudaayo ba misyenge mya Kilene na baa mya Alekizandi. Itwadi na bakima baa hu itaanzi hya Silisiya, na baa tsi ya Asiya, bo boosi baakakini na Etyene. 10 Ka bo a baatwali ubiingala nde ve, mu tooni ati nde akayambila mu tsiki yi Livupu laakava nde. 11 Ni mu buuna, bo baayuhisini na baatu, na uva bo mbongo, mana baatu mo baana baleele: «Bisu layuha nde mu utuha Moose na Nzambi!» 12 Bo baatelimisi baatu boosi ŋa yulu a nde, bakuutu ba mabuli, na milongisi mi Mikele. Titswene bo baakangi nde mu mifudi na baabiti nde hu pfuundu banzonzi baa Bayudaayo. 13 Bo baabiti ka bambangi baa mapfuta mu uyakese nde. Bo baaleeli: «Bahala mo linili lili mu ukwilala mu ubaayambila bubi, mu tooni a nzo a Nzambi a bisu ya ngidi na mu mikele mya Moose! 14 Bisu laayuha nde mu uleele ti Yisu, musi Nazareti, utsala nzo a Nzambi na usanza bipfu bi Moose hasiisili bisu.» 15 Boosi ba baaba baatsahala hutso a nzo a pfuundu banzonzi baa Bayudaayo, baasungimini Etyene, na baamoni hiinzi hya nde hyakituhi we hya pofi.