1 Na Sahuli asilisi lipfu la Etyene.

Ilumbu mo ni hiina, hwabaandihi mbingisili yinene mu Libundu la Yeruselemi. Banga hiitu boosi, vengo biluumbi, baatsamuhi mu bitaanzi bya Yuda na Samariya. 2 Baatu ba baakiinza Nzambi, baayadiiha mvumbi a Etyene na baalili hu unzuhisini mu tooni lipfu la nde. 3 Sahuli, akahwada mu utsala Libundu. Nde akakoto mu pasi nzo, akakaanga banga hiitu, babahala na bakaasu, na ubaabwaha bo mu kondaayi.

4 Banga hiitu ba baatsamuhi baakataangila tsi, na ubaayabisa Tsangu yi Mbwe. 5 Filipo ayeni hu musyenge a Samariya, na akayabisa Kristo huli baatu. 6 Bu makonge maakayuha nde, na ubaamono bipadi bya kimuhili bi nde hakasa, baatu boosi baasiidi hiitu mu mambu ma Filipo hakaleele. 7 Mu mbuli, mavupu ma mabi maakapala mu baatu ba banzuhisini, na maakafulaha mu mifudi. Bikata na banga matsode ba banzuhisini baabeluhi. 8 Buuna, baatu ba musyenge woosi baaba mu kinya yindahi. 9 Bahala limosi nduhi Simoni, wu aba amiiteehele hu musyenge mo wuuna, akasa mavingu, akakimusa bisu Samariya na nde akamonehele ti nde muutu wa tsongo. 10 Baatu boosi, umata bangebe natee bakuutu, baakakangama na nde, na ubaaleele: «Muutu mo wunuuwu, ni litwala la Nzambi li bubaateele ti "Litwala li Linene".» 11 Bo baakakangama na nde mu tooni ati, nde aba amiidinga na ubaakimusa bo mu mavaanga ma nde ma mavingu. 12 Ka bu makonge ma baatu maasiidi hiitu mu Tsaangu Yimbwe yi Filipo hakayabisa bo mu Ipfumu hya Nzambi na mu Yisu Kristo, babahala na bakaasu boosi baayaki tondihili. 13 Simoni nde mwakulu asiidi hiitu, na ayaki tondihili, nde a habwetahuha na Filipo ve. Na nde akakimuha mu bimangu na bipadi bibinene bi byakavangama.

14 Bu biluumbi bi byaba hu Yeruselemi byayuhi ti bisu Samariya baasiingi mambu ma Nzambi, bo baatsindihi Peetelo na Yowani. 15 Bu biluumbi bi byole byatoodi hu Samariya, baasambili mu banga hiitu mana bo bayaka Livupu la Ngidi. 16 Mu tooni ati, Livupu la Ngidi aba kini a laabwa ŋa yulu a pasi muutu mu bo ve. Bo baayaki tondihili ndulu ya mu nduhi a Pfumu Yisu. 17 Buuna, Peetelo na Yowani baasuusili bo myoho, na bo baayaki Livupu la Ngidi.

18 Bu Simoni hamoni ti banga hiitu baayaki Livupu la Ngidi humbisa a hu biluumbi byasuusili bo myoho, nde abehili bo mbongo na aleeli: 19 «Vaani me kaka matwala mo maana, mana pasi nde wu me utsuusala myoho, ayaka Livupu la Ngidi.» 20 Ka Peetelo afutili huli nde: «Nyaha mbongo a we yinyambaana na we mwakulu! We tsimi ti, bungodu bwa Nzambi utwala usumba bwo mu mbongo? 21 We a hali na kabu tso muswa mutso musamu mo wunuuwu ve. Mu tooni ati, mutima a we a hali wu asungama ŋa miisu ma Nzambi ve. 22 Ni mu buuna, maasa tsimi a we yimbi mu mutima a we. Vondo huli Pfumu asa we kolo-kolo, tso nde tondi, bu we bahi tsimi mo yiina. 23 Mu mbuli, me ndi mu umono ti we aluula mu nyengi, na we li muviha a masumu.» 24 Simoni ni uleele huli Peetelo na Yowani: «Sambilaani Pfumu benu mwakulu mu tooni a me, mana pasi dyaambu livelebwila me mu moosi ma benu lileeli me.» 25 Bu baamani uta imbangi mu Yisu Kristo, mu ubaayabisa mambu ma Pfumu, biluumbi bi byole byafutihi hu Yeruselemi. Mu nzila, bo baakayabisa Tsaangu Yimbwe mu mala ma malahi ma Samariya.

26 Pofi a Pfumu mumosi aleeli huli Filipo: «Yene hu tsyelo a Sude, mu nzila yi yibaakulamana umata hu musyenge a Yeruselemi natee hu musyenge a Ngaza, yibaavyohele mu kumu a nzala.» 27 Mu mawasa Filipo atelimi na ayeni. Nde abiisili muutu wu baaba baavangula, musi tsi a Etyopi mumosi, mukuutu wu munene mu Etyopi*. Nde akakeelese busina bwa Kandaase, pfumu wu mukaasu hu Etyopi. Nde wuuna wu ayidi hu Yeruselemi mu uyasambila Nzambi. 28 Na nde akafutaha hu tsi a nde. Nde aba atsahala ŋa yulu likuumbi li babuuru baakaduta. Akabaatanga itini hi muhanda wu mumbihuli Esaya. 29 Livupu la Ngidi laaleeli huli Filipo: «Yene bebele na likuumbi mo liina.» Musi tsi a Etyopi 30 Filipo ayeni tiinu, na nde ayuhi musi Etyopi mu utanga mambu ma mu muhanda wu mumbihuli Esaya. Buuna Filipo afuuli nde: «We li mu utsikaha ma we li mu utaanga?» 31 Bahala ni ufutala nde ti: «Buni me utwala utsikaha mo, tso muutu a habinduli me mo ve?» Na nde avondi Filipo mu uvata na mu utsahala ŋa pedu a nde. 32 Mambu ma nde hakataanga maakaleele bunuubu:

«Nde aba we limeme li bali mu ubita hu idubili.

Nde aba we mwaana limeme wu avele na ndaha,

ŋa busu bwa muutu wu uli mu upfuha lo myoso.

Nde a hadibuli munywa ve.

33 Baamweesi nde tsonyi,

na baatsundisi nde hwavele butsiitsa.

Na uva tsangu bikiisa bya nde?

Ka baakesi idiingu hya nde ŋa toto✝.»

34 Musi Etyopi afuuli Filipo: «Kolo-kolo a we, leele me, mu tooni a na mumbihuli ali mu uyambila bunuubu? Mu nde mwakulu, vo mu muutu mukima?» 35 Na Filipo abaandihi ubindula nde mambu mo maana, na ayabisi nde Tsaangu Yimbwe ya Yisu. 36 Bu baaba mu nzila, bo baayato ŋa mbuha mosi yi yaba na mamba. Buuna musi Etyopi aleeli: «Mono mamba, hima hyukondosono me mu uyaka tondihili a me?» [37 *] 38 Nde atsikimisi likuumbi. Filipo akulimini na nde hutso a mamba, na atondihi nde. 39 Bu bo baapali hutso a mamba, mawasa-mawasa, Livupu la Pfumu laamasi Filipo ŋa mbuha mo yiina. Mutumi a habwemono nde ve. Ka nde akaduukala nzila a nde na kinya yoosi. 40 Filipo amonihili hu musyenge a Azoti, titswene nde akayene mu misyenge myosi mu ubaayayabisa baatu ba huuna Tsaangu Yimbwe, natee bu nde hatoodi hu musyenge a Sezare.