1 Pahuli na Silaasi baavyohili mu misyenge mya Apfipolisi na Apoloniya, na baayato hu musyenge a Tesalonika, hu bo baamoni nzo lisambulu yi Bayudaayo. 2 We bu huli ipfu hya nde, Pahuli ayeni huuna. Mu basaba batatu ba baalandisini, nde amohi na Bayudaayo mu Mabasonehe ma Ngidi. 3 Mu mambu ma nde hakabindula bo, nde akamweese, we bu mo mali. Masiya afwana umaamono pasi, na usuuha mu babaakwa. Nde akaleele bo: «Yisu mo wu me ndi mu unzabisa benu wu, nde ni Masiya.» 4 Mwana a baatu bakima ŋa hati la bo, baasiidi hiitu mu mambu mo maana, na baabambini na Pahuli na Silaasi. Buuna ni bu hwasiidi kabu lilinene la bisu Ngeleke ba baakayusa Nzambi, na bakaasu ba banzuhisini baa likiinzu, baayapfuutana na bo. 5 Ka Bayudaayo bakima baamoni nyengi. Bo baakuukihi mwa biyahudi bi byaba mu manzila, na baatumi bo mu usa muyungisi na kele mutso musyenge woosi. Mu mawasa, bo baayapalila muutu mumosi nga nduhi a Yasoni hu nzo a nde, mu usaha Pahuli na Silaasi, mana babita bo ŋa kuungi la baatu. 6 Ka bu baavelimono bo, bo baakangi Yasoni na bambaahi ba nde bakima baa imiinu. Na baabiti bo ŋa busu bu banzonzi baa musyenge. Bo baakafulaha: «Baatu mobaniba baamiikotese muyungisi mu toto yoosi, ka bunuubu, bo bamiiyato natee huni! 7 Ka Yasoni ni wu miiyaka bo mu nzo a nde. Baatu mobaniba boosi a bali mu ukiinza mikele mya Pfumu Kayisaali ve. Bo bali mu uleele ti, huli na pfumu mukima nga nduhi Yisu.» 8 Maambu mo maana maasyelisi konge a baatu mitima, napa banzonzi baa musyenge. 9 Ni mu buuna, bakuutu baakaambi bilangi huli Yasoni na bambaahi ba nde, mana banyahula bo.

10 Bu busi bwayili, baana ba ngu baatsindihi Pahuli na Silaasi hu musyenge a Beere. Bu baayato huuna, bo baayakoto hu nzo lisambulu yi Bayudaayo. 11 Bayudaayo ba hu Beere baaba na matsimi ma mabwe ti, ba bali hu musyenge a Tesalonika, baayaki mambu ma Nzambi mu bunyanga bu mutima. Pasi ilumbu, bo baakataanga Mabasonehe ma Ngidi, mu utsikaha tso ma baakayabisa bo, mali ma mbuli. 12 Buuna, ba banzuhisini mu bo baasiidi hiitu. Na ŋa hati li Bangeleke, bakaasu ba likiinzu na babahala ba banzuhisini ka, baasiidi hiitu. 13 Ka Bayudaayo ba hu Tesalonika, baayuhi ti Pahuli aka mu ubwelongese mambu ma Nzambi hu Beere. Bo baayeni huuna, mu uyatuumbasa na usa kele ŋa hati la konge a baatu. 14 Buuna mu mawasa, baana ba ngu baabatisi Pahuli hu tsyelo mubu mu uvolo likuumbi. Ka Silaasi na Timoteho baasaali hu Beere. 15 Ba baakabita Pahuli, baayeni na nde natee hu musyenge a Atenesi. Titswene, mu tumili a Pahuli, bo baafutihi hu Beere, mana baleele Silaasi na Timoteho bayabiisala nde mu mawasa hu musyenge mowuna.

16 Bu Pahuli hakakeele Silaasi na Timoteho hu Atenesi, nde aba na inganganyi mu umono buni bifwita bi bilahi byaba mu musyenge mowuna mu pasi mbuha. 17 Nde akasobosono matsimi na Bayudaayo mu nzo lisambulu yi Bayudaayo, napa bakima ba baakakiinza Nzambi. Pasi ilumbu, nde akamoho ka itwadi na ba baakaba mu matandala ma mikungi. 18 Ni huuna, biyedi banga kuumbu Bayepikule na Basotoyise*, baakayatoyo na nde. Bana baakafuula: «Litodo mo linili hima lili mu uleele hya tsiki?» Baatu bakima ti: «Nde we wu li mulongisi a mambu ma binzanzambi bya byenyi». Bo baafutili buuna, mu tooni ati, bo baakayuha Pahuli mu uyabisa tsangu yimbwe ya Yisu na ya tsuuhili a nde mu babaakwa. 19 Buuna, bo baavoli Pahuli na ubita nde hu isyelo hya Ayelopaze hu banzonzi baakapfutana mu pfuundu a bo. Na baafuuli nde: «Bisu utwala uyaba pila a ndongisili yi nyatihi yi we li mu ulongese baatu? 20 We li mu uyabisa mu matswi ma bisu misamu mi bisu laaveletsikaha, na bisu litondi uyaba mbindulili a myo.» 21 Bo baavondi mbindulili mo yiina, mu tooni ati, bisu musyenge a Atenesi boosi, na byenyi bi byayidi ŋa hati la bo, baakavyoso taangu a bo yoosi ndulu mu ubaatoyo. Bo baakavyoso taangu a bo mu ubaatsotso na ubaayuha mambu ma manyatihi.

22 Pahuli atelimi ŋa hati la pfuundu banzonzi na aleeli: «Benu bisu Atenesi, me ndi mu umono mu moosi ti benu laakangama mu inzambi hya benu. 23 Mu tooni ati, me ataangila musyenge a benu, na me atsikaha bifwita bya benu. Mu hati bifwita mo biina, me atsoolo mwa ibaanga imosi hya ndongisili, hi baasonehe bunuubu: "Huli nzambi wu baaveleyaba." Wu benu libaakiinza hwavele uyaba, ni nde me miinzanzabisa benu. 24 Nzambi a Pungu wu avanga tsi, na byosi bi bili mu yo, nde ni wu li Pfumu a yulu na toto. Na nde a habatsahala mu bibaanga bi baatunga mu myoho mya baatu ve. 25 Nde a hali na nzala ati basalila nde mu myoho mya baatu ve, we nde wu li na nzala isiha. Mu tooni ati, nde ni wu ubaava moonyi huli boosi, muvumu na bina byosi. 26 Ndulu mu muutu mumosi, nde avangi mabuli moosi, mana mo matsahala mu toto yoosi. Nde akese huli baatu matangu, na mandilu ma bitaanzi ma bo baafwana ubaatsahala. 27 Nzambi avangi bo, mana bo basaha nde, na peleve mu upeebete, bo utwala usoolo nde. Mu mbuli, Nzambi a hali lala tso na mumosi mu bisu ve. 28 Mu tooni ati:

"Ni mu nde, bisu lili moonyi,

libanyingama na lili baa lili."

Maana ni ma basonihi bakima baa benu baaleeli:

"Bisu ka lili baa ibaandu hya Nzambi."

29 Ubaamono ti bisu ni baa ibaandu hya Nzambi, bisu utwala uba na tsimi ve, ti Nzambi ifwaani hi ifwita hya wolo. Tso nde ifwaani hi ifwita hi itali hya talu, buuve hi mamanya ma baavanga mu bungeele na matsimi ma bumuutu ve. 30 Kaahu Nzambi asiidi kolo-kolo mu maana moosi, bu baatu baakaveleyaba ma baakavaanga. Ka loloyi, nde li mu uyabisa huli boosi, mu mambuha moosi, mu unyongo mu mavaanga ma bo, na usobo mbiili a bo. 31 Nzambi amiisoolo ilumbu hi nde hutsundasa baatu boosi mu butsiitsa, mu nzila a muutu wu nde hamiisoolo. Nde amiimweese imbangi huli baatu boosi, ti muutu mowuna na ali, bu hamiisuula nde ŋa hati la babaakwa.»

32 Bu bo baayuhi ti Pahuli li mu utoyo mu tsuuhili a babaakwa, bana baasyebi nde. Na bakima baaleeli: «Mu dyaambu mo lina, bisu ka ilumbu ikima lu uyuha we.» 33 Buuna Pahuli asiisi bo. 34 Ka mwaana a kabu limosi la baatu, baayapfuutana na nde, na baasiidi hiitu mu Yisu. Ŋa hati la bo hwaba Denisya, mumosi wa pfuundu banzonzi baa Ayelopaze, na mukaasu mumosi nduhi Damalisya, na bakima-bakima.