1 Bu ilumbu hya Pantekote hyatoodi, bo boosi baaba baapfutana mbuha mosi. 2 Mawasa-mawasa, kele mosi yamati hu yulu we ifula hi mifudi. Buuna, kele mo yaluusi nzo yi bo baaba baatsahala. 3 Mu taangu mo yiina, bo baamoni malimi we maludi ma mbaahu. Mo maakakabuha na uyanama limosi-limosi ŋa yulu a pasi muutu mu bo. 4 Bo boosi baaluuli mu Livupu la Ngidi. Titswene baakatoyo mandaha makima, we bu Livupu laakatuma bo mu uyambila. 5 Hu musyenge a Yeruselemi, hwaba na Bayudaayo ba baakakiinza Nzambi, ba baamati mu matsi moosi. 6 Bu bo baayuhi puunga mo yiina, mawasa-mawasa baatu mo baana baakuukimi mbuha mosi. Na bo baakimuhi hu unzuhisini, bu pasi muutu mu bo hakayuha bo mu uyambila mu ndaha a bula bwa nde. 7 Bo aba baaluula mu boomo, na baakasingasala na uleele: «Baatu mo babali mu utoyo baniiba, boosi bali bisu Ngalili! 8 Buni muutu-muutu mu bisu a benu, ali mu uyuha bo mu uyambila ndaha a bula bwa nde? 9 Ŋa hati la bisu a benu, huli na bisu tsi a Palatesi, ya Mediya na ya Elami. Huli kaka na bisu Mezopotamiya, hu tsi a Yuda na hu Kapadosi, hu Pooti na baa itaanzi hya Asiya. 10 Bakima bisu Filizi na Papfiliya, bisu Ngipiti na bisu Silene mu tsi a Libya. Huli kaka na bisu Looma, 11 na bisu iliiŋa hya Kerete, hu itaanzi hya Arabiya. Bamosi mu bisu bali Bayudaayo mu ubuta, na bakima mu bisu baasiingi usambila Nzambi Bayudaayo. Ka bisu a benu muutu-muutu li mu uyuha bo, mu utoyo mu mandaha ma mala ma bisu, mambu mamanene ma kimuhili a mavaanga ma Nzambi.»

12 Bo boosi baakimuhi hu unzuhisini, na matsimi maasuki bo. Bo baakafulasana: «Dyambu mo linili lo buni?» 13 Ka baatu bakima baanyanzi na baakaleele: «Bo hutso a laangi li malamu bali.»

14 Buuna Peetelo atelimi na biluumbi kuumi na imosi. Mu ndaha yi mifudi nde ayabisi huli konge a baatu: «Benu Bayudaayo, na benu bisu Yeruselemi, tehaani matswi mu ma me ndi mu undeele benu, na yaabaani ma mali mu uvyoho. 15 Baatu mobaniba a baakolo malamu we bu benu lili mu utsima ve. Mu tooni ati, yiniiyi kini ngunga yi ipfwa ya ŋa ngwali. 16 Ka bunuubu, mambu ma mumbihuli Yoweli haleeli mamiivangama:

17 "Nzambi aleeli: mu bilumbu bya tsyelele,

me unzitala Livupu la me ŋa yulu a pasi muutu.

Baana baa benu ba bakaasu na ba babahala

bu ubihula mu nduhi a me,

pfudu-mbahala a benu bu umono bimono-miisu,

na binunu bya benu bi ulooto mandoosi.

18 Eye, huli basalili ba me ba bakaasu na ba babahala,

mu bilumbu mo biina, me unzitala Livupu la me,

na bo bu ubihula mu nduhi a me.

19 Me upanga bimangu hu yulu,

na biliimbu bya kimuhili ŋa toto.

Sa huba na makila, mbaahu, na mayidu ma mwiki.

20 Nyangu ukituha piipidi,

na tsungi ubeenge we makila,

tswamina ilumbu hya Pfumu mu uto.

Ilumbu mo hiina hyuba hiinene na hi muyusu.

21 Buuna, pasi muutu wu usambila Pfumu, uyoboho✝."

22 Benu bisu Isereli, yuhaani ma me undeele benu, mu tooni a Yisu musi Nazareti. Ni bahala li Nzambi hasilasa ŋa busu bwa benu, mu bipadi na biliimbu bi Nzambi hasa mu nde ŋa hati la benu. Benu mwakulu liyabi ma nde havangi. 23 Muutu mo wunuuwu baayehuli benu nde, we bu hwaba kesili a Nzambi, nde wu aba ateehele moosi uyaba. Ni benu laadubi nde. Benu baa laayehuli nde huli ba baaveleyaba Nzambi, mana bakomene nde ŋa kuruwa. 24 Ka Nzambi asuuli nde mu babaakwa, na ayobili nde mu mapasi ma lipfu. Mu tooni ati, lipfu a laabahi matwala ma ukaanga nde ve. 25 Davidi aleeli mu tooni a nde:

"Me akamono Pfumu taangu yoosi ŋa busu bwa me,

nde li ŋa mbahala a me, mana me peletsula likamba.

26 Ni mu buuna, mutima a me ali mu isusi,

na mambu ma me moosi kaka, mali mu kinya.

Napa linyutu la me lili mu uvuma mu hiitu.

27 Mu tooni ati, we Nzambi,

we a unyahula me mu tsi a babaakwa ve.

We a usiingasa kaka ve ti me, musalili a we wa ngidi,

nyutu a me yibolo hutso a ngila.

28 We amweesi me manzila ma mu baabita hu moonyi.

We uluusa me mu kinya, bu we uba ŋa muvanga a me✝."

29 Baana baa ngu a me, me utwala uleele benu paayalala, mambu ma matali kaaha a bisu a benu Davidi. Nde akwidi, na baadihi*. Ngila a nde yikini huli bisu, te loloyi. 30 Ka nde aba mumbihuli, na nde akayaba ti Nzambi asiidi nde nzuhisini mu mulabu. Lahi mo ti, mumosi ŋa hati li bikiisa bya nde, ukiisana nde ŋa kiti-ipfumu hya nde. 31 Davidi atswamini uyaba mambu ma tsuuhili a Masiya mu babaakwa, bu nde hakaleele ti:

"Nzambi a hatalila nde mu tsi a babaakwa siha ve,

na linyutu la nde a laabolo hutso a ngila ve."

32 Nzambi asuuli nde ŋa hati la babaakwa. Yisu mo wu me ndi mu unzambila mu nde wunuwu. Bisu boosi lili bambangi. 33 Baasyenuli nde, mu uba ŋa mbahala a Nzambi. Na nde miiyaka Livupu la Ngidi huli Taata, we bu Nzambi hasiidi nzuhisini. Nde amiiyitala lo ŋa yulu a bisu, we bu benu lili mu umono na uyuha bunuubu. 34 Mu tooni ati Davidi a hakuma hu mayulu ve, ka nde mwakulu aleeli:

"Pfumu aleeli huli Pfumu a me:

Tsahala ŋa mbahala a me,

35 natee bu me ukitusa baboho ba we,

isuusili hya miilu mya we✝."

36 Ni mu buuna, baatu boosi ba Isereli baafwana uyaba mu mbuli yoosi ti: Yisu wu benu laakomini ŋa kuruwa, Nzambi amiibyalisa nde Pfumu na Kristo.»

37 Baatu babaayuhi mambu mo maana baakimuhi hu unzuhisini. Bo baafuuli Peetelo na biluumbi bina: «Baana baa ngu, bisu hima lafwana usa?» 38 Peetelo akaali bo: «Sobwaani mbiili, na pasi muutu mu benu batondehe mu nduhi a Yisu Kristo. Saani buuna, mana Nzambi amasa masumu ma benu. Ni huuna benu lu uyaka bungodu bu Livupu la Ngidi. 39 Mu tooni ati, nzuhisini la Nzambi baasiidi mu benu, mu baana ba benu. Lahi la Nzambi baasiidi mu boosi ba bali hu matsi ma lala, na mu pasi muutu wu Pfumu Nzambi a bisu hu uteele.»

40 Peetelo abweleele bo mambu ma malahi makima, mana bo bayuhala nde, na nde akayibusa bo na ubaaleele bo: «Siingaani liyobolo, mana benu aliyaka tsyembili a baatu mobaniba ba banyambana.» 41 Kabu li lilahi laasiingi mambu ma Peetelo hakaleele. Baatondihi bo mu nyahulili a masumu. Mu ilumbu mo hiina, we biveeve bitatu (3 000) bya baatu baabiisili kabu la banga hiitu.

42 Bo baakahwada mu ubaayuha taangu yoosi ndongisili biluumbi, mu ubaatsahala mu itwadi na bana, mu ubaadya na ubaasambila mu itwadi. 43 Baatu boosi baaba na tsisu a Nzambi, bu bayihi baakasa bipadi bi bilahi na bimbangi bya kimuhili. 44 Boosi ba baasiidi hiitu baaba itwadi, na baakapfuuta mbuha mosi byosi bi bo baaba na byo. 45 Bo baakasumbasa busina bwa bo na bi bo baaba na byo. Bo baakakabasana mbongo, we bu hwaba nzala a muutu-muutu. 46 Pasi ilumbu, mu mutima mumosi, bo baakaba ŋa litandala la nzo a Nzambi. Bo baakakabasana byudya bya bo, mu itwadi mu manzo ma bo, na baakadya na kinya, mutima wu ayaluha. 47 Bo baakayusa Nzambi, na baatu boosi baaba na hyese hya bo. Na pasi ilumbu Pfumu akabwese hu kabu la banga hiitu, ba nde hakayobolo.