1 Pahuli ayeni hu musyenge a Derebe natee hu musyenge a Lisitele. Huuna hwaba na muyihi mumosi, nduhi a nde Timoteho. Ngu a nde aba Muyudaayo wu asiidi hiitu mu Yisu, na taata a nde musi Ngeleke. 2 Baana baa ngu baa hu Lisitele na Ikoniwumi, baakata imbangi hi ibwe mu Timoteho. 3 Pahuli atondi udyenge itwadi na nde. Ni mu buuna, Pahuli haketi nde mu uva likiinzu huli Bayudaayo ba ibiingi mo hina. Nde hasiidi buuna, mu tooni ati Bayudaayo mo baana, aba baayaba ti taata a nde Mungeleke ali. 4 Mu misyenge myosi mi bo baakataangila, bo baakayabisa makesili ma biluumbi na bakuutu ba libundu baa Yeruselemi baavoli. Na baakavondo huli bo, mu ukiinza makesili mo maana. 5 Mabundu maakahwada mu hiitu mu Nzambi, na maakakula mu litangu la baatu pasi ilumbu.

6 Bu Livupu la Ngidi laalihi bo mu ulongese mambu ma Nzambi hu itaanzi hya Asiya, bo bataangili bitaanzi bya Filizi na Ngalatiya. 7 Bu bo baayato bebele na itaanzi hya Misiya, bo baabahi tsimi yi uyene hu tsi ya Bitiniya. Ka Livupu la Yisu, a laviidi bo muswa ve. 8 Buuna bo baataangili Misiya na baakulimini natee ŋa ngulu yi makuumbi ma nzali mabaatsikama ya Tolowasi. 9 Butsuhu mo buuna, Pahuli amoni imono-miisu. Nde amoni musi Masedonya mumosi, wu aba mu tele. Na muutu mowuna akabondele nde ti: «Vyohele hu itaanzi hya Masedonya, mu ukumbasa bisu!» 10 Humbisa a imono-miisu mo hina, bisu laatsimi mu mawasa, mu uyene hu Masedonya. Mu tooni ati bisu laaba na tadi ti, Nzambi ni wu ateele bisu mu uyalongese Musamu wu Mubwe hu tsi mo yiina.

11 Bisu laakoti mu likuumbi hu musyenge a Tolowasi, na laatsikimi hu iliiŋa hya Samotalasi. Mu ilumbu hi hyadukili, bisu laatoodi hu musyenge a Neyapolisi. 12 Bu laamati huuna, bisu laayeni hu musyenge a Filipo, musyenge wu munene wu itaanzi hya Masedonya, wu bisu Looma baatungi. Bisu laavyosi mwa bilumbu huuna.

13 Mu ilumbu hya saba, bisu laapali mu musyenge mu uyene ŋa muvanga a nzali. Huuna, bisu laakatsima ti bisu lu umono mbuha yi lisambulu yi Bayudaayo. Bisu laatsahili, na laalongisi bakaasu ba baaba baakuukama ŋana. 14 Ŋa hati li bakaasu mo baana, hwaba na mukaasu mumosi nduhi a nde Lydya, wu baabuta hu musyenge a Tyatire. Nde akasumbasa matsaanda mamabenge ma talu, na nde akakiinza Nzambi. Bu nde hakayuha bisu, Pfumu adibuli mutima a nde, mana nde atsikaha ma Pahuli hakaleele. 15 Bu nde hasiidi hiitu, baatondihi nde, na baatu ba nzo a nde. Humbisa, nde atsihi bisu hu nzo a nde na uleele: «Tso benu limoni ti mbuli me miitsa hiitu mu Pfumu, yaani! Na kwilalaani mu nzo a me.» Buuna nde akwamisi bisu mu usiinga.

16 Ilumbu imosi, bu bisu laakayene hu mbuha lisambulu, muviha mumosi wa nuumba, ayabwana bisu. Nuumba mo yiina, aba ivungu. Livupu li muhisi li laakakwamisa nde, laakatumasa nde ubihula ma mu uya hu busu. Bapfumu ba nuumba mo yiniiyi, baakatutala mbongo yindahi mu mbihulili a nde. 17 Nde akaduukala Pahuli na boosi ba baaba na nde. Nde akabaafulaha mu mifudi: «Baatu mobaniba basalili ba Nzambi a hu hati a yulu. Bo bamiiyamweese benu, buni benu lafwana uyoboho.» 18 Nde akasa buuna, bilumbu bi bilahi. Hu tsyelele, Pahuli afwengi na akinguhi mu uleele huli livupu mo liina: «Mu nduhi a Yisu Kristo, me miituma we mu upala mu nuumba mo yiniiyi!» Masulubete, livupu laapali mu nyutu a nde.

19 Bapfumu ba muviha mo wunuuwu, baamoni ti nzila yi bo baakabahila mbongo yimiipfuba. Buuna, bo baakangi Pahuli na Silaasi, na baabiti bo ŋa litandala li mikungi ŋa busu bu bakuutu ba musyenge. 20 Bo baabiti bo ŋa busu bu banzonzi baa Looma, na baleeli: «Baatu mobaniba, bali mu ubehe muyungisi mu musyenge a bisu. Bo Bayudaayo bali, 21 na bali mu ulongese mbiili yi bisu baatu ba Looma laavele na muswa mu usiinga na mu usalila.»

22 Konge a baatu ka yadasuhili bo. Banzonzi baatumi umaasa bikutu bya Pahuli na Silaasi, na utuma ufwinza bo bafwafwala. 23 Humbisa ufwinza bo bafwafwala, baabwahi bo mu kondaayi na utuma keedi mu ubaakeelese bo bubwe. 24 Bu keedi habahi muswa mowuna, nde asuusi bo mutso a kondaayi hu itini hya tsoso. Bo mu uvelebata, nde akutilili bo miilu mu bibundu bi miti. 25 Hu hahati a busi, Pahuli na Silaasi baakasambila na uyimba mu uyuusa Nzambi. Bikondaayi bikima byakayuha bo. 26 Masulubete, toto yanyingimi, na yasukili ibeene hya nzo a kondaayi. Bidibuhu byosi byadibumi, na mu mawasa, mapanga ma bikondaayi moosi maanyanguhi. 27 Keedi a kondaayi asuuhi, ŋa nde hamoni bidibuhu byosi bwasi. Nde aduti sabila mu uduba linyutu la nde, bu hakatsima ti bikondaayi byosi byamiibata. 28 Ka Pahuli afulihi mu mifudi myosi: «Nyaha uduba linyutu la we! Bisu boosi ni ŋa lili.» 29 Buuna keedi avondi mwinda, akoti mawasa mu nzo a kondaayi na likamba mu boomo. Nde ayabwa ŋa miilu mya Pahuli na Silaasi. 30 Keedi apalisi bo na aleeli: «Pfumu, hima me apfwana mu usa, mana me kaka nzoboho?» 31 Bo baafutili nde: «Sa hiitu mu Pfumu Yisu, na we sa yoboho, we na ikuta hya we hyoosi.» 32 Buuna bo baayabisi mambu ma Pfumu huli nde, na huli baatu ba nzo a nde boosi. 33 Ni hu hahati a busi, mu taangu mo yiina, keedi abiti Pahuli na Silaasi ŋa mbuha mosi, mu uyaswaha mbuma a bo. Mawasa-mawasa, nde ayaki tondihili, napa ikuta hya nde hyoosi. 34 Humbisa, keedi abiti bo hu nzo a nde, na aviidi bo byudya. Nde aluuli mu kinya, mu tooni ati, bo baasiidi hiitu mu Nzambi, itwadi na ikuta hya nde hyoosi.

35 Bu busi bwakiidi, banzonzi ba bisu Looma, baatsindihi masadaadu ma bo mu uyaleele huli keedi a kondaayi: «Nyahula baatu mo baana.» 36 Keedi a kondaayi ayayabisa lo huli Pahuli na aleeli: «Banzonzi bamiiva me muswa mu unyahula benu. Benu utwala upala, na uyene mu hyenze.» 37 Ka Pahuli aleeli huli masadaadu ma baatsindihi: «Bo baafwinza bisu bafwafwala ŋa kuungi la baatu hwavele batsundasa bisu, bu bisu lili bisu Looma! Titswene, bo baabwahi bisu mu kondaayi. Bunuubu, bo batondi unyahula bisu mu tswehi? Naana, a buuna ve! Bo mwakulu bayanyahula bisu.» 38 Masadaadu ma baatsindihi, maayatoosele mambu mo maana huli banzonzi baa Looma. Bu banzonzi baayuhi ti Pahuli na Silaasi baaba bisu Looma, bo baamoni boomo. 39 Banzonzi baayalembesene bo mu usa bo kolo-kolo. Na bo baapalisi bo mu kondaayi, na uvondo bo mu upala mu musyenge mowuna. 40 Bo bapala mu kondaayi, Pahuli na Silaasi baayeni hu nzo a Lydya. Bu bo baamani umono baana ba ngu na uhwadisa bo, bo baayeni.