Pahuli hu Koliito
1 Humbisa a maana, Pahuli amati hu Atenesi na ayeni hu Koliito. 2 Huuna, nde abwani na Muyudaayo mumosi nga nduhi Akilasi. Muyudaayo mo wunuuwu, musi musyenge a Ponte. Mu bilumbu mo biina, nde amati hu tsi a Italiya na mukadi a nde Pilisile. Nde hamati huuna, mu tooni ati Koloode, pfumu a Looma, avoli kesili ti Bayudaayo boosi, baafwana upala mu Looma. Pahuli ayeni huli Akilasi na Pilisile. 3 Nde hapfuutini na bo, bu bo boosi baaba tsalu mosi. Nde atsahili huli bo, na bo baakasala itwadi. Isalu hya bo aba utuunga hu manzo ma ngooto. 4 Pasi ilumbu hya saba, mu nzo lisambulu yi Bayudaayo, Pahuli akalongese mu usaha ukiingula matsimi ma Bayudaayo na Bangeleke. 5 Ka bu Silaasi na Timoteho baamati hu itaanzi hya Masedonya, Pahuli asinzisalila taangu a nde, mu ubaalongese mambu ma Nzambi. Nde akasilasa huli Bayudaayo, ti Yisu ni Masiya. 6 Ka bu Bayudaayo baabisi ma nde, na bu baatuhi nde, Pahuli akubili mufundu bikutu bya nde, na aleeli bo: «Tso benu lidimbili, mbele ya benu mwakulu. Me a ukolo mapfuumba mu maana ve. Ka bunuubu, me tsa nzyene huli ba bavele Bayudaayo.»
7 Pahuli amati ŋa mbuha mo yiina, na nde ayeni hu nzo a bahala limosi nga nduhi Titiyusi Yusetuusi. Bahala mo liinili akasambila Nzambi, na nzo a nde aba yabaambana na yi lisambulu yi Bayudaayo. 8 Buuna Kilisiposi, mutumi a nzo lisambulu yi Bayudaayo, asiidi hiitu mu Pfumu na ikuta hya nde hyoosi. Bisu Koliito ka ba banzuhisini ba baakayuha mambu ma Pahuli, baasiidi hiitu mu Pfumu Yisu, na baayaki tondihili. 9 Ilumbu imosi ŋa butsuhu, Pfumu amonihili na Pahuli na aleeli nde: «A haba na boomo, baayambila, a hadibuha munywa. 10 Ka me ndi itwadi na we. Muutu utwala ukaanga we, na uvangila we lilibi ve. Mu tooni ati, me ndi na baatu ba banzuhisini mu musyenge mo wunuuwu.» 11 Na Pahuli akwilili hu Koliito ilima imosi na batsungi basamunu, mu ubaalongese baatu mambu ma Nzambi.