Atos 3

Nga ipiha wu abeeluhi hu nzo a Nzambi

1 Peetelo na Yowani baakumi hu nzo a Nzambi mu lisambulu mu ngunga yi matatu ya humbisa a mwangulu. 2 Ŋa muvanga a ikotili hya mumbu a nzo a Nzambi, hi baakateele «ikotili hi ibwe», hwaba na muutu nga ipiha hi imbutala-ngu. Pasi ilumbu, baakabehe na baakatsahisa nde ŋana. Bo baakasa buuna, mana nde abaavondo bungodu huli ba baakakoto mu litandala la nzo a Nzambi. 3 Nde amono Peetelo na Yowani ba baakakoto mu nzo a Nzambi, nde avondi bo mbongo. 4 Peetelo na Yowani baasungimini nde, na Peetelo aleeli nde: «Tala bisu!» 5 Nde atali bo na hiitu hyoosi, mu tooni ati, nde akakeele uyaka isiha huli bo. 6 Buuna Peetelo aleeli nde: «Me a handi na mbongo, tso wolo ve. Ka bi me ndi na byo, me miipa we byo, mu nduhi a Yisu Kristo musi Nazareti: teleme na yene!» 7 Titswene, Peetelo akaangi nde mu hoho hwa mbahala, atelimisi nde. Masulubete, miilu mya nde na makede byahwadi. 8 Mu dambuha limosi, nde atelimi na ayeni. Nde akoti na biluumbi mu litandala la nzo a Nzambi mu uyene, mu udambuha, na mu ubaayusa Nzambi. 9 Baatu boosi baamoni nde, mu uyene na mu uyusa Nzambi. 10 Baatu baadihuli ti wunuwu ni nde wu akabaavondo bungodu matsahala, ŋa ikotili hya mumbu a nzo a Nzambi. Bo boosi baakimuhi na baamoni tsisu mu ma maabwili muutu mo wunuwu.